മാവേലിക്കര: വിലകൂടിയ മൊബൈല് ഫോണ് സമ്മാനത്തിന് അര്ഹരായിട്ടുണ്ടെന്ന് വിശ്വസിപ്പിച്ച് പണം തട്ടിയെടുക്കുന്ന സംഘം സജീവമാകുന്നു. ചെട്ടികുളങ്ങര, മാവേലിക്കര സ്വദേശികളായ നിരവധിപേര്ക്കാണ് ഇത്തരത്തില് പണം നഷ്ടമായിരിക്കുന്നത്.
കമ്പനിയുടെ പ്രതിനിധികള് എന്ന് അവകാശപ്പെട്ട് 8287244298 എന്ന മൊബൈല് നമ്പരില് നിന്നുമാണ് ആദ്യം ബന്ധപ്പെടുന്നത്. സാംസണ് ഗാലക്സിയുടെ വിലകൂടിയ മൊബൈല് ഫോണിന് സമ്മാനാര്ഹനായെന്നും പോസ്റ്റ് ഓഫീസില് എത്തുന്ന സമ്മാനം നേരിട്ടു വാങ്ങണമെന്നുമാണ് അറിയിക്കും. ഇതിനു ശേഷം സമ്മാനം അയച്ച ശേഷവും മേല്വിലാസത്തില് ലഭിക്കുന്ന ദിവസം രാവിലെയും ഫോണ് ചെയ്ത് വിവരം പറയും.
പോസ്റ്റ്ഓഫീസില് എത്തുമ്പോള് മൂവായിരം രൂപ അടയ്ക്കണം എന്ന് ആവശ്യപ്പെടും. വീണ്ടും നമ്പരില് ബന്ധപ്പെടുമ്പോള് വിലകൂടിയ മൊബൈല് ആണെന്നും ഇതിന്റെ ടാക്സ് ഇനത്തില് അടയ്ക്കേണ്ട തുകയാണെന്നും പറയും. പണം അടച്ച് പെട്ടി വാങ്ങി തുറന്നു നോക്കുമ്പോള് അതില് ശില്പ്പങ്ങളും മറ്റു വസ്തുക്കളുമാണ് ഉണ്ടാകുന്നത്. ആകര്ഷകമായിട്ടാണ് പെട്ടി പായ്ക്ക് ചെയ്യുന്നത് അതിനാല് ആര്ക്കും സംശയം തോന്നില്ല.
സായ് അമൃത്, ഡബ്ല്യുഇസഡ് 535/3 ശ്രീനഗര്, ന്യൂദല്ഹി എന്ന വിലാസത്തില് നിന്നുമാണ് ഇത് അയച്ചിരിക്കുന്നത്.
ഫോണ് നമ്പരില് ബന്ധപ്പെടുന്നത് മലയാളികളും നമ്പര് കേരളത്തില് നിന്നുമുള്ളതുമാണ്. അതിനാല് ഇത് വലിയ ഒരു നെറ്റ്വര്ക്കിന്റെ ഭാഗമാണെന്നാണ് സൂചന. ഫോണ് നമ്പര് സഹിതം പരാതി നല്കിയാലും ഇതില് തുടര് അന്വേഷണം നടത്താന് പോലീസ് തയ്യാറാകുന്നില്ലെന്നും ആക്ഷേപമുണ്ട്.
കബളിപ്പിക്കപ്പെട്ടവര് വീണ്ടും ബന്ധപ്പെടുമ്പോള് കമ്പനിക്ക് തെറ്റുപറ്റിയതാണെന്നും ഒരാഴ്ചയ്ക്കുള്ളില് പണം നല്കാമെന്നുമുള്ള മറുപടിയാണ് ലഭിക്കുന്നത്. പിന്നീട് ബന്ധപ്പെടുമ്പോള് ഒഴിവുകഴിവുകള് പറഞ്ഞ് ഇവര് രക്ഷപെടുന്നു.
വിലകൂടിയ മൊബൈലുകള് ഹരമായതിനാല് വിദ്യാര്ത്ഥികളാണ് കൂടുതലും തട്ടിപ്പിന് ഇരയാകുന്നത്.
