മാരാരിക്കുളം: മാരാരിക്കുളം പോലീസ് സ്റ്റേഷന് പരിസരത്ത് മോഷ്ടാക്കള് വിലസുന്നു. ജനജീവിതം ഭീതിയില്. മാരാരിക്കുളം പോലീസ് സ്റ്റേഷന് പിന്നിലുള്ള ചെറുക്കശ്ശേരി പ്രദേശത്താണ് ഇപ്പോള് മോഷ്ടാക്കളുടെ വിഹാര കേന്ദ്രം.
കഴിഞ്ഞ ബുധനാഴ്ച അര്ദ്ധരാത്രിക്ക് എസ്എല് പുരം മഹാവിഷ്ണു ക്ഷേത്രത്തിന് പിന്നിലുള്ള വീട്ടില് മോഷ്ടാക്കള് കയറി. കനത്ത മഴയത്ത് വീടിന്റെ ടെറസില് കയറിയ മോഷ്ടാവ് വാതില് പൊളിക്കാന് ശ്രമിച്ചു. ശബ്ദം കേട്ട് വീട്ടുകാര് ഉണര്ന്ന് വിളക്ക് തെളിയിച്ചപ്പോള് മോഷ്ടാവ് മുകളില് നിന്നും ചാടിയിറങ്ങി മതില് ചാടി ഓടി. വെള്ളിയാഴ്ച രാത്രിയിലും പ്രദേശത്ത് വീണ്ടും മോഷണ ശ്രമം നടന്നു. മഹാ വിഷ്ണുക്ഷേത്രത്തിന്റെ തെക്ക് വശത്തുള്ള മറ്റൊരു വീട്ടില് മോഷണ ശ്രമം നടന്നു. നേരത്തേ പോലീസ് സ്റ്റേഷന് സമീപമുള്ള എസ്എല് പുരം മാര്ക്കറ്റിലാണ് മോഷണം പതിവായി നടന്നിരുന്നത്. ഇതുവരെയും ഒരു മോഷ്ടാവിനെയും പിടികൂടാന് കഴിഞ്ഞിട്ടില്ല.
മാര്ക്കറ്റില് വ്യാപാരികള് രാത്രി കാവല്ക്കാരനെ നിയോഗിച്ചപ്പോള് മോഷണം നിലച്ചു. തുടര്ന്ന് മോഷണം മാര്ക്കറ്റിന് പിന്നിലുള്ള വീടുകളിലായി. സ്ത്രീകള് മാത്രമുള്ള വീടുകളിലാണ് ഇപ്പോള് മോഷണ ശ്രമം നടക്കുന്നത്.
