അരൂര്: സ്വന്തമായി സ്ഥലമുണ്ടായിട്ടും വാടക കെട്ടിടത്തില് പ്രവര്ത്തിക്കേണ്ട ഗതികേടിലാണ് അരൂരിലെ എക്സൈസ് ഓഫീസ്. അരൂക്കുറ്റി കായലോരത്ത് വകുപ്പിന് സ്വന്തമായി ഒരേക്കറോളം സ്ഥലമുണ്ടെങ്കിലും കെട്ടിട നിര്മാണത്തിന് ആവശ്യമായ നടപടികള് സ്വീകരിക്കാന് അധികൃതര് തയാറാകുന്നില്ലെന്ന് വിമര്ശനം ഉയര്ന്നിട്ടുണ്ട്. തുറവൂര് പഞ്ചായത്തിന്റെ കിഴക്കന് കായലോര മേഖലയായ വളമംഗലത്തെ വാടക കെട്ടിടത്തിലാണ് നിലവില് ഓഫീസ് പ്രവര്ത്തിക്കുന്നത്.
പരിമിതികളില് വീര്പ്പുമുട്ടുന്ന കെട്ടിടത്തില് അടിസ്ഥാന സൗകര്യങ്ങള് പോലുമില്ലാതെ ഓഫീസ് പ്രകവര്ത്തിക്കുന്നതിനെതിരെ പ്രതിഷേധം ഉയര്ന്നിട്ടുണ്ട്. സ്വന്തമായി കെട്ടിടം വെണമെന്ന ആവശ്യത്തിന് നേരെ അധികൃതര് മുഖം തിരിക്കുകയാണെന്നാണ് ജീവനക്കാരില് ഒരു വിഭാഗം പറയുന്നത്. ഇത് സധ്യമായാല് വാടകയിനത്തില് പാഴാക്കുന്ന തുക ലാഭിക്കാനാകും.
ചില അധികാരികളുടെ താല്പ്പര്യം സംരക്ഷിക്കാനാണ് വാടകകെട്ടിടത്തില്നിന്ന് ഓഫീസിന്റെ പ്രവര്ത്തനം മാറ്റാന് തയാറാകാത്തത് എന്നും പരാതിയചുണ്ട്. അരൂക്കുറ്റിയില് കെട്ടിടം നിര്മിച്ച് ഓഫീസിന്റെ പ്രവര്ത്തനം ഇവിടേയ്ക്ക് മാറ്റിയാല് അരൂര് മണ്ഡലത്തിലെ വിവിധ മേഖലകളിലേക്ക് ഉദ്യോഗസ്ഥര്ക്ക് അനായാസം എത്താനും ദേശീയ പാതയില് വേഗത്തില് എത്തിച്ചേരാനും കഴിയും.
മഴ കനത്തതോടെ കായലിനോട് ചേര്ന്നുള്ള സ്ഥലത്തിന്റെ സംരക്ഷണ ഭിത്തി തകര്ന്ന് മണ്ണൊലിച്ചു പോകുന്ന സ്ഥിതിയിലാണ്്. ഭിത്തി നിര്മിച്ചില്ലെങ്കില് സ്ഥലം അന്യാധീനപ്പെട്ടുപോകുമെന്നാണ് നാട്ടുകാര് പറയുന്നത്.
രാജഭരണ കാലത്ത് കൊച്ചി നിന്നും തിരുവിതാംകൂറിലേക്ക് കച്ചവട സാധനങ്ങള് എത്തിക്കുമ്പോള് ചുങ്കം പരിക്കുന്നതിനും മറ്റ് അതിക്രമങ്ങള് തടയുന്നതിനുമായാണ് സ്ഥലം തിരുവിതാംകൂര് മഹാരാജാവ് എക്സൈസ് വകുപ്പിന് നല്കിയത്. ഇവിടെ ചൗക്കയും പ്രവര്ത്തിച്ചിരുന്നു.
കാടുപിടിച്ചു കിടക്കുന്ന ഈ പ്രദേശം ഇപ്പോള് സാമൂഹ്യവിരുദ്ധരുടെയും വിഷപ്പാമ്പുകളഉടെയും താവളമാണ്. കെട്ടിടം നിര്മിക്കുന്നതിനായുള്ള നടപടികള് ഗവണ്മെന്റിന്റെയോ, എക്സൈസ് വകുപ്പിന്റെ ഭാഗത്തു നിന്നോ ഉണ്ടാകണമെന്നാണ് ആവശ്യം.
