കൊച്ചി: ദേശീയപാത 45മീറ്റര്‍ ബിഒടി പദ്ധതി നടപ്പാക്കാന്‍ വേണ്ടി ഇടപ്പള്ളി മൂത്തകുന്നം ഭാഗത്ത് വീണ്ടും കുടിയൊഴിപ്പിക്കാന്‍ ശ്രമിച്ചാല്‍ ചെറുക്കുമെന്ന് ഭൂവുടമകള്‍. കൂനമ്മാവില്‍ നടന്ന എന്‍എച്ച്17 സംയുക്ത സമര സമിതിയുടെ ജില്ലാ തല അടിയന്തര യോഗത്തിലാണ് തീരുമാനം.
ബിഒടി ടോള്‍ പദ്ധതി ഉപേക്ഷിച്ച് പകരം ഏറ്റെടുത്ത് പാഴായി കിടക്കുന്ന 30മീറ്റര്‍ വീതിയില്‍ അടിയന്തരമായി 6 വരിപാത നിര്‍മിച്ച് പ്രശ്‌നം പരിഹരിക്കാനാണ് മുഖ്യമന്ത്രി ശ്രമിക്കേണ്ടത്. ഇടതു മുന്നണി അടക്കമുള്ള രാഷ്‌ട്രീയ പാര്‍ട്ടികളുടെയും ജനപ്രിതിനിധികളുടെയും തദ്ദേശ സ്വയംഭരണ സ്ഥാപനങ്ങളുടെയും തീരുമാനം അട്ടിമറിക്കുന്നത് ജനാധിപത്യ വിരുദ്ധമാണെന്നും സമര സമിതി പറഞ്ഞു.
നൂറിലധികം ആളുകള്‍ പങ്കെടുത്തതോടെ ജില്ലാ കമ്മറ്റി യോഗം പ്രതിഷേധ യോഗമായി മാറി. പ്രതിഷേധ പ്രകടനവും നടന്നു.
ജില്ലാ ചെയര്‍മാന്‍ ഹാഹാഷിം ചേന്നാമ്പിള്ളി അദ്ധ്യക്ഷത വഹിച്ചു. സംസ്ഥാന പ്രസിഡന്റ് ഇ.വി.മുഹമ്മദാലി ഉദ്ഘാടനം ചെയ്തു. കെ.വി. സത്യന്‍ മാസ്റ്റര്‍, പ്രൊഫ. നാണപ്പന്‍പിള്ള , ജസ്റ്റിന്‍ ഇലഞ്ഞിക്കല്‍, ടോമി ചന്ദനപറമ്പില്‍, രാജന്‍ ആന്റണി, വി.കെ അബ്ദുല്‍ ഖാദര്‍, സി. വി ബോസ്, ഷൈജന്‍, ടോമി അറക്കല്‍ എന്നിവര്‍ പ്രസംഗിച്ചു.
