ചേര്ത്തല: ജുഡീഷ്യല് ഓഫീസര്മാരുടെ അഭാവംമൂലം കോടതികളുടെ പ്രവര്ത്തനം മന്ദഗതിയിലായി. കേസുകള് പരിഗണിക്കുന്നതും തീര്പ്പ് കല്പിക്കുന്നതും അനിശ്ചിതത്വത്തിലായി. ഒന്നാംക്ലാസ് ജുഡീഷ്യല് മജിസ്ട്രേട്ട് കോടതിയിലും പ്രിന്സിപ്പല് മുന്സിഫ് കോടതിയിലുമാണ് കേസുകള് സംബന്ധിച്ച നടപടികള് വൈകുന്നത്.
മജിസ്ട്രേട്ടും മുന്സിഫും സ്ഥാനക്കയറ്റം ലഭിച്ച് സബ് ജഡ്ജിമാരായി പോയതാണ് ഇതിന് കാരണം. പകരക്കാരെ നിയമിക്കുന്നതിലെ കാലതാമസം അനേകം കേസുകളെ പ്രതികൂലമായി ബാധിക്കുകയാണ്.
കണിച്ചുകുളങ്ങര കൂട്ടക്കൊലക്കേസ് കേസ് ഉള്പ്പെടെയുള്ളവ ഇവിടെ പരിഗണിക്കുന്നത്. പ്രതിവര്ഷം 5000 ഓളം കേസുകള് കോടതിയിലെത്തുന്നുണ്ട്. ഇതുമൂലം കേസുകളില് തീര്പ്പ് കല്പിക്കാന് കാലതാമസം നേരിടുന്ന അവസ്ഥയാണ്.
ഇതിനൊപ്പമാണ് ജുഡീഷ്യല് ഓഫീസര്മാരുടെ അഭാവവും പ്രതിസന്ധി സൃഷ്ടിക്കുന്നത്. പ്രിന്സിപ്പല് മുന്സിഫ് കോടതിയിലും സര്ക്കാര് എതിര്കക്ഷിയായ നിരവധി കേസുകള് കെട്ടിക്കിടക്കുകയാണ്.
ജില്ലാ ജുവൈനല് ജസ്റ്റിസ് ബോര്ഡിന്റെ ചുമതലയുള്ള പ്രിന്സിപ്പല് ഓഫീസര് സ്ഥാനക്കയറ്റം നേടിപ്പോയ മജിസ്ട്രേട്ടാണ്. പകരം നിയമനം നടക്കാത്തതിനാല് ബോര്ഡിന്റെ സിറ്റിങും മുടങ്ങിയ സ്ഥിതിയാണ്.
