പരവൂര്: മാനഭംഗശ്രമത്തിന് സിപിഎം ഏരിയായ കമ്മിറ്റി മെമ്പര് കൂടിയായ ഗ്രാമപഞ്ചായത്ത് അംഗത്തിനെതിരെ കേസെടുത്തു. അങ്കണവാടിയിലെ ആയയെ ജോലിസമയത്ത് കടന്നുകയറി മാനഭംഗപ്പെടുത്തുവാന് ശ്രമിച്ചെന്ന പരാതിയിലാണ് ചാത്തന്നൂര് പോലീസ് കേസെടുത്തത്. മുന് ചാത്തന്നൂര് പഞ്ചായത്ത് പ്രസിഡന്റ് കൂടിയായ എ. സുരേഷിനെതിരെയാണ് ബന്ധുവായ സ്ത്രീയുടെ പരാതിയില് കേസെടുത്തത്.
കഴിഞ്ഞ തിങ്കളാഴ്ച ഉച്ചയ്ക്ക് ഒന്നരയോടെയാണ് സംഭവം. ചാത്തന്നൂര് ഗ്രാമപഞ്ചായത്തിലെ ഞവരൂര് വാര്ഡിലെ മെമ്പറായ സുരേഷ് അടുത്ത വാര്ഡിലെ അങ്കണവാടിയിലെത്തിയാണ് മാനഭംഗശ്രമത്തിന് മുതിര്ന്നത്. അങ്കണവാടി ടീച്ചര് പഞ്ചായത്തില് ഓഡിറ്റിംഗിന് പോയെന്ന് ഉറപ്പ് വരുത്തിയതിന് ശേഷമാണ് ഇയാള് എത്തിയത്.
കുട്ടികളെ ഉറക്കിയതിന് ശേഷം പാത്രം കഴുകി നിന്ന ആയയെ ഇയാള് പീഡിപ്പിക്കാന് ശ്രമിക്കുകയായിരുന്നു. ഇയാളെ തള്ളി മാറ്റിയ ശേഷം ആയ അങ്കണവാടിക്ക് പുറത്തേക്കോടുകയായിരുന്ന. തുടര്ന്ന് സ്ത്രീ ഭര്ത്താവിനെ വിവരം അറിയിച്ചശേഷം ചാത്തന്നൂര് പോലീസില് പരാതി നല്കുകയായിരുന്നു. സ്ത്രീയുടെ മൊഴി രേഖപ്പെടുത്തിയ പോലീസ് ജാമ്യമില്ലാ വകുപ്പ് പ്രകാരം എ. സുരേഷിനെതിരെ കേസെടുത്തു. അതേ സമയം പ്രതിയെ അറസ്റ്റ് ചെയ്യരുതെന്ന നിര്ദ്ദേശവുമായി സിപിഎമ്മിന്റെ മുതിര്ന്ന നേതാക്കളും ഭരണകര്ത്താക്കളും സ്റ്റേഷനില് ബന്ധപ്പെട്ടിട്ടുണ്ടെന്ന ആരോപണം ശക്തമാണ്.
അതിനിടെ സംഭവത്തില് ശക്തമായ നടപടികള് വേണ മെന്ന ആവശ്യവുമായി ബിജെപി രംഗത്തെത്തി. അങ്കണവാടി ജീവനക്കാരിയെ മാനംഭംഗപ്പെടുത്താന് ശ്രമിച്ച സിപിഎം ഏരിയാ കമ്മിറ്റി അംഗവും മുന് പഞ്ചായത്ത് പ്രസിഡന്റും ഇപ്പോഴത്തെ വാര്ഡ് മെമ്പറുമായ എ. സുരേഷ്ബാബുവിനെ അറസ്റ്റ് ചെയ്യണമെന്ന് ബിജെപി പഞ്ചായത്ത് സമിതി ആവശ്യപ്പെട്ടു. പ്രതിക്കെതിരെ കേസെടുത്തിട്ടും അറസ്റ്റ് ചെയ്യാന് ശ്രമിക്കാത്ത പോലീസ് നിലപാടില് പ്രതിഷേധിക്കുന്നതായി നേതാക്കള് പറഞ്ഞു.
സ്ത്രീകള്ക്കെതിരെയുള്ള അക്രമത്തിന്റെ പേര് പറഞ്ഞ് അധികാരത്തിലെത്തിയ മുഖ്യമന്ത്രി പിണറായി വിജയനും പാര്ട്ടി നേതാക്കളും ഈ വിഷയത്തില് നിലപാട് വ്യക്തമാക്കണം. സംഭവത്തിന് ശേഷം പരസ്യമായി ഇറങ്ങി നടക്കുന്ന പ്രതിയെ അറസ്റ്റ് ചെയ്യാത്ത പക്ഷം പോലീസ് സ്റ്റേഷന്മാര്ച്ച് ഉള്പ്പടെയുള്ള സമര പരിപാടികളുമായി മുന്നോട്ട് പോകുമെന്ന് നേതാക്കള് മുന്നറിയിപ്പ് നല്കി.
ബിജെപി പഞ്ചായത്ത് സമിതി പ്രസിഡന്റ് ഉണ്ണി കളിയാകുളം അദ്ധ്യക്ഷത വഹിച്ചു. ജില്ലാ സെക്രട്ടറി ബി.ഐ. ശ്രീനാഗേഷ, മണ്ഡലം ജനറല് സെക്രട്ടറിമാരായ ജയപ്രശാന്ത്, ശ്രീകുമാര്, ജില്ലാ സമിതിയംഗം എസ്. സുരേഷ്, പഞ്ചായത്ത് സമിതി ജനറല് സെക്രട്ടറി അനി പാട്ടുപണ, നേതാക്കളായ മോഹനന്, ഉല്ലാസ്, ശരത്ചന്ദ്രന് എന്നിവര് സംസാരിച്ചു.
