ഇരിട്ടി: മുഴക്കുന്ന് പഞ്ചായത്തിലെ കാക്കയങ്ങാട് പാലയില്‍ സിപിഎമ്മുകാര്‍ വീട്ടില്‍ക്കയറി ഏഴു വയസ്സുകാരനെ വെട്ടിപ്പരിക്കേല്‍പ്പിച്ച സംഭവത്തില്‍ ഒരാഴ്ച കഴിഞ്ഞിട്ടും പ്രതികളെ പിടികൂടാത്തത് പ്രതികള്‍ ‘ഭരണസ്വാധീനത്തിന്റെ തണലില്‍ കഴിയുന്നത് കൊണ്ടാണെന്ന് കുട്ടിയുടെ മാതാപിതാക്കള്‍ പത്രസമ്മേളനത്തില്‍ പറഞ്ഞു. തികച്ചും രാഷ്‌ട്രീയ വിദ്വേഷത്തില്‍ നടത്തിയ അക്രമത്തെ കുടുംബവഴക്കായി നിസ്സാരവല്‍ക്കരിക്കാനാണ് സിപിഎം ശ്രമിച്ചു കൊണ്ടിരിക്കുന്നത്. രാഷ്‌ട്രീയ വിരോധികളെ കുടുംബക്കാരെ ഉപയോഗിച്ച് ആക്രമണം നടത്തുകയും അതിനെ കുടുംബവഴക്കായി ചിത്രീകരിക്കുകയും ചെയ്യുന്ന പതിവ് ഇതിനു മുമ്പും മുഴക്കുന്ന് പഞ്ചായത്തിലുണ്ടായിട്ടുണ്ട്. ഇവിടെയും അതാണ് സിപിഎം ചെയ്തിരിക്കുന്നത്. യാതൊരുവിധ കുടുംബപ്രശ്‌നങ്ങളും ഒരു വര്‍ഷത്തിനിപ്പുറം തങ്ങളുടെ കുടുംബത്തില്‍ ഉണ്ടായിട്ടില്ല. കുട്ടിയുടെ അമ്മാവനടക്കം മൂന്നു പേര്‍ വീട്ടില്‍ വന്ന് നടത്തിയ അക്രമം അയല്‍വാസികളും കണ്ടതാണ്. ഇവര്‍ പറഞ്ഞു.
കുട്ടിയുടെ അമ്മ രമ്യ കഴിഞ്ഞ പഞ്ചായത്ത് തെരഞ്ഞെടുപ്പില്‍ മുഴക്കുന്ന് പതിനാലാം വാര്‍ഡിലെ സ്ഥാനാര്‍ഥിയായിരുന്നു. പഞ്ചായത്തില്‍ രണ്ടു വാര്‍ഡുകളില്‍ ബിജെപി സ്ഥാനാര്‍ഥികള്‍ വിജയിക്കുകയും ചെയ്തു. കാലാകാലമായി സിപിഎം ഭരിക്കുന്ന പഞ്ചായത്തില്‍ ബിജെപി നേടിയ വിജയം സിപിഎമ്മിനെ ചൊടിപ്പിച്ചിരുന്നു. അതിനുശേഷം പഞ്ചായത്തിന്റെ വിവിധ ഭാഗങ്ങളില്‍ വ്യാപകമായി പ്രവര്‍ത്തകരും അവരുടെ വീടുകളും സിപിഎമ്മിന്റെ അക്രമത്തിനിരയായി. ഈ അക്രമങ്ങള്‍ക്കിടയില്‍ ബിജെപി പ്രവര്‍ത്തകനായ സന്തോഷിനെ വധിക്കാന്‍ ശ്രമിച്ച കേസിലെ പ്രതിയാണ് കുട്ടിയെ വെട്ടിയ സംഘത്തിലെ മനു. സന്തോഷ് വധശ്രമക്കേസില്‍ റിമാന്റിലായ മനു ജാമ്യത്തില്‍ ഇറങ്ങിവന്ന ശേഷമാണ് ഈ ആക്രമണം നടത്തിയത്. മനുവിനെ കൂടാതെ ഷിജു, സുധീഷ് എന്നിവരും സംഘത്തില്‍ ഉണ്ടായിരുന്നു. പ്രതികള്‍ക്കെതിരെ വ്യക്തമായ തെളിവും മൊഴിയും നല്‍കിയിട്ടും പോലീസ് ഇവരെ പിടികൂടുന്നില്ല. പ്രതികള്‍ ഭരണസ്വാധീനമുപയോഗിച്ച് സിപിഎം സങ്കേതത്തില്‍ ഒളിവില്‍ കഴിയുകയാണ്. ഇവരെ പിടികൂടുന്നതില്‍ പോലീസ് തികഞ്ഞ നിസ്സംഗതയാണ് കാണിക്കുന്നത്.
സിപിഎമ്മിന്റെ അക്രമത്തിനിരയായ കാര്‍ത്തിക് ഇപ്പോഴും ചികിത്സയിലാണ്. സ്‌കൂള്‍ തുറന്നെങ്കിലും ഒരു മാസമെങ്കിലും കഴിയാതെ കുട്ടിക്ക് സ്‌കൂളില്‍ പോവാനാവില്ല. അതുവരെ വിശ്രമം വേണമെന്നാണ് കുട്ടിയെ ചികിത്സിക്കുന്ന ഡോക്ടര്‍ പറയുന്നത്. കാര്‍ത്തിക്കിന് നീതി ലഭിക്കാന്‍ പോലീസ് ശക്തമായ നിയമനടപടികള്‍ സ്വീകരിക്കണം. ഇല്ലാത്ത പക്ഷം പോലീസ് സ്റ്റേഷന്‍ മാര്‍ച്ച് അടക്കമുള്ള ശക്തമായ പ്രക്ഷോഭങ്ങളുമായി ബിജെപി മുന്നോട്ടു വരുമെന്നും കുട്ടിയുടെ മാതാപിതാക്കളാായ രമ്യക്കും, രാഹുലിനുമൊപ്പം പത്രസമ്മേളനത്തില്‍ പങ്കെടുത്ത ബിജെപി ജില്ലാ സിക്രട്ടറി കൂട്ട ജയപ്രകാശും എന്‍.വി.ഗിരീഷും അറിയിച്ചു.
