കോഴിക്കോട്: വിദ്യാലയങ്ങളില് കോമ്പൗണ്ടിന് ചുറ്റിലും ശീമക്കൊന്ന, മുരിങ്ങ, ചെമ്പരത്തി തുടങ്ങിയവ വെച്ചുപിടിപ്പിച്ച് ജൈവ വേലികള് നിര്മിക്കാന് ജില്ലാ പഞ്ചായത്ത് വിദ്യാഭ്യാസ കോഡിനേഷന് യോഗം സ്കൂള് അധികൃതരോട് ആവശ്യപ്പെട്ടു. പരിസ്ഥിതിദിന അനുബന്ധ പരിപാടികള് ജൂണ് 30 വരെ സംഘടിപ്പിക്കാനും സ്കൂള് ശുചിത്വത്തിനും സൗന്ദര്യവത്ക്കരണത്തിനും കര്മപരിപാടികള് ആവിഷ്ക്കരിക്കാനും യോഗം നിര്ദേശിച്ചു. വീടും പരിസരവും ശുചിയായി സൂക്ഷിക്കാനുള്ള നിര്ദേശങ്ങളും വിദ്യാര്ത്ഥികള്ക്കു നല്കണം. എല്ലാ ഞായറാഴ്ചകളിലും കുടുംബത്തോടൊപ്പം ഡ്രൈഡേ ആചരിക്കാന് കുട്ടികള് മുന്കൈയെടുക്കണം. പി.ടി.എ കളുമായി സഹകരിച്ച് സ്കൂള് പരിസ്ഥിതിക്ലബ്ബ്, ഹെല്ത്ത് ക്ലബ്ബ് തുടങ്ങിയവയുടെ നേതൃത്വത്തില് വേണം കര്മപരിപാടികള് ആവിഷ്ക്കരിക്കാന്.
ജില്ലാ പഞ്ചായത്ത് ഭവനില് ചേര്ന്ന കോഡിനേഷന് കമ്മിറ്റി യോഗത്തില് വിദ്യാഭ്യാസ സ്റ്റാന്റിംഗ് കമ്മിറ്റി ചെയര്മാന് മുക്കം മുഹമ്മദ് അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡണ്ട് ബാബു പറശ്ശേരി, വൈസ് പ്രസിഡണ്ട് റീന മുണ്ടേങ്ങാട്ട്, ഡി.ഡി.ഇ. ഡോ.ഗിരീഷ് ചോലയില്, ഡയറ്റ് പ്രിന്സിപ്പല് കെ. പ്രഭാകരന്, ഡി.പി.ഒ കെ. വത്സന്, കോ-ഓര്ഡിനേറ്റര് കെ.കെ.ശിവദാസന്, സി.കെ.വാസു, സുജാതമനയ്ക്കല്, ശ്രീജ പുല്ലാരിക്കല് സംസാരിച്ചു.
