ആലപ്പുഴ: മന്ത്രി ജി. സുധാകരന്റെ ഹിന്ദു സംന്യാസിമാരോടുള്ള അവഹേളനത്തില് ഭാരതീയ മത്സ്യപ്രവര്ത്തക സംഘം പ്രതിഷേധിച്ചു. ഇതര മതങ്ങളിലെ ചിലരുടെ കയ്യടി വാങ്ങിക്കുന്നതിനായി നിരന്തരം ഹിന്ദു സംന്യാസിമാരെയും പൂജാരിമാരെയും ഒറ്റതിരിഞ്ഞ് അവഹേളിക്കുകയും അധിക്ഷേപിക്കുകയും ചെയ്യുന്നത് തെരഞ്ഞെടുപ്പില് തനിക്കുണ്ടായ ന്യൂനപക്ഷ ഏകീകരണത്തിന് ഉപകാരസ്മരണയാണോ എന്ന് സുധാകരന് വ്യക്തമാക്കണം. എല്ലാ മതവിശ്വാസങ്ങളെയും ആചാരങ്ങളെയും ഒരുപോലെ കാണേണ്ട ഒരു മന്ത്രി ഇത്തരം ഹിന്ദുഅധിക്ഷേപം കാണിക്കുകയും സംന്യാസിമാരുടെ അടിവസ്ത്രം അന്വേഷിക്കുകയും ചെയ്യുന്നതിനു പകരം സ്വന്തം മണ്ഡലത്തില് കടല്ക്ഷോഭം മൂലം കഷ്ടപ്പെടുന്ന തീരദേശ വാസികളുടെ കണ്ണീര് കാണാനോ അവരുടെ പ്രശ്നങ്ങള്ക്ക് പരിഹാരം കാണാനോ ഇന്നുവരെ പരിശ്രമിച്ചിട്ടില്ല.
അതിനാല് മന്ത്രി എന്ന നിലയില് ചെയ്തിട്ടുള്ള പ്രതിജ്ഞ പാലിക്കണമെന്നും ഹിന്ദു സമൂഹം വെറും വോട്ടുകുത്തി യന്ത്രങ്ങളല്ലെന്ന് സുധാകരന് തിരിച്ചറിയണമെന്നും പ്രസ്താവന തിരുത്തി മാപ്പു പറയണമെന്നും ഭാരതീയ മത്സ്യപ്രവര്ത്തക സംഘം സംസ്ഥാ ന സഹസംഘടനാ സെക്രട്ടറി എം.കെ. പ്രദീപ് ആവശ്യപ്പെട്ടു.
ജില്ലാ അദ്ധ്യക്ഷന് ഡി. സുരേഷ് അദ്ധ്യക്ഷത വഹിച്ചു. സെക്രട്ടറി അഡ്വ. രണ്ജിത് ശ്രീനിവാസ്, ഡി. ഭുവനേശ്വരന്, ദേവദാസ് എന്നിവര് പ്രസംഗിച്ചു.
