ചേര്ത്തല ഗവ. താലൂക്ക് ആശുപത്രിയില് വളപ്പില് വെള്ളക്കെട്ട് രൂക്ഷമായപ്പോള്.
വെള്ളക്കെട്ട് വ്യാപകം
ചേര്ത്തല: വേനല്മഴ കടുത്തു, നഗരം വെള്ളക്കെട്ടില്. രണ്ടു ദിവസമായി തുടരുന്ന തോരാതെയുള്ള മഴയില് നഗത്തിലെ താഴ്ന്ന പ്രദേശങ്ങള് വെള്ളത്തിനടിയിലായി. വിവിധ പ്രദേശങ്ങളില് വെള്ളക്കെട്ട് രൂപപ്പെട്ടതോടെ ജനജീവിതവും യാത്രയും ദുസഹമായി.
ഗവ. താലൂക്ക് ആശുപത്രി വളപ്പടക്കം നഗരത്തിലെ പ്രധാന കേന്ദ്രങ്ങളില് വെള്ളം നിറഞ്ഞു. ആശുപത്രി വളപ്പില് വെള്ളക്കെട്ട് രൂപപെട്ടതോടെ ചികിത്സ തേടിയെത്തുന്ന രോഗികളും ജീവനക്കാരും ദുരിതത്തിലായി.
നഗരത്തിന്റെ പടിഞ്ഞാറന് മേഖലയില് ഉള്പ്പെട്ട ഒന്ന്, രണ്ട്, മൂന്ന് വാര്ഡുകള്, വേളോര്വട്ടം, കളവംകോടം, റെയില്വേ സ്റ്റേഷന് പരിസരം, വടക്കേ അങ്ങാടിക്കവല, നഗരസഭ കാര്യലയത്തിന് സമീപം, ദേവീക്ഷേത്രത്തിന് പുറകുവശം, സ്വകാര്യബസ് സ്റ്റാന്ഡ്, നടക്കാവ് റോഡ്, കോടതിക്കവല, നഗരസഭ മാര്ക്കറ്റ്, സെന്റ് മേരീസ് സ്കൂള് പരിസരം, നെടുമ്പ്രക്കാട്, ചാലിപ്പള്ളി, വയലാര് പഞ്ചായത്തിലെ താഴ്ന്ന പ്രദേശങ്ങളായ ഒളതല, കൈതാരം കോളനി, എട്ടുപുയ്ക്കല്, ചാത്തന്ചിറ പാലത്തിന് സമീപ പ്രദേശങ്ങള്, നാഗംകുളങ്ങര, വയലാര് കുറിയമുട്ടം പാലത്തിന്റെ സമീപം, അര്ത്തുങ്കല്, തൈക്കല്, തീരമേഖല എന്നിവിടങ്ങളിലാണ് വെള്ളക്കെട്ട് ദുരിതം വിതയ്ക്കുന്നത്.
സ്വകാര്യ വ്യക്തികള് പൊതു തോടുകളും ജല നിര്ഗമന മാര്ഗങ്ങളും അനധികൃതമായി കൈയ്യേറി നികര്ത്തിയതാണ് പലമേഖലകളിലും വെള്ളക്കെട്ടിന് കാരണം. ജലാശയങ്ങളില് മാലിന്യങ്ങള് നിറഞ്ഞത് ജലനിര്ഗമനം തടസപ്പെട്ടതോടെ മാലിന്യങ്ങള് വെള്ളവുമായി കലര്ന്ന് റോഡില് പരന്നൊഴുകുകയാണ്.
മഴക്കാലമാരംഭിക്കുന്നതിന് മുന്പ് തോടുകളും കാനകളുമടക്കം ശുചീകരിച്ച് ജല നിര്ഗമനം സുഗമമാക്കുന്നതിനും മാലിന്യം നീക്കം ചെയ്യുന്നതിനുമുള്ള നടപടികള് മുന്കാലങ്ങളില് സ്വീകരിച്ചിരുന്നെങ്കിലും ഇത്തവണ ഇത്തരം പ്രവര്ത്തനങ്ങളെ അധികൃതര് അവഗണിച്ച മട്ടാണ്.
