ഒരുക്കങ്ങള്‍ പൂര്‍ത്തിയായി, നാളെ ഏഴ് മണി മുതല്‍ പോളിംഗ്

ഇടുക്കി: ജില്ലയില്‍ നിയമസഭാ മണ്ഡലങ്ങളിലേക്ക് മെയ് 16ന് നടക്കുന്ന പൊതു തിരഞ്ഞെടുപ്പ് സ്വതന്ത്രവും, നീതിപൂര്‍വ്വവും സമാധാനപരവുമായി നടത്തുന്നതിനുള്ള എല്ലാ ക്രമീകരണങ്ങളും പൂര്‍ത്തിയായിക്കഴിഞ്ഞു. നാളെ രാവിലെ ഏഴ് മണിമുതല്‍ വൈകിട്ട് ആറുവരെയാണ് പോളിംഗ്. ജനങ്ങള്‍ക്ക് അവരുടെ വിലയേറിയ സമ്മതിദാനാവകാശം സ്വതന്ത്രവും നിര്‍ഭയവുമായ രീതിയില്‍ നിറവേറ്റാന്‍ എല്ലാ സൗകര്യങ്ങളും ഏര്‍പ്പെടുത്തിയിട്ടുന്നെ് ജില്ലാ തിരഞ്ഞെടുപ്പ് ഓഫീസറും ജില്ലാകലക്ടറുമായ ഡോ.എ. കൗശിഗന്‍ പറഞ്ഞു. ജില്ലയിലെ ഇടുക്കി, ഉടുമ്പന്‍ചോല, പീരുമേട്, തൊടുപുഴ, ദേവികുളം എന്നീ അഞ്ച് നിയോജക മണ്ഡലങ്ങളിലേക്കാണ് വോട്ടെടുപ്പ് നടക്കുന്നത്. ആകെ 41 സ്ഥാനാര്‍ത്ഥികളാണ് മത്സരിക്കുന്നത്. ആകെ 887302 വോട്ടര്‍മാരാണ് നാളെ പോളിംഗ് ബൂത്തിലേക്കെത്തുക. ഇതില്‍ 436988 പേര്‍ പുരുഷന്‍മാരാണ്. 449057 പേര്‍ സ്ത്രീ വോട്ടര്‍മാരാണ്. 94 ഓവര്‍സീസ് വോട്ടേഴ്‌സും 1169 സര്‍വ്വീസ് വോട്ടേഴ്‌സും ജില്ലയിലുണ്ട്.