തലശ്ശേരി: ജനറല്‍ ആശുപത്രിയിലെ പോസ്റ്റ് ഓപ്പറേറ്റീവ് വാര്‍ഡില്‍ അതിക്രമിച്ച് കടന്ന് ഡ്യൂട്ടി നെഴ്‌സിന്റെ പടമെടുക്കാന്‍ ശ്രമിക്കുകയും ഔദ്യോഗിക കൃത്യ നിര്‍വ്വഹണം തടസ്സപ്പെടുത്തുകയും ചെയ്തു എന്ന പരാതിയില്‍ നാദാപുരം പോലീസ് സ്റ്റേഷനിലെ സീനിയര്‍ സിവില്‍ പോലീസ് ഓഫീസര്‍ രതീശനെതിരെ തലശ്ശേരി പോലീസ് കേസെടുത്തു. കഴിഞ്ഞ ഫെബ്രൂവരി 16നാണ് പരാതിക്കാധാരമായ സംഭവം. പോലീസുകാരനെതിരെ അന്ന് തന്നെ വനിതാ നെഴ്‌സ് തലശ്ശേരി പോലീസില്‍ പരാതി നല്‍കിയെങ്കിലും കേസെടുത്തിരുന്നില്ല. എന്നാല്‍ രതീശന്റെ പരാതി പ്രകാരം നെഴ്‌സും രണ്ട് സെക്യൂരിറ്റി സ്റ്റാഫിനെതിരെയും പോലീസ് കേസെടുക്കുകയും സെക്യൂരിറ്റി സ്റ്റാഫിന്റെ അറസ്റ്റ് രേഖപ്പെടുത്തി ജാമ്യത്തില്‍ വിട്ടയക്കുകയും ചെയ്തിരുന്നു. ഇതിനെതിരെ വിമുക്ത ഭടന്മാരും ആശുപത്രി ജീവനക്കാരും പ്രത്യേകം പ്രത്യേകം പ്രക്ഷോഭ പരിപാടികള്‍ സംഘടിപ്പിക്കുകയും ചെയ്തിരുന്നു. ഏപ്രില്‍ 11ന് പോലീസുകാരന്റെ പേരില്‍ നടപടി സ്വീകരിക്കണമെന്നും നെഴ്‌സിനും സെക്യൂരിറ്റി ജീവനക്കാര്‍ക്കുമെതിരെയുള്ള കള്ളക്കേസ് പിന്‍വലിക്കണമെന്നുമാവശ്യപ്പെട്ട് രൂപീകരിച്ച ആക്ഷന്‍ കമ്മിറ്റി രാപകല്‍ സമരവും സംഘടിപ്പിച്ചിരുന്നു. ഇത്തരം പ്രക്ഷോഭങ്ങള്‍ക്ക് ഒടുവിലാണ് കഴിഞ്ഞ ദിവസം പോലീസുകാരനെതിരെ ടൗണ്‍ പോലീസ് കേസെടുത്തത്. വാഹന അപകടത്തില്‍ പരിക്കേറ്റ് ചികിത്സയില്‍ കഴിയുകയായിരുന്ന നാദാപുരം സ്വദേശിയുടെ മൊഴി രേഖപ്പെടുത്താനാണ് രതീശന്‍ ഓപ്പറേഷന്‍ വാര്‍ഡില്‍ എത്തിയത്. സംഭവം ഏറെ വിവാദമായി തീരുകയും ചെയ്തിരുന്നു.
ജനറല്‍ ആശുപത്രിയില്‍ അതിക്രമം: ഒടുവില്‍ പോലീസുകാരനെതിരെ കേസെടുത്തു
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.