പാമ്പാടി: പഴയ പാത്രങ്ങള് വെളുപ്പിച്ചു നല്കാമെന്ന പേരില് വീട്ടിലെത്തിയ ശേഷം വീട്ടമ്മമാരെ കബളിപ്പിച്ചു സ്വര്ണം തട്ടിയെടുക്കുന്ന സംഘം ജില്ലയില് സജീവം. ഇതര സംസ്ഥാനക്കാരാണു തട്ടിപ്പിനു പിന്നില്. കോട്ടയം, ചിങ്ങവനം, മണര്കാട് തുടങ്ങിയ സ്ഥലങ്ങളിലെ വീട്ടമ്മമാര് തട്ടിപ്പിന് ഇരയായിട്ടുണ്ട്. മുംബൈയിലുള്ള ഒരു കമ്പനിയുടെ പരസ്യ പ്രചാരണാര്ഥം എന്നു പറഞ്ഞാണ് ഇവര് വീടുകളില് എത്തുന്നത്. പഴയ പാത്രങ്ങളോ വെള്ളി ആഭരണങ്ങളോ ഉണ്ടെങ്കില് നിറംകൂട്ടി നല്കാമെന്നു വീട്ടമ്മമാരോടു പറയും. കുങ്കുമ നിറത്തിലുള്ള ഒരു പൊടി വെള്ളത്തില് കലക്കി ലായനിയാക്കിയ ശേഷം ഇതില് മുക്കി നിറം കൂട്ടി തിരികെ നല്കും. വെള്ളം ചൂടാക്കാന് ഒരു ഹീറ്ററുമായാണു തട്ടിപ്പുകാരന് എത്തുന്നത്. പരസ്യ പ്രചാരണാര്ഥം ഇതു സൗജന്യ സേവനമാണെന്നും പറയും.
സ്വര്ണാഭരണങ്ങളും ഇപ്രകാരം ചെയ്യാമെന്നു തുടര്ന്നു പറയും. വീട്ടമ്മമാര് ഇതു വിശ്വസിച്ച് ആഭരണങ്ങള് നല്കും. ഹീറ്ററില് വെള്ളം ചൂടാക്കി പൊടി കലക്കി ലായനിയുണ്ടാക്കും. ഇതില് സ്വര്ണം മുക്കി തിരികെ നല്കുമ്പോള് കൂടുതല് നിറം ഉണ്ടാകും. തൂക്കം കുറഞ്ഞ വിവരം പിന്നീടാണ് അറിയുക. സംശയം തോന്നിയ രണ്ടു പേര് പിന്നീടു മാല തൂക്കി നോക്കിയപ്പോഴാണു തട്ടിപ്പു ബോധ്യപ്പെട്ടതെന്നു മണര്കാട്ടെ ജ്വല്ലറി ഉടമ പറഞ്ഞു.
മണര്കാട് തട്ടിപ്പിനിരയായവര് ഒരു പവന് വരുന്ന മാലയാണു ലായനിയില് മുക്കാന് നല്കിയത്. തിരികെ ലഭിച്ചപ്പോള് മാല അര പവനേയുള്ളു. അഞ്ചു പവന്റെ മാല മുക്കാന് നല്കിയ ചിങ്ങവനം സ്വദേശിനിയുടെ മാല ഇപ്പോള് നാലര പവനായി. തട്ടിപ്പിനിരയായവര് പൊലീസിനെ സമീപിച്ചിട്ടില്ല. കൂടുതല് പേര് കബളിപ്പിക്കപ്പെടാതിരിക്കാനാണു വിവരം വെളിപ്പെടുത്തുന്നതെന്ന് അബദ്ധം പറ്റിയ ഒരു വീട്ടമ്മ പറഞ്ഞു. തട്ടിപ്പു നടത്തിയ സ്ഥലങ്ങളില് നിന്നെല്ലാം ആഭരണങ്ങള് മുക്കി എടുത്ത ശേഷം വെള്ളം പാത്രത്തിലാക്കി കൊണ്ടുപോകുകയായിരുന്നു.
