ശാസ്താംകോട്ട: മണ്ണൂര്ക്കാവ് ഭഗവതിക്ഷേത്രത്തിലെ അഞ്ചാമത് കഥകളി ഫെസ്റ്റിവലിന് ഇന്നലെ തുടക്കം കുറിച്ചു. ആര്.രാമചന്ദ്രന് എംഎല്എയുടെ അദ്ധ്യക്ഷതയില് കഥകളി ആചാര്യന് കലാമണ്ഡലം ഗോപി ഫെസ്റ്റിവലിന് ദീപം തെളിയിച്ചു.
തേവള്ളി ശ്രീകണ്ഠന് മുഖ്യപ്രഭാഷണം നടത്തി. കഥകളി ഫെസ്റ്റിവല് പതിപ്പിന്റെ ഉദ്ഘാടനം കെ.കരുണാകരന്പിള്ള നിര്വഹിച്ചു. തുടര്ന്ന് മണ്ണൂര്ക്കാവ് കഥകളി പഠനകേന്ദ്രത്തിലെ മേളവിഭാഗം ആദ്യബാച്ചിലെ വിദ്യാര്ത്ഥികളുടെ അരങ്ങേറ്റം നടന്നു. 14ന് സോദാഹരണപ്രഭാഷണങ്ങള്. രണ്ടിന് നടക്കുന്ന സമാപനസമ്മേളനം മന്ത്രി കെ.രാജു ഉദ്ഘാടനം ചെയ്യും, കോവൂര് കുഞ്ഞുമോന് എംഎല്എ അദ്ധ്യക്ഷത വഹിക്കും. മണ്ണൂര്ക്കാവ് വനദുര്ഗ പുരസ്കാരം ബി.അജയകുമാര് സമര്പ്പിക്കും. 10001 രൂപയും ശില്പ്പവുമടങ്ങിയ അവാര്ഡ് സംഗീതജ്ഞന് പത്തിയൂര് ശങ്കരന്കുട്ടി ഏറ്റുവാങ്ങും. അഡ്വ.എ.സോമപ്രസാദ് എംപി മുഖ്യപ്രഭാഷണം നടത്തും. എംഎല്എ എന്.വിജയന്പിള്ള, മടവൂര് വാസുദേവന്നായര്, കെ.വേണുഗോപാല് എന്നിവര് പങ്കെടുക്കും.
