ചേര്ത്തല: വേനല് മഴ ആരംഭിച്ചപ്പോള്ത്തന്നെ നഗരത്തില് പ്രധാന റോഡുകളില് വെള്ളക്കെട്ട് രൂക്ഷമായി. പല സ്ഥലത്തും ഇതുമൂലം ഗതാഗതം തടസ്സപ്പെടുന്നു. കാല്നടയാത്രയും സാധ്യമല്ലാതാകുന്നു. റോഡില് കെട്ടിക്കിടക്കുന്ന വെള്ളത്തില് മാലിന്യം നിറയുന്നതുമൂലം മാരക രോഗങ്ങള് പടര്ന്ന് പിടിക്കാനും സാധ്യതയേറെയാണ്.
ചേര്ത്തല ദേവിക്ഷേത്രത്തിന് വടക്കുവശത്ത് വെള്ളം ഒഴുകി പോകുവാന് ഉള്ള ചെറുതോട് നികത്തി കെട്ടിടം പണിതതിനാല് വെള്ളക്കെട്ട് രൂക്ഷമാണ്. ആശുപത്രിക്കവല, തെക്കേ അങ്ങാടി, വടക്കേ അങ്ങാടി, സ്വകാര്യ ബസ്സ്റ്റാന്ഡ്, ഗാന്ധി ബസാര് ഷോപ്പിങ്ങ് കോപ്ലക്സ് തുടങ്ങിയ സ്ഥലങ്ങളും നടക്കാവ് റോഡും ചെറിയ മഴയില്തന്നെ വെള്ളത്താല് നിറയും. ഈ വെള്ളത്തിലൂടെയാണ് സ്ക്കൂള് കുട്ടികള് ഉള്പ്പെടെ ആയിരങ്ങള് യാത്രചെയ്യുന്നത്.
വെള്ളക്കെട്ട് മാറ്റണമെന്നാവശ്യപ്പെട്ട് നിരവധി പരാതികള് വ്യാപാരികളും പ്രദേശവാസികളും നല്കിയെങ്കിലും നടപടിയായില്ല. വെള്ളക്കെട്ട് നീക്കാന് അടിയന്തര നടപടി സ്വീകരിക്കണമെന്ന് പ്രേദേശവാസികള് ആവശ്യപ്പെട്ടു.
