ഇരിട്ടി: പേരാവൂര് മണ്ഡലത്തിന്റെ വിവിധ മേഖലകളില് ബിജെപി പ്രവര്ത്തകര്ക്ക് നേരെ സിപിഎം അക്രമം. അക്രമങ്ങളില് പരിക്കേറ്റ അഞ്ചോളം പേരെ വിവിധ ആശുപത്രികളില് പ്രവേശിപ്പിച്ചു.
തെരഞ്ഞെടുപ്പ് ഫല ഖ്യാപനം വന്നതോടെയാണ് ഇവിടങ്ങളില് അക്രമസംഭവങ്ങള് അരങ്ങേറിയത്. ചീങ്ങാക്കുണ്ടം സ്വദേശികളായ മനിയേരി ഷിജു (30), സഹോദരന് ഷൈജു (27) എന്നിവരെ തലക്കടിയേറ്റ് സാരമായ പരിക്കുകളോടെ തലശ്ശേരി ഇന്ദിരാഗാന്ധി കോ.ഓപ്പ. ആശുപത്രിയില് പ്രവേശിപ്പിച്ചു. ബിജെപി യുടെ ആഹ്ലാദപ്രകടനത്തിനായി പോകാന് ഒരുങ്ങവേ ഒരുകൂട്ടം സിപിഎം പ്രവര്ത്തകര് സംഘംചേര്ന്ന് ഇവരെ മര്ദ്ദിക്കുകയായിരുന്നുവത്രെ. നുച്ചിയാട് നെല്ലൂര് സ്വദേശി മനീഷ് (22), തില്ലങ്കേരി ചാളപ്പറമ്പ് സ്വദേശി ശ്രീജിത്ത്, ഉളിക്കല് പരിക്കളം സ്വദേശി ആനന്ദ് (21) എന്നിവര്ക്കും സിപിഎം അക്രമത്തില് പരിക്കേറ്റു. ഇവരെ ഇരിട്ടി താലൂക്ക് ആശുപത്രിയില് പ്രവേശിപ്പിച്ചു. മനീഷിനെ ഇവിടെ ബസ് സ്റ്റോപ്പില് നില്ക്കവേയാണ് ഒരു സംഘം അക്രമിക്കുന്നത്. കല്ലുകൊണ്ടുള്ള അടിയില് തലക്കും കണ്ണിനും പുറത്തും പരിക്കേറ്റു. മനീഷിന്റെ ആയിരം രൂപയും മൊബൈല് ഫോണും നഷ്ടപ്പെട്ടു.
പെരിങ്കരി സ്വദേശി വീടിനു സമീപം ഇന്റര്ലോക്ക് കമ്പനി നടത്തുന്ന സുരേന്ദ്രന്റെ ഇഷ്ടികക്കമ്പനിക്കും വീടിനും നേരെ ഒരു സംഘം സിപിഎം പ്രവര്ത്തകര് അക്രമം നടത്തി. തെറിവിളിച്ചു കൊണ്ടെത്തിയ സംഘം ഇഷ്ടിക കമ്പനിയിലേക്ക് പടക്കം വലിച്ചെറിഞ്ഞു. വീടിനു നേരെ കല്ലേറും നടത്തി. വീടിന്നു മുന്പിലുണ്ടായിരുന്ന പൂച്ചെടികള് പാടെ പിഴുതുമാറ്റി. ഇഷ്ടികകള് തകര്ത്ത്. ബഹളം കേട്ട് പുറത്തേക്ക് ഇറങ്ങിവന്ന സുരേന്ദ്രന്റെ പ്രായമായ അമ്മക്ക് നേരെയും തെറിവിളി നടത്തി. ഇന്നലെ സന്ധ്യയോടെയായിരുന്നു അക്രമം.
