ചെങ്ങന്നൂര്: മലയാളഭാഷാചരിത്രത്തില് നിരണം പ്രസ്ഥാനത്തിനും കവികള്ക്കുമുള്ള സ്ഥാനം അദ്വിതീയമാണന്ന് ഒ.എസ്. ഉണ്ണികൃഷ്ണന് പറഞ്ഞു. ചെങ്ങന്നൂര് ദയാനന്ദഭവനില് വേദപണ്ഡിതന് നരേന്ദ്രഭൂഷണിന്റെ എഴുപത്തിയൊന്പതാം ജന്മദിനാഘോഷങ്ങളുടെ ഭാഗമായി കണ്ണശപ്രസ്ഥാനം എന്ന വിഷയത്തില് പ്രഭാഷണം നടത്തുകയായിരുന്നു അദ്ദേഹം.
ചീരാമന് മുതല് രാമപുരത്ത് വാര്യര് വരെ നീളുന്ന പാട്ടുകവികളില് രണ്ടാമൂഴക്കാരായിരുന്ന കണ്ണശ്ശന്മാരായിരുന്നു മഹാഭാരത-രാമായണ രചനകള്ക്ക് തുഞ്ചത്ത്എഴുത്തച്ഛന് വഴികാട്ടിയായത്. പാട്ടും മണിപ്രവാളവും സമന്വയിപ്പിച്ചുകൊണ്ടുള്ള പുതിയ കാവ്യഭാഷയിലൂടെ ജനസാമാന്യത്തിനുപകരിക്കത്തക്കവിധം പുരാണകഥകളെ പുനരാവിഷ്കരിക്കുന്നതിന് നിരണം കവികള്ക്കായി.
കാവ്യപ്രമേയത്തിന്റെ കാര്യത്തില് ജനകീയസ്വഭാവം നിലനിര്ത്തി ഭക്തിപ്രസ്ഥാനത്തെ പോഷിപ്പിക്കുവാനുള്ള യത്നത്തിന് മലയാളത്തില് തുടക്കം കുറിച്ചത് നിരണം കവികളായിരുന്നു. മലയന്കീഴ് മാധവപ്പണിക്കര്, വെള്ളാങ്ങല്ലൂര് ശങ്കരപ്പണിക്കര്, നിരണത്ത് രാമപ്പണിക്കര് എന്നിവരിലൂടെ കേരളഭാഷയില് പടര്ന്നു പന്തലിച്ച നിരണം പ്രസ്ഥാനത്തെ അവഗണിച്ചുകൊണ്ടുള്ള ഭാഷാചരിത്രപഠനം അര്ഥശൂന്യമാകും.
അനായാസ സുന്ദരമായ രചനാശൈലിയാല്, വ്യാസ-വാല്മീകീ ഹൃദയങ്ങളുമായി തന്മയീഭവിക്കുവാന് സഹൃദയര്ക്ക് അവസരമൊരുക്കിയ നിരണം കവികളുടെ ഭാഷാരൂപശില്പ്പ സൗന്ദര്യം അല്പ്പമെങ്കിലും നുകരുവാന് മലയാളിക്ക് അവസരമൊരുക്കുന്നതില് പണ്ഡിതന്മാരും ഭരണകര്ത്താക്കളും കാട്ടിയ ഉദാസീനതയെ ചരിത്രവഞ്ചനയെന്നുവേണം വിശേഷിപ്പിക്കുവാന്.
കവനകലയുടെ മര്മം തൊട്ടറിഞ്ഞ മഹാകവിയുടെ കരവിരുതും കാവ്യഭാവനയും ഒത്തുചേരുന്ന നിരണം കൃതികളെ പതിനാലാം നൂറ്റാണ്ടില് ആരംഭിച്ച സാംസ്കാരിക പുനരുദ്ധാനപ്രവര്ത്തനങ്ങളുമായി ബന്ധപ്പെടുത്തി മാത്രമേ നമുക്കു കാണാന് കഴിയൂ.
നിലനിന്നു പോന്ന വ്യവസ്ഥിതിയുടെ വല്ലായ്മകളെ ചോദ്യം ചെയ്യുന്നതില് മുന്ഗാമിയായിരുന്ന ചീരാമനോ, പിന്ഗാമിയായിരുന്ന എഴുത്തച്ഛനോ പ്രകടിപ്പിക്കാത്ത ആത്മധൈര്യം കണ്ണശ്ശക്കവികള് കാട്ടിയെന്നു മാത്രമല്ല പിന്നീട് അത്തരത്തിലൊരു ശബ്ദം മുഴങ്ങിക്കേള്ക്കാന് ഏതാണ്ട് നാലുനൂറ്റാണ്ടോളം നാം കാത്തിരിക്കേണ്ടതായും വന്നു.
വാല്മീകീ രാമായണം, വ്യാസഭാരതം, ഭാഗവത പുരാണം തുടങ്ങി സംസ്കൃതത്തിലെ പ്രമുഖ കൃതികള് കാവ്യഭംഗി ചോര്ന്നു പോകാതെയും അധ്യാത്മലക്ഷ്യം മുന്നിര്ത്തി ഭാഷയിലേക്ക് ആദ്യമായി പകര്ന്നുവെച്ചത് ഉഭയകവീശ്വരന്മാരായ നിരണം കവികളായിരുന്നുവെന്നും അദ്ദേഹം പറഞ്ഞു.
ഇന്ന് വൈകിട്ട് അഞ്ചിന് രാമായണം ചരിത്രകാലങ്ങളിലൂടെ എന്ന വിഷയത്തില് ഡോ. എം.ജി. ശശിഭൂഷണ് പ്രഭാഷണം നടത്തും.
