ചെറുപുഴ: മണല്‍ പാസ്സുകള്‍ വ്യാജമായി നിര്‍മ്മിച്ച് മണല്‍ കടത്തുകയായിരുന്ന മൂന്നംഗ സംഘം ചെറുപുഴ പോലിസിന്റെ പിടിയിലായി. കാസറഗോഡ് ജില്ലയിലെ അംഗീകൃത കടവിലെ തൊഴിലാളി സഹകരണ സംഘത്തിന്റെ സീലുകളും രസീതുകളും പാസ്സും വ്യാജമായി നിര്‍മ്മിച്ചാണ് നാളുകളായി മണല്‍ കടത്തിയിരുന്നത്. ഐടി വിദഗ്ദനായ വിദ്യാര്‍ഥി ഉള്‍പ്പെട്ട സംഘത്തെയാണ് ഒരാഴ്ചത്തെ നിരീക്ഷണത്തിനൊടുവില്‍ ചെറുപുഴ എസ്‌ഐ കെ.വി.സ്മിതേഷിന്റെ നേതൃത്വത്തില്‍ ബുധനാഴ്ച വൈകുന്നേരം പിടികൂടിയത്. മണല്‍ കടത്തുന്നതിനുപയോഗിച്ച ലോറി െ്രെഡവറും മുഖ്യസൂത്രധാരനുമായ പ്രാപ്പൊയില്‍ സ്വദേശി റംഷാദ് സി വി(30), ഐടി വിദ്യാര്‍ഥിയായ വങ്ങാട്ടെ മുഹമ്മദ് സമീല്‍ (19), കമ്പ്യൂട്ടര്‍ സ്ഥാപനത്തിലെ ജീവനക്കാരന്‍ വയക്കരയിലെ നിഷാദ്(26)എന്നിവരെയാണ് അറസ്റ്റ് ചെയ്തത്. മണല്‍ പാസ്സുകളുടെ വ്യാജപ്രിന്റുകള്‍ എടുക്കാന്‍ ഉപയോഗിച്ച ലാപ് ടോപ്പ്, പ്രിന്റര്‍,പ്രിന്റിംഗ് പേപ്പറുകള്‍, സീലുകള്‍ എന്നിവയും മണല്‍ കടത്താനുപയോഗിച്ച ലോറിയും പിടികൂടി. ഒറിജിനല്‍ മണല്‍പാസ്സിന്റെ ഹോളോഗ്രാം മുദ്ര പറിച്ചെടുത്ത് വ്യാജ പാസ്സില്‍ ഒട്ടിച്ചിരുന്നതിനാല്‍ പെട്ടെന്ന് തിരിച്ചറിയുമായിരുന്നില്ല. തുടര്‍ച്ചയായി മണല്‍ പാസ് പോലിസിനെ കാണിച്ച് മണല്‍ കടത്തിക്കൊണ്ടിരിക്കുന്നതില്‍ സംശയം തോന്നിയതിനെ തുടര്‍ന്നുള്ള നിരീക്ഷത്തിലാണ് പാസ് വ്യാജമാണെന്ന് പോലിസ് കണ്ടെത്തിയത്. ചെറുപുഴ എസ്‌ഐ കെ.വി സ്മിതേഷിനു പുറമെ സീനിയര്‍ സിവില്‍ പോലിസ് ഓഫിസര്‍മാരായ കെ.ഡി.ഫ്രാന്‍സിസ്, പ്രസേനന്‍, ജയന്‍, ഭാസ്‌കരന്‍ എന്നിവരുള്‍പ്പെട്ട സംഘമാണ് പ്രതികളെ പിടികൂടിയത്. അറസ്റ്റ് രേഖപ്പെടുത്തിയ പ്രതികളെ ഇന്ന് കോടതിയില്‍ ഹാജരാക്കും.
വ്യാജ മണല്‍ പാസ്സ് നിര്‍മ്മിച്ച് മണല്‍ കടത്തിയ മൂന്നംഗസംഘം പിടിയില്‍
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.