കണ്ണൂര്: കുടുംബശ്രീ ഉല്പന്നങ്ങള്ക്ക് വിപണി കണ്ടെത്തുന്നതിനായി ജില്ലാ കുടുംബശ്രീ മിഷന് നടപ്പാക്കിയ ഹോം ഷോപ്പ് പദ്ധതിയിലൂടെ ജില്ലയില് 1.75 കോടി രൂപയുടെ വില്പ്പന നടത്തി. 2015 ജൂണ് മാസം പ്രവര്ത്തനം തുടങ്ങിയ ജില്ലയിലെ ഹോം ഷോപ്പ് പദ്ധതിയില് ഇതിനകം 180 വനിതകള് ഹോം ഷോപ്പര്മാരായി പ്രവര്ത്തിക്കുന്നുണ്ട്.
കുടുംബശ്രീ സംരംഭകര് ഉല്പാദിപ്പിക്കുന്ന 46 ഇനം ഉല്പന്നങ്ങള് ഹോം ഷോപ്പിലും വിതരണം ചെയ്യുന്നുണ്ട്. മായം കലരാത്തതും ഗുണമേന്മയേറിയതുമായ നാടന് ഉല്പന്നങ്ങള് വീടുകളില് എത്തിച്ച് നല്കിയാണ് ഹോം ഷോപ്പ് പ്രവര്ത്തനം. പ്രത്യേക യൂനിഫോമും ഐഡന്റിറ്റിയും നേടിയ ഹോം ഷോപ്പര് വനിതകള്ക്ക് ജോലിയും സ്ഥിര വരുമാനവും ഈ പദ്ധതിയിലൂടെ ലഭിക്കുന്നതായി ജില്ലാമിഷന് കോ-ഓഡിനേറ്റര് കെ.ഒ.സ്വപ്ന അറിയിച്ചു. നിലവില് ജില്ലയില് മൂന്ന് ബ്ലോക്ക് പഞ്ചായത്ത് പരിധിയില് പ്രവര്ത്തിക്കുന്ന ഹോം ഷോപ്പ് പദ്ധതി കൂടുതല് കുടുംബശ്രീ സംരംഭങ്ങളേയും വനിതാ ഹോം ഷോപ്പ് പ്രവര്ത്തകരേയും ഉള്പ്പെടുത്തി ജില്ല മുഴുവന് വ്യാപിപ്പിക്കാനാണ് കുടുംബശ്രീ മിഷന് ലക്ഷ്യമിടുന്നത്. പ്രാദേശിക ഉല്പന്ന വിപണി വിപുലമാക്കുന്നതോടൊപ്പം വിഷരഹിത ഉല്പന്ന ഉപഭോഗം ശീലമാക്കുകയും ചെയ്യാന് ഹോം ഷോപ്പ് പ്രവര്ത്തനത്തില് ജനങ്ങള് സഹകരിക്കണമെന്നും ജില്ലാമിഷന് കോ-ഓഡിനേറ്റര് അറിയിച്ചു.
