പാനൂര്‍: ജില്ലയിലെ ബാലവേലക്കെതിരെ നടപടിയെടുക്കാന്‍ ഉത്തരവ്. കണ്ണൂര്‍ ജനകീയസമിതി സെക്രട്ടറി ഇ.മനീഷ് സംസ്ഥാന നിയമസേവന അതോറിട്ടിക്ക് നല്‍കിയ പരാതിയിലാണ് അതോറിട്ടി എക്‌സിക്യൂട്ടീവ് ചെയര്‍മാന്‍ തോട്ടത്തില്‍ രാധാകൃഷ്ണന്‍ ജില്ലാലീഗല്‍ അതോറിട്ടിക്ക് നിര്‍ദ്ദേശം നല്‍കിയത്. തലശേരി, പാനൂര്‍ മേഖലകളിലെ സമ്പന്നരുടെ വീടുകളില്‍ അന്യസംസ്ഥാനത്ത് നിന്നും വീട്ടുവേലക്ക് കുട്ടികളെ നിര്‍ത്തുന്നത് വ്യാപകമാണ്. ജില്ലാലീഗല്‍ അതോറിട്ടി സെക്രട്ടറി ജഡ്ജ് എം.പി.ജയരാജന്‍ പരാതിയില്‍ അന്വേഷണം നടത്തി നേരത്തെ റിപ്പോര്‍ട്ട് സമര്‍പ്പിച്ചിരുന്നു. ആന്ധ്രാപ്രദേശ്, കര്‍ണ്ണാടക, തമിഴ്‌നാട്, കുടക്, വയനാട് എന്നിവിടങ്ങളില്‍ നിന്നാണ് നിര്‍ധനരായ കുട്ടികളെ വീട്ടുവേലക്കായി എത്തിക്കുന്നത്. ഇതിനു പിന്നില്‍ വന്‍സംഘം പ്രവര്‍ത്തിക്കുന്നുണ്ട്. പണം മുന്‍കൂര്‍ നല്‍കിയാണ് ഇടനിലക്കാര്‍ വഴി മാതാപിതാക്കളില്‍ നിന്നും കുട്ടികളെ വിലക്കെടുക്കുന്നത്. കോഴിക്കോട് കേന്ദ്രീകരിച്ചു പ്രവര്‍ത്തിക്കുന്ന കുട്ടിക്കടത്ത് സംഘമാണ് ഇതിനു പിന്നിലെന്നും ആക്ഷേപമുണ്ട്.
പാനൂര്‍ കൈവേലിക്കലില്‍ വീട്ടുവേലക്ക് നിര്‍ത്തിയ 11കാരി മര്‍ദ്ധനമേറ്റ് വീട്ടില്‍ നിന്നും ഇറങ്ങിയോടിയ സംഭവമുണ്ടായിരുന്നു. സം’ഭവത്തില്‍ വീട്ടുക്കകാര്‍ക്കെതിരെ പാനൂര്‍പോലീസ് കേസെടുത്തിരുന്നു. തലശേരി താലൂക്കിലാണ് ബാലവേല കൂടുതലായി നടക്കുന്നത്. ഇതിനു പുറമെ ഹോട്ടലുകള്‍, ബേക്കറി, മറ്റ് തൊഴില്‍ശാലകളിലും ബാലവേല നടക്കുന്നതായി അന്വേഷണത്തില്‍ തെളിഞ്ഞിട്ടുണ്ട് ഇത്തരത്തില്‍ സംശയമുളള വീടുകളിലും സ്ഥാപനങ്ങളിലും പരിശോധന നടത്താനും ശക്തമായ നടപടികള്‍ സ്വീകരിക്കാനും ജില്ലാകലക്ടര്‍ക്കും മറ്റ് ബന്ധപ്പെട്ട വകുപ്പുകള്‍ക്കും നിര്‍ദ്ദേശം നല്‍കിയിട്ടുണ്ട്. ബാലവേല വിരുദ്ധദിനമായ 12ന് പാനൂര്‍ വ്യാപാര’ഭവനില്‍ ബോധവല്‍ക്കരണ ക്യാംപയിനും സംഘടിപ്പിച്ചിട്ടുണ്ട്. തലശേരി കുടുംബകോടതി ജഡ്ജ് സി.ബാലന്‍ ഉദ്ഘാടനം ചെയ്യും. പാനൂര്‍ നഗരസഭാ ചെയര്‍പേഴ്‌സണ്‍ കെ.വി.റംല അദ്ധ്യക്ഷത വഹിക്കും.