ദേശീയപാതയില് മരംവീണ്
ഗതാഗതം തടസപ്പെട്ടു
ദേശീയ പാതയില് മരം വീണുണ്ടായ ഗതാഗതക്കുരുക്ക്
അമ്പലപ്പുഴ: മരംവീണ് ദേശീയപാതയില് ഗതാഗതം തടസ്സപ്പെട്ടു. പുറക്കാട് ജങ്ഷനു വടക്ക് കാവില് ക്ഷേത്രത്തിനു സമീപമാണ് സംഭവം നടന്നത്. ഇന്നലെ ഉച്ചയ്ക്ക് 12.30ഓടെ റോഡിനു കിഴക്കുഭാഗത്തുനിന്ന അക്കേഷ്യാ മരം ദേശീയപാതയിലേക്ക് ഒടിഞ്ഞുവീഴുകയായിരുന്നു. ഈ സമയം റോഡിലൂടെ വാഹനങ്ങള് പോകാതിരുന്നതിനാല് അപകടമുണ്ടായില്ല. തുടര്ന്ന് അരമണിക്കൂറിലേറെ ഗതാഗതം തടസപ്പെട്ടു. ആലപ്പുഴയില് നിന്നും ഫയര്ഫോഴ്സ് സ്ഥലത്തെത്തിയാണ് മരം മുറിച്ചുമാറ്റി ഗതാഗതം പുനഃസ്ഥാപിച്ചത്.
മുഹമ്മയിലും പരിസരങ്ങളിലും ഡെങ്കിപ്പനി പടരുന്നു
മുഹമ്മ: മുഹമ്മയിലും പരിസര പ്രദേശങ്ങളിലും ഡെങ്കിപ്പനി പടര്ന്ന് പിടിക്കുന്നു. മുഹമ്മ സാമൂഹിക ആരോഗ്യ കേന്ദ്രത്തിലെ നേഴ്സ്,ഇലക്ട്രിസിറ്റി അസിസ്റ്റന്റ് എഞ്ചിനീയര് അടക്കം അഞ്ചുപേര്ക്ക് ഡെങ്കിപ്പനി സ്ഥിരീകരിച്ചു.
കോട്ടയം മെഡിക്കല് കോളേജിലും വിവിധ സ്വകാര്യ ആശുപത്രികളിലും പനിബാധിച്ചവര് ചികിത്സ തേടി. മുഹമ്മ ഇലക്ട്രിസിറ്റി ഓഫീസിന്റെ ടെറസിന് മുകളില് കെട്ടിക്കിടക്കുന്ന വെള്ളത്തിലും വൈദ്യുതി ഉപകരണങ്ങള് കൂട്ടിയിട്ടിരിക്കുന്ന ഭാഗത്തും ഡെങ്കിപ്പനി പരത്തുന്ന കൊതുകുകളും കൂത്താടികളും കണ്ടെത്തി.
രോഗം പരത്തുന്ന കൊതുകുകളെ നശിപ്പിക്കാന് ആരോഗ്യവകുപ്പ് പ്രതിരോധ പ്രവര്ത്തനങ്ങള് ആരംഭിച്ചു. ഒരുമാസം മുമ്പ് കഞ്ഞിക്കുഴിയിലും പരിസര പ്രദേശങ്ങളിലും ഡെങ്കിപ്പനി പടര്ന്ന് പിടിച്ചിരുന്നു.
ഇടിമിന്നലില് വ്യാപക നാശം
ആലപ്പുഴ: ഇന്നലെ ഉച്ചയ്ക്കുശേഷം ഉണ്ടായ ഇടിമിന്നലില് നഗരത്തിന്റെ വിവിധ പ്രദേശങ്ങളില് വ്യാപക നാശനഷ്ടം. ജില്ലാക്കോടതി പരിസരത്താണ് നാശനഷ്ടമുണ്ടായത്. വീടുകളിലെ വൈദ്യുതോപകരണങ്ങള് ഇടിമിന്നലേറ്റ് പ്രവര്ത്തന രഹിതമായി. ചില അഭിഭാഷക ഓഫീസുകളിലെ കമ്പ്യൂട്ടറുകളും വൈദ്യുതഉപകരണങ്ങളും നശിച്ചിട്ടുണ്ട്. ശക്തമായ വേനല് മഴയില് നഗരത്തിലെ ഓടകള് കവിഞ്ഞ് റോഡില് വെള്ളക്കെട്ടുകള് രൂപപ്പെട്ടിരിക്കുകയാണ്. നഗരത്തിന്റെ കിഴക്കന് പ്രദേശങ്ങളിലാണ് വെള്ളക്കെട്ട് രൂക്ഷമായി മാറിയിരിക്കുന്നത്.
