മാവേലിക്കര: ഉദ്യോഗസ്ഥരും ജനപ്രതിനിധികളും തെരഞ്ഞെടുപ്പ് തിരക്കിലായിരുന്നതിനാല് മഴക്കാല പൂര്വ്വ ശുചീരണ പ്രവര്ത്തനങ്ങള് പാളുന്നു. മെയ് മാസം പകുതിയോടെ ആരംഭിക്കേണ്ട മഴക്കാല പൂര്വ്വ ശുചീകരണ പ്രവര്ത്തനങ്ങള് ഇതുവരെ ആരംഭിച്ചിട്ടില്ല.
തെരഞ്ഞെടുപ്പ് ഫല പ്രഖ്യാപനങ്ങള് കഴിഞ്ഞെങ്കിലും ഉദ്യോഗസ്ഥരും ജനപ്രതിനിധികളും അതിന്റെ ആലസ്യത്തില് നിന്ന് ഇതുവരെ മുക്തരായിട്ടില്ല. പല പഞ്ചായത്തുകളിലും ഇതിന്റെ അവലോകന യോഗം പോലും ചേര്ന്നിട്ടില്ല. ചില സ്ഥലങ്ങളില് തൊഴിലുറപ്പ് പദ്ധതിയില് ഉള്പ്പെടുത്തി മഴക്കുഴികള് നിര്മ്മിക്കാന് തീരുമാനിച്ചെങ്കിലും ഇതിന്റെ പൂര്ണ്ണരൂപം വ്യക്തമായിട്ടില്ല.
ഓടകളിലെ മാലിന്യങ്ങള് നീക്കം ചെയ്തുള്ള ശുചീകരണം, റോഡുകളിലെയും മറ്റും വെള്ളക്കെട്ടുകള് ഒഴിവാക്കുക, കൊതുകു പെരുകുന്നത് തടയല്, ആരോഗ്യ ബോധവത്ക്കരണം, അപകടകരമായ മരങ്ങള് വെട്ടിമാറ്റല്, വൈദ്യുതി വിതരണ മേഖലയിലെ അറ്റകുറ്റപ്പണികള് തുടങ്ങി ഒന്നും ആരംഭിക്കാന് സാധിച്ചിട്ടില്ല.
ഓടകള് ശുചീകരിക്കാത്തതിനാല് കെട്ടിക്കിടക്കുന്ന വെള്ളത്തില് മാലിന്യങ്ങള് അഴുകി അസഹ്യമായ ദുര്ഗന്ധമാണ് ഇപ്പോള് തന്നെ അനുഭവപ്പെടുന്നത്. ഇക്കാര്യങ്ങള് ഏറ്റെടുത്ത് നടത്തേണ്ട പ്രാദേശിക ഭരണകൂടങ്ങള് ഇതുവരെ യാതൊരു നടപടികളും സ്വീകരിച്ചിട്ടില്ല. ജില്ലയില് കഴിഞ്ഞ വര്ഷം പനിബാധിച്ച് നിരവധി പേരാണ് മരിച്ചത്.
കാലവര്ഷം ആരംഭിക്കാന് ദിവസങ്ങള് മാത്രം അവശേഷിക്കെ അടിയന്തരമായി വാര്ഡ് തലത്തില് അവലോകന യോഗങ്ങള് ചേര്ന്ന് മഴക്കാല പൂര്വ്വ ശുചീകരണ പ്രവര്ത്തനങ്ങള് ആരംഭിക്കണമെന്നാണ് ആവശ്യമുയരുന്നത്.
