കോട്ടയം: അന്തരിച്ച സ്റ്റാര്‍വിഷന്‍ ചാനല്‍ ക്യാമറാമാന്‍ ടോണി വെമ്പള്ളിയുടെയും ചാനല്‍ ടെക്നീഷ്യന്‍ മഹേഷ് സുന്ദറിന്റേയും നിര്‍ധന കുടുംബത്തിന് സഹായമെത്തിക്കാന്‍ സ്റ്റാര്‍വിഷന്റെയും ജനപ്രതിനിധികളുടെയും വിവിധ സംഘടനകളുടെയും നേതൃത്വത്തില്‍ സമര്‍പ്പണ നിധി സമാഹരിക്കുന്നു.
ഗുരുതരമായ പ്രമേഹരോഗബാധയെത്തുടര്‍ന്ന് ഒരു മാസത്തോളം ഇടപ്പള്ളി അമൃതാ ആശുപത്രിയില്‍ ചികിത്സയിലായിരുന്ന ടോണി ജൂണ്‍ 10നാണ് മരണമടഞ്ഞത്. ടോണിയുടെ മരണത്തെത്തുടര്‍ന്ന് ഭാര്യ രഞ്ജിനിയും ഒന്നാം ക്ലാസ് വിദ്യാര്‍ത്ഥിനിയായ ആന്‍ മരിയയും ഏറെ വിഷമത്തിലായി. വാടകവീട്ടില്‍ കഴിയുന്ന അവര്‍ക്ക് സഹായ ഹസ്തമാവാനും വീടു വച്ചുനല്‍കുവാനും സുഹൃത്തുക്കളും സഹപ്രവര്‍ത്തകരും ചേര്‍ന്ന് തീരുമാനിച്ചിരിക്കുന്നു. ഇതോടൊപ്പം ടോണിയുടെ മരണാന്തരചടങ്ങുകള്‍ നടന്നതിന് പിറ്റേന്ന് മരണമടഞ്ഞ സ്റ്റാര്‍വിഷന്‍ കേബിള്‍ ടെക്നീഷ്യന്‍ മഹേഷ് സുന്ദറിന്റെ കുടുംബത്തിനും വീടു നിര്‍മ്മിച്ചുനല്‍കും. സ്വന്തമായി ഒരു കൊച്ചുവീടെന്ന സ്വപ്‌നവുമായി വീടുപണി തുടങ്ങി കട്ടിള വയ്‌പിനു പിറ്റേന്നാണ് 24 കാരനായ മഹേഷ് സുന്ദറിന്റെ മരണം. പ്രായമായ അച്ഛനുമമ്മയും ഒന്‍പതാം ക്ലാസുകാരിയായ സഹോദരിയുമാണ് മഹേഷിനെ ആശ്രയിച്ചു കഴിഞ്ഞിരുന്നത്. 2 കുടുംബങ്ങള്‍ക്കും വീടുവച്ചുനല്‍കുക എന്ന ശ്രമകരമായ ദൗത്യമാണ് മോന്‍സ് ജോസഫ് എംഎല്‍എ കണ്‍വീനറും ജോസ് കെ മാണി എം.പി, സുരേഷ് കുറുപ്പ് എം.എല്‍.എ, വി.എന്‍ വാസവന്‍ എക്സ് എം.എല്‍.എ, എന്‍ ഹരി (ബിജെപി ജില്ലാ പ്രസിഡന്റ്) എന്നിവര്‍ രക്ഷാധികാരികളുമായ 21 അംഗകമ്മിറ്റി ഏറ്റെടുത്തിരിക്കുന്നത്.സമര്‍പ്പണ നിധി സമാഹരണത്തിനായി ഫെഡറല്‍ ബാങ്കിന്റെ കിടങ്ങൂര്‍ ബ്രാഞ്ചില്‍ കിടങ്ങൂര്‍ പഞ്ചായത്ത് പ്രസിഡന്റ് ലിസി എബ്രഹാമിന്റെയും പഞ്ചായത്തംഗം എ.എന്‍ നീലകണ്ഠന്‍ നമ്പൂതിരിയുടേയും പേരില്‍ അക്കൗണ്ടും തുറന്നിട്ടുണ്ട്.
അ/ഇ ചീ: 130 301 000 94814, കഎടഇ ഇീറല: എഉഞഘ0001303, ആൃമിരവ ഇീറല: 001303
സമര്‍പ്പണനിധിയിലേക്കുള്ള ആദ്യഗഡുവായി സ്റ്റാര്‍വിഷന്‍ കുടുംബാംഗങ്ങള്‍ നല്‍കുന്ന 2ലക്ഷം രൂപ കിടങ്ങൂര്‍ പഞ്ചായത്ത് പ്രസിഡന്റ് ലിസി എബ്രഹാമിന് കൈമാറി.
കോട്ടയം പ്രസ്‌ക്ലബ്ബ് ഹാളില്‍ നടന്ന ചടങ്ങില്‍ അഡ്വ.സന്തോഷ് മണര്‍കാട് അദ്ധ്യക്ഷനായിരുന്നു. അഡ്വ. മോന്‍സ് ജോസഫ് എം.എല്‍.എ ആമുഖപ്രഭാഷണം നടത്തി. അഡ്വ. കെ സുരേഷ് കുറുപ്പ് എം.എല്‍.എ, പാലാ നഗരസഭാ വൈസ് ചെയര്‍മാന്‍ കുര്യാക്കോസ് പടവന്‍,അയര്‍ക്കുന്നം പഞ്ചായത്തംഗം ജോസഫ് ചാമക്കാല, ബിജെപി ജില്ലാ സെക്രട്ടറി കെ.പി സുരേഷ്, കിടങ്ങൂര്‍ പഞ്ചായത്തംഗം നീലകണ്ഠന്‍ നമ്പൂതിരി, പ്രസ് ക്ലബ്ബ് പ്രസിഡന്റ് ഷാലു മാത്യു, സെക്രട്ടറി എസ്.മനോജ്, സ്റ്റാര്‍വിഷന്‍ ഡയറക്ടര്‍മാരായ ബിനു സ്റ്റീഫന്‍, സജിത് സി. എന്നിവരും ചടങ്ങില്‍ പങ്കെടുത്തു.
