പഠനോപകരണ വിതരണം; കൗണ്‍സിലില്‍ ഭരണ പ്രതിപക്ഷാംഗങ്ങള്‍ തമ്മില്‍ രൂക്ഷമായ വാക്‌പോര്

തൊടുപുഴ: കഴിഞ്ഞ വര്‍ഷം എസ്‌സി എസ്ടി വിദ്യാര്‍ത്ഥികള്‍ക്കുള്ള പഠനോപകരണ വിതരണം നടക്കാഞ്ഞതിനെച്ചൊല്ലി ഭരണ പ്രതിപക്ഷാംഗങ്ങള്‍ തമ്മില്‍ രൂക്ഷമായ വാക്‌പോര്. വിഷയത്തില്‍ എല്‍ഡിഎഫിന് പിന്തുണയുമായി ബിജെപിയും എത്തി. എസ്‌സി എസ്ടി വിദ്യാര്‍ഥികള്‍ക്ക് മേശ, കസേര വിതരണമാണ് കഴിഞ്ഞ വര്‍ഷം നടക്കാഞ്ഞത്. എന്നാല്‍ ഇത്തവണ 100 വിദ്യാര്‍ഥികള്‍ക്ക് നല്‍കാന്‍ കൗണ്‍സില്‍ തീരുമാനിക്കുകയും ജൂണ്‍ 5നു മുന്‍പായി കൊടുക്കുമെന്ന് വൈസ് ചെയര്‍മാന്‍ കൗണ്‍സിലില്‍ അറിയിക്കുകയും ചെയ്തു. സിപിഎം കൗണ്‍സിലാറായ കെ പി ഷിംനാസാണ് കഴിഞ്ഞ വര്‍ഷങ്ങളില്‍ മേശ, കസേര വിതരണം നടന്നിട്ടിലെന്ന് കൗണ്‍സിലില്‍ അറിയിച്ചത്. മുസ്ലിംലീഗ് കൗണ്‍സിലര്‍ അനില്‍കുമാര്‍ ഈ വിഷയത്തില്‍ വിതരണം ചെയ്യാന്‍ കഴിയാത്തത് കൗണ്‍സിലിന്റെ കുറ്റമല്ലെന്ന വാദവുമായി രംഗത്തെത്തി. കഴിഞ്ഞ വര്‍ഷം മുനിസിപ്പല്‍ കൗണ്‍സില്‍ തിരഞ്ഞെടുപ്പ് വിജ്ഞാപനമിറങ്ങിയതാണ് വിതരണം തടസപ്പെടാന്‍ കാരണമെന്ന് വൈസ് ചെയര്‍മാന്‍ കൗണ്‍സിലില്‍ വിശദീകരണം നല്‍കി. 10 എസ്എസ്ടി വിദ്യാര്‍ത്ഥികള്‍ക്ക് 25000 രൂപ വിലയുള്ള ലാപ് ടോപ്പുകള്‍ വിതരണം ചെയ്തു. വിദ്യാര്‍ത്ഥികള്‍ക്ക് പഠനോപകരണം വിതരണം ചെയ്യുന്നതില്‍ എസ്എസി ഓഫീസര്‍ക്ക് അലംഭാവമുള്ളതായും കൗണ്‍സിലില്‍ ആക്ഷേപമുയര്‍ന്നു. 16 അജന്‍ഡകളും അഡീഷണല്‍ അജന്‍ഡകളുമാണ് കൗണ്‍സില്‍ പരിഗണിച്ചത്. 100-ാം വാര്‍ഷികം ആഘോഷിക്കുന്ന മുനിസിപ്പല്‍ ലൈബ്രറി പ്രവര്‍ത്തനങ്ങള്‍ സജീവമാക്കാന്‍ കൗണ്‍സില്‍ തീരുമാനിച്ചു. വെങ്ങല്ലുരിനു സമിപം 2, 3, 4,5 വാര്‍ഡുകള്‍ക്ക് സീപമായി ഹെല്‍ത്ത് സെന്റര്‍ ആരംഭിക്കും. വാര്‍ഡ് വികസന സമിതി യോഗങ്ങള്‍ ജുലൈ 10 നു മുന്‍പ് പൂര്‍ത്തിയാക്കും. ഇതിനു ശേഷം ടൗണ്‍ ഹാളില്‍  35 വാര്‍ഡ് കൗണ്‍സിലര്‍മാരുടെയും,ജനങ്ങളുടെയും നേതൃത്വത്തില്‍ വികസന സെമിനാര്‍ നടത്തും. ഭിന്നശേഷിയുള്ളവരുടെ മാതാപിതാക്കള്‍ക്ക് കുട്ടികളെ എങ്ങനെ നോക്കാമെന്നതിനെക്കുറിച്ച് ക്ലാസുകള്‍ നടത്തണമെന്നും സിപിഎം കൗണ്‍സിലര്‍ ആര്‍ ഹരി കൗണ്‍സിലില്‍ ഉന്നയിച്ചു. ബയോഡൈവേഴ്‌സിറ്റി മാനജ്‌മെന്റ് പുനസംഘടിപ്പിക്കാനും ഇതിലേയ്‌ക്കായി അംഗങ്ങളെ തിരഞ്ഞെടുക്കാനും കൗണ്‍സില്‍ തീരുമാനിച്ചു.