കുന്ഷാന് (ചൈന): വനിതകള്ക്കായുള്ള യൂബര് കപ്പ് ബാഡ്മിന്റണ് ചാമ്പ്യന്ഷിപ്പില് ഇന്ത്യക്ക് തുടര്ച്ചയായ രണ്ടാം വിജയം. ജര്മ്മനിയെയാണ് ഇന്ത്യ ഇന്നലെ 5-0ന് തകര്ത്തത്. ഗ്രൂപ്പ് ഡിയില് രണ്ട് വിജയങ്ങളുമായി ഇന്ത്യ ക്വാര്ട്ടര് ഫൈനലിലെത്തി. മൂന്ന് സിംഗിള്സിലും രണ്ട് ഡബിള്സ് മത്സരങ്ങളിലും ഇന്ത്യക്ക് വെല്ലുവിളി ഉയര്ത്താന് ജര്മ്മന് വനിതകള്ക്കായില്ല.
സിംഗിള്സില് ലോക എട്ടാം നമ്പറും ഇന്ത്യന് സൂപ്പര്താരവുമായ സൈന നെഹ്വാള് 21-10, 21-15 എന്ന സ്കോറിന് ഫാബിനെ ഡിപെരസിനെയും പി.വി. സിന്ധു 21-12, 21-7 എന്ന ക്രമത്തില് ലൂസി ഹീമിനെയും ഋതുവിക ശിവാനി ഗദ്ദെ 21-15, 21-5 എന്ന സ്കോറിന് യുവോനെ ലീയെയും പരാജയപ്പെടുത്തി.
ഡബിള്സില് ജ്വാല ഗുട്ട-അശ്വിനി പൊന്നപ്പ സഖ്യം 21-8, 14-21, 21-9 എന്ന സ്കോറിന് ലിന്ഡ ഫഌ-ലാറാ സഖ്യത്തെ പരാജയപ്പെടുത്തിയപ്പോള് ശിഖി റെഡ്ഡി-പി.വി. സിന്ധു സഖ്യം 22-20, 19-21, 21-18 എന്ന ക്രമത്തില് ഹിസബല് ഹെറിട്രിച്ച്-ഫ്രാന്സിസ്ക വോക്മാന് സഖ്യത്തെയും തകര്ത്തു. ഗ്രൂപ്പ് ഡിയിലെ അവസാന മത്സരത്തില് ജപ്പാനാണ് ഇന്ന് ഇന്ത്യയുടെ എതിരാളികള്.
അതേസമയം പുരുഷന്മാരുടെ തോമസ് കപ്പില് ഇന്ത്യ തുടര്ച്ചയായ രണ്ടാം പരാജയം ഏറ്റുവാങ്ങി. ഹോങ്കോങ്ങാണ് ഇന്ത്യയെ 3-2ന് പരാജയപ്പെടുത്തിയത്. സിംഗിള്സില് സായി പ്രണീതും സൗരഭ് വര്മ്മയും വിജയം കണ്ടപ്പോള് അജയ് വര്മ്മ പരാജയപ്പെട്ടു. ഡബിള്സിലും ഇന്ത്യന് ജോഡികള് പരാജയം രുചിച്ചു. കഴിഞ്ഞ ദിവസം ഇന്ത്യന് പുരുഷന്മാര് തായ്ലന്ഡിനോടും 3-2ന് പരാജയപ്പെട്ടിരുന്നു. ഗ്രൂപ്പ് ബിയിലെ അവസാന മത്സരത്തില് ഇന്ത്യ ഇന്ന് ഇന്തോനേഷ്യയെ നേരിടും.
