പൊന്മുടി അണക്കെട്ട് മണല്‍ മാഫിയാ കയ്യടക്കുന്നു; അനധികൃത മണല്‍വാരല്‍ സജീവം

രാജാക്കാട്: പൊന്മുടി ജലാശയത്തിലെ ടൂറിസം പദ്ധതി അനിശ്ചിതത്വത്തിലായി ബോട്ടിങ് അടക്കം നിലച്ചതോടെ അണക്കെട്ട് മണല്‍ മാഫിയാ കയ്യടക്കുന്നു. ജലനിരപ്പ് താഴ്ന്ന് കിടക്കുന്നതിനാല്‍ തിട്ടയിടിച്ചാണ് നിലവില്‍ വന്‍തോതില്‍ അനധികൃതമായി മണലൂറ്റ് നടക്കുന്നത്. അധികൃതരുടെ ഒത്താശയോടെയാണ് മാഫിയാ സംഘങ്ങള്‍ പകല്‍ സമയത്തുപോലും പൊന്മുടിയെ കയ്യടക്കുന്നത്. വര്‍ഷങ്ങളായി പൊന്മുടി അണക്കെട്ടിനെ കയ്യടക്കി വച്ചിരുന്ന മാഫിയാ സംഘങ്ങളുടെ പ്രവര്‍ത്തനം പൊന്മുടി ജലാശയത്തില്‍ ബോട്ടിങ് ആരംഭിച്ചതോടെ അവസാനിച്ചിരുന്നു. എന്നാല്‍ ജലാശയത്തിനുള്ളില്‍ ഉയര്‍ന്നു നില്‍ക്കുന്ന മരക്കുറ്റികള്‍ വെട്ടിനീക്കാത്തതിനാല്‍ നിലവില്‍ മൂന്ന് മാസക്കാലമായി ബോട്ടിങ് നിലച്ചിരിക്കുകയാണ് ഈ അവസരം മുതലെടുത്താണ് ഇപ്പോള്‍ മണല്‍ മാഫിയാ വീണ്ടും ഊര്‍ജ്ജിതമായി അനധികൃത മണലൂറ്റ് നടത്തുന്നത്. കൊന്നത്തടി പഞ്ചായത്തിന്റെ ഭാഗത്തുള്ള തുരുത്തുകളിലെ വെള്ളമിറങ്ങിയ പ്രദേശത്ത് അടിഞ്ഞുകൂടുക്കിടക്കുന്ന മണല്‍ വലിയ കുഴികള്‍ കുഴിച്ച് കോരിയെടുക്കുകയാണ് ചെയ്യുന്നത്. തുടര്‍ന്ന് ചാക്കുകളില്‍ നിറച്ചതിന് ശേഷം വള്ളത്തില്‍ കയറ്റി വള്ളക്കടവ് ഭാഗത്തെത്തിച്ച് ഇവിടെ നിന്നും ജീപ്പിലും മറ്റ് വാഹനങ്ങളിലും കയറ്റി മുനിയറ വഴിയാണ് മണല്‍ വന്‍തോതില്‍ കടത്തല്‍ നടത്തുന്നത്. ഹൈറേഞ്ച് മേഖലയില്‍ അനുദിനം ഉയര്‍ന്നുവരുന്ന റിസോര്‍ട്ടുകള്‍ക്കും മറ്റുംവേണ്ടിയാണ് ഇത്തരത്തില്‍ മണലൂറ്റ് തകൃതിയായി നടക്കുന്നത്. പൊന്മുടി അണക്കെട്ടിലെ ഹൈഡല്‍ ടൂറിസം പദ്ധതി അട്ടിമറിക്കുന്നതിന് വേണ്ടി മണല്‍ വനം മാഫിയാ സംഘങ്ങള്‍ വലിയ പരിശ്രമം നടത്തുന്നുണ്ടെന്ന ആരോപണവുമായി മുമ്പ് നാട്ടുകാരും രംഗത്തെത്തിയിരുന്നു. ഇത് ശരിയാണെന്ന് തെളിയിക്കുന്നതാണ് ഇപ്പോള്‍ സജീവമായി നടക്കുന്ന മണലൂറ്റ്. അധികൃതരുടെ മൗനാനുവാദവും ഇതിനുണ്ടെന്നതാണ് ഇതിലൂടെ വ്യക്തമാകുന്നത്. ആരെയും ഭയക്കാതെയാണ് ഇവര്‍ പട്ടാപ്പകല്‍ മണല്‍ ഊറ്റിയെടുത്ത് കടത്തുന്നത്. മണലെടുത്തതിന് ശേഷമുണ്ടാകുന്ന വലിയ കുഴികള്‍ ഇവര്‍ മൂടാറുമില്ല അതുകൊണ്ട് തന്നെ വരുന്ന കാലവര്‍ഷത്തില്‍ അണക്കെട്ടില്‍ ജലനിരപ്പുയരുമ്പോള്‍ തിട്ടകള്‍ ഇടിഞ്ഞ് വീഴുകയും ഇതുവഴി സമീപത്തുള്ള വലിയ മരങ്ങളടക്കം കടപുഴകി അണക്കെട്ടില്‍ പതിക്കുകയും ചെയ്യും ഇത്തരത്തില്‍ വലിയ പാരിസ്ഥിതിക പ്രശ്‌നങ്ങള്‍ക്ക് വഴിയൊരുക്കുന്ന അനധികൃത മണല്‍വാരല്‍ തടയുന്നത് അടിയന്ദിര നടപടി സ്വീകരിച്ചില്ലെങ്കില്‍ അണക്കെട്ടിന്റെ വ്യാസം കൂടുകയും തിട്ടയിടിഞ്ഞ് വീണ് മണ്ണുനിറയുകയും ചെയ്യുന്നതോടെ ഡാമിന്റെ സംഭരണശേഷി കുറയുകയും ചെയ്യുമെന്നതിന് സംശയമില്ല.