കണ്ണൂര്: കേരളത്തില് വ്യവസായം തുടങ്ങാന് ഏതു ബഹുരാഷ്ട്ര കുത്തക കമ്പനികള് വന്നാലും സ്വീകരിക്കുമെന്ന് വ്യവസായ,കായിക മന്ത്രി ഇ.പി ജയരാജന്. കണ്ണൂര് പ്രസ്ക്ലബ്ബില് നടന്ന മുഖാമുഖം പരിപാടിയില് സംസാരിക്കുകയായിരുന്നു അദ്ദേഹം.
പൊതുമേഖലാ വ്യവസായം ഇന്ന് തകര്ച്ചയിലാണ്. സ്വകാര്യ മേഖലയിലും പ്രശ്നങ്ങളുണ്ട്. പല പൊതുമേഖലാ സ്ഥാപനങ്ങളും എന്ത് ലക്ഷ്യംവെച്ചാണോ രൂപം നല്കിയത് അതില് നിന്നും മാറി സ്ഥാപനത്തിന്റെ പ്രവര്ത്തനശേഷി ദുര്ബലപ്പെടുന്ന അവസ്ഥയിലേക്ക് നീങ്ങുന്നു. കെല്ട്രോണ് ഇതിന് ഉദാഹരണമാണെന്നും അദ്ദേഹം പറഞ്ഞു.
ഓരോ വ്യവസായങ്ങളും നേരിടുന്ന പ്രശ്നങ്ങള് പഠിച്ച് അത് പരിഹരിക്കാനുള്ള അടിയന്തിര നടപടി സ്വീകരിക്കും. കേരളത്തിന്റെ വ്യവസായരംഗം വിപൂലീകരിക്കും. ആധുനിക സാങ്കേതിക വിദ്യകളുള്പ്പെടുത്തി വ്യവാസയങ്ങള് സമൃദ്ധമാക്കും. ഖാദിവ്യവസായം കൂടുതല് തകര്ച്ചയിലേക്ക് പോയിക്കൊണ്ടിരിക്കുന്ന അവസ്ഥയിലാണ്. ഇവിടുത്തെ തൊഴിലാളികള്ക്കാണ് ഏറ്റവും കുറഞ്ഞ കൂലിയാണ് ലഭിക്കുന്നത്. ഖാദിവ്യവസായത്തെ വിപൂലീകരിക്കാനും മേഖലയില് തൊഴില് ചെയ്യുന്ന തൊഴിലാളികളുടെ കൂലി വര്ദ്ധിപ്പിക്കുവാനുള്ള നടപടി സ്വീകരിക്കും. കൈത്തറി വ്യവസായത്തിന്റെ സംരക്ഷണത്തിന് വേണ്ടിയും നീക്കങ്ങള് നടത്തും. കേരളത്തിലെ ആഭ്യന്തര, വിദേശമാര്ക്കറ്റുകളില് കൈത്തറിയുടെ സവിശേഷത നിലനിര്ത്തിക്കൊണ്ട് വ്യാപാരത്തെ മെച്ചപ്പെടുത്തും.
വേണ്ടത്ര വരുമാനം ലഭിക്കാത്തതിനാല് കായിക രംഗത്ത് പ്രതിഭകള് തുടര്ച്ചയായി നില്ക്കുന്നില്ല. ഇത് സംബന്ധിച്ച് പഠനവും പരിശോധനയും നടത്തും. കേരളത്തില് കായിരംഗത്തെ പ്രതിഭകള്ക്ക് വേണ്ടത്ര പ്രോത്സാഹനമോ അംഗീകാരമോ ലഭിക്കുന്നില്ലെന്ന് ഇവരില് നിന്നുതന്നെ പരാതി ലഭിച്ചിട്ടുണ്ട്. ഈ സാഹചര്യത്തില് നമ്മുടെ സംസ്ഥാനത്തെ കായികപ്രതിഭകളെ വളര്ത്തിയെടുക്കാന് എല്ലാ നടപടികളും സ്വീകരിക്കും. വിദ്യാഭ്യാസ മേഖലയില് കായിക പരിശീലനമെന്നത് ഉള്പ്പെടുത്തും.
കണ്ണൂര് വിമാനത്താവളം നിര്മ്മാണം ഉടന് പൂര്ത്തീകരിച്ച് ഒരു ഇന്റര്നാഷണല് എയര്പോര്ട്ടാക്കി രാജ്യത്തിന് സമര്പ്പിക്കും. വിമാനത്താവളത്തിന്റെ റണ്വെ നാലായിരം മീറ്ററായിരിക്കും. വ്യവസായരംഗത്ത് വരുന്ന പുതിയസംരഭകരെ എല്ലാവിധ സഹായങ്ങളും ഒരുക്കുമെന്നും അദ്ദേഹം പറഞ്ഞു. പ്രസ്ക്ലബ്ബ് പ്രസിഡന്റ് കെ.ടി.ശശി അധ്യക്ഷത വഹിച്ചു. എന്പിസി രഞ്ചിത്ത് സ്വാഗതം പറഞ്ഞു.
