തുറവൂര്: വാട്ടര് അതോറിറ്റിയുടെ തുറവൂര് സെക്ഷന് ഓഫീസ് മാറ്റാനുളള അധികാരികളുടെ നീക്കത്തിനെതിരെ വ്യാപക പ്രതിഷേധം. വാട്ടര് അതോറിറ്റിയുടെ ചേര്ത്തല സബ് ഡിവിഷനു കീഴില് വരുന്ന അരൂര്, എഴുപുന്ന, കോടംതുരുത്ത്, കുത്തിയതോട്, തുറവൂര്, പട്ടണക്കാട്, കടക്കരപ്പളളി എന്നീ പഞ്ചായത്തുകളിലെ ഗുണഭോക്താക്കളുടെ സൗകര്യാര്ഥമാണ് തുറവൂരില് വാട്ടര് അതോറിറ്റിയുടെ സെക്ഷന് ഓഫീസ് അനുവദിച്ചത്.
തുറവൂര് പഞ്ചായത്ത് സൗജന്യമായി നല്കിയ മിനികോണ്ഫറന്സ് ഹാളിലാണ് ഓഫീസ് പ്രവര്ത്തിക്കുന്നത്. ഓഫീസ് പ്രവര്ത്തനമാരംഭിച്ചതോടെ ജനങ്ങള്ക്ക് പുതിയ വാട്ടര് കണക്ഷന് എടുക്കുന്നതിനും വെളളക്കരം അടക്കുന്നതിനും പരാതി നല്കുന്നതിനും മറ്റും സഹായകരമായിരുന്നു.
കുടിവെളള വിതരണം കാര്യക്ഷമമാക്കുന്നതിനും അറ്റകുറ്റപണികള് സമയബന്ധിതമായി പൂര്ത്തിയാക്കുന്നതിനും അധികൃതര്ക്ക് ഏറെ പ്രയോജനകരമായിരുന്നു. തുറവൂരില് ഓഫീസ് ആരംഭിക്കുന്നതിനു മുമ്പ് വാട്ടര് അതോറിറ്റിയുമായി ബന്ധപ്പെട്ട എല്ലാ ആവശ്യങ്ങള്ക്കും ചേര്ത്തലയിലെ ഓഫീസിലെത്തേണ് സ്ഥിതിയിലായിരുന്നു.
ഇത് മേഖലയിലെ ജനങ്ങള്ക്ക് സമയനഷ്ടത്തിനും സാമ്പത്തീക നഷ്ടത്തിനും കാരണമായിരുന്നു. ഇതിന് പരിഹാരമായാണ് ഇവിടെ ഓഫീസ് പ്രവര്ത്തനമാരംഭിച്ചത്. രൂക്ഷമായ കുടിവെള്ള ക്ഷാമം നേരിടുന്ന തീരദേശ പഞ്ചായത്തുകളാണ് ഓഫീസ് പരിധിയില് വരുന്നത്.
ഓരുവെള്ള ഭീഷണിയും ശുദ്ധജല സ്രോതസുകളുൂടെ വ്യാപകമായ മലിനീകരണവും കണക്കിലെടുത്താണ് ഇവിടെ ഓഫീസ് പ്രവര്ത്തനം തുടങ്ങാന് തീരുമാനമായത്. കെട്ടിടം സൗജന്യമായി നല്കിയതിനെ തദ്ദേശ സ്വയംഭരണ വകുപ്പ് ഓഡിറ്റ് വിഭാഗം എതിര്ത്തിരുന്നു. ഇക്കാരണത്താല് പഞ്ചായത്ത് ഒഴിപ്പിക്കല് നടപടി ആരംഭിച്ചിരിക്കുകയാണെന്നാണ് വിവരം. നിലവില് ഓഫീസ് പ്രവര്ത്തിക്കുന്ന കെട്ടിടത്തിന് വാടകയിനത്തില് ഭീമമായ തുകയാണ് ആവശ്യപ്പെട്ടിരിക്കുന്നത്. തുറവൂര് ഉള്പ്പെടെയുളള എല്ലാ പഞ്ചായത്തിലേയും ദാരിദ്ര രേഖക്ക് താഴെയളളവര്ക്ക് പൂര്ണ്ണമായും അല്ലാത്തവര്ക്ക് സര്ക്കാര് നിശ്ചയിച്ച സൗജന്യ നിരക്കിലും കുടിവെളളം എത്തിക്കുന്ന ജല അതോറിറ്റിയുടെ പ്രവര്ത്തനം തടസ്സപ്പെടുത്തുന്നതിലൂടെ ജനങ്ങള്ക്ക് ലഭിക്കുന്ന സര്ക്കാര് സേവനം ഇല്ലാതാക്കുന്നത് സ്വകാര്യ മേഖലയെ സഹായിക്കാനാണെന്ന് ആക്ഷേപമുണ്ട്.
ഇതിനെതിരെ ഉന്നത അധികാരികള്ക്കടക്കം പരാതി നല്കാനൊരുങ്ങുകയാണ് പ്രദേശവാസികള്.
