ചെങ്ങന്നൂര്: നഗരത്തില് വ്യപകമായി തേക്കുകളില് കാണുന്ന പുഴുക്കള് ആശങ്കയ്ക്ക് വകയില്ലെന്ന് കൃഷിവകുപ്പ്. പ്രത്യേകതരം ഇലതീനി പുഴുക്കളാണ് ഇവയെന്ന് കൃഷി അസിസ്റ്റന്റ് ഡയറക്ടര് മേരി തോമസ് പറഞ്ഞു. ഇലഭക്ഷിച്ച് താഴെവീഴുന്ന പുഴുക്കള് പ്യൂപയായി മാറുകയും രണ്ടു ദിവസത്തിനുള്ളില് ശലഭങ്ങളായി തീരുകയും ചെയ്യും. ഇവ ചൊറിച്ചിലുകള് ഉണ്ടാക്കുന്നതോ വിഷമുള്ളതോ അല്ല.
വേനലിനു ശേഷം ഉണ്ടാകുന്ന മഴയത്താണ് ഇവയെ കാണപ്പെടുന്നത്. മറ്റു സ്ഥലങ്ങളിലേക്ക് അധികമായി വ്യാപിക്കാറുമില്ല. ഇവയെ നശിപ്പിക്കാന് ബാസിലസ് തുര്ഗിന്സിസ് എന്ന ഓര്ഗാനിക്ക് മിശ്രിതം തേക്കുമരങ്ങളുടെ ഇലകളില് തളിച്ചാല് നിയന്ത്രിക്കാനാകും. എന്നാല് വലിയമരങ്ങളുടെ ഇലകളില് തളിക്കുക ശ്രമകരമാണെന്നും മേരി തോമസ് പറഞ്ഞു.
കഴിഞ്ഞ കുറേ ദിവസങ്ങളായി നഗരസഭാ പ്രദേശത്ത് തേക്കു മരങ്ങളില് ഇലകള് ഭക്ഷിക്കുന്ന പുഴുക്കള് ജനങ്ങളില് ഭീതിപരത്തിയിരുന്നു. കൂട്ടത്തോടെ ഇലകള് ഭക്ഷിക്കുകയും മരങ്ങളില് നിന്ന് താഴെ വീണ് സമീപവാസികള്ക്ക് ബുദ്ധിമുട്ടുണ്ടാക്കുകയും ചെയ്തിരുന്നു.
