ന്യൂദല്ഹി: 2014ലെ ലോക്സഭാ തെരഞ്ഞെടുപ്പ് ഫലത്തിന്റെ പ്രധാന സവിശേഷത രാജ്യത്തിന്റെ നാല് അതിര്ത്തികളിലും ബിജെപി സ്ഥാനാര്ത്ഥികളില് വിജയിച്ചു കയറിയെന്നതായിരുന്നു. രണ്ടുവര്ഷങ്ങള്ക്കിപ്പുറം വീണ്ടും അതിര്ത്തികളില് ഉള്പ്പെടെ വിജയം ആവര്ത്തിച്ച് ബിജെപി രാജ്യത്തിന്റെ എല്ലാ മേഖലകളിലും സാന്നിധ്യം അറിയിക്കുകയാണ്. കോണ്ഗ്രസിനെ ബഹുദൂരം പിന്നിലേക്കാക്കി യഥാര്ത്ഥ ദേശീയ പാര്ട്ടിയായി ബിജെപി ഉയര്ന്നുവന്നതോടെ നരേന്ദ്രമോദി സര്ക്കാരിന്റെ രണ്ടാം വര്ഷം ഉജ്വലമായി ആഘോഷിക്കാനാണ് പാര്ട്ടി തീരുമാനം. ബിജെപി കേന്ദ്രആസ്ഥാനത്ത് ചേര്ന്ന പാര്ലമെന്റ് ബോര്ഡ് യോഗത്തില് ഇതുസംബന്ധിച്ച തീരുമാനം കൈക്കൊണ്ടിട്ടുണ്ട്.
തെരഞ്ഞെടുപ്പ് നടന്ന അഞ്ചു സംസ്ഥാനങ്ങളിലെയും ജനങ്ങള് ബിജെപിക്ക് നല്കിയ പിന്തുണയ്ക്ക് നന്ദി അറിയിച്ച് പാര്ലമെന്ററി ബോര്ഡ് യോഗം പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള കേന്ദ്രസര്ക്കാരിന്റെ പ്രവര്ത്തന മികവാണ് സംസ്ഥാനങ്ങളിലെ തെരഞ്ഞെടുപ്പ് നേട്ടത്തിന് പിന്നിലെന്നും വിലയിരുത്തി. കേരളത്തിലെയും ബംഗാളിലെയും തമിഴ്നാട്ടിലെയും പാര്ട്ടി കാര്യകര്ത്താക്കളെ അഭിനന്ദിച്ച പാര്ലമെന്ററി ബോര്ഡ് ആസാമില് നേടിയ വലിയ വിജയത്തെ അഭിമാനകരമായ നേട്ടമായി വിലയിരുത്തി. ഝാര്ഖണ്ഡ്, ഗുജറാത്ത്, മേഘാലയ എന്നിവിടങ്ങളില് നടന്ന ഉപതെരഞ്ഞെടുപ്പുകളിലും ബിജെപി സ്ഥാനാര്ത്ഥികള് വിജയിച്ചിട്ടുണ്ട്.
പത്തുശതമാനത്തില് നിന്നും 42 ശമതാനമായി ആസാമില് വോട്ട് വര്ദ്ധിപ്പിച്ചപ്പോള് സീറ്റെണ്ണം അഞ്ചില് നിന്നും 86 ആയി ഉയര്ന്നു. നാലില് നിന്നും 11 ആയി വോട്ട് ശതമാനം ബംഗാളില് ഉയര്ന്നപ്പോള് 6 സീറ്റുകളില് വിജയിക്കാനും സാധിച്ചു. കേരളത്തില് 6ല് നിന്നും 15 ശതമാനമായി വോട്ട് വര്ദ്ധിക്കുകയും ചരിത്രത്തിലാദ്യമായി അക്കൗണ്ട് തുറക്കാന് സാധിക്കുകയും ചെയ്തു.തമിഴ്നാട്ടിലെയും പോണ്ടിച്ചേരിയിലെയും വോട്ട് ശതമാനത്തിലും വലിയ ഉയര്ച്ച ഉണ്ടായി.
ബിജെപിയുടെ പ്രത്യയശാസ്ത്രത്തിനും കേന്ദ്രസര്ക്കാരിന്റെ സദ്ഭരണത്തിനും ജനങ്ങള് നല്കിയ അംഗീകാരമാണ് വിജയമെന്ന് ബിജെപി വിലയിരുത്തി. കാശ്മീര് മുതല് കേരളം വരെയും കച്ച് മുതല് കാമരൂപം വരെയും ബിജെപി സാന്നിധ്യമായിക്കഴിഞ്ഞു. രാജ്യത്തെ രാഷ്ട്രീയരംഗത്തിന്റെ കേന്ദ്രബിന്ദുവായി ബിജെപി വളര്ന്നിരിക്കുന്നു. ബിജെപി പാര്ലമെന്ററിബോര്ഡ് വിലയിരുത്തി.
