ഈ അടുത്തകാലങ്ങളില്, പതിവുശൈലിയായി തീര്ന്നുകഴിഞ്ഞിട്ടുള്ള ഒരേര്പ്പാടാണല്ലോ വാക്കൗട്ട്! നിയമസഭയെക്കുറിച്ചും ലോക്സഭയെ സംബന്ധിച്ചും പറയത്തക്ക വിവരമൊന്നും ഭാഗ്യത്തിന് സ്വായത്തമാക്കിയിട്ടില്ലാത്ത സാധാരണജനത്തിനുപോലും ലജ്ജയും പുച്ഛവും മാത്രം തോന്നുന്നതരത്തിലുള്ള കാരണങ്ങളുടെ നാമത്തിലായിരിക്കും നമ്മുടെ ജനപ്രതിനിധികള് പലപ്പോഴും വാക്കൗട്ട് നടത്താറുള്ളത്.
ഈ വരുന്ന അസംബ്ലി തെരഞ്ഞെടുപ്പില് വോട്ടിനുവേണ്ടി സമ്മതിദായകരെ സമീപിക്കുന്ന വികസന-സേവനദാഹികളോട്, അവര് ഏത് പാര്ട്ടിയുടെ ശിങ്കിടിയായാലും, യാതൊരു കാരണവശാലും വാക്കൗട്ട് നടത്തുകയില്ലെന്ന് രേഖാമൂലം ഉറപ്പുതന്നാല് മാത്രമേ വോട്ടുനല്കൂ എന്ന് കറതീര്ത്തു പറയുവാനുള്ള തന്റേടം വോട്ടര്മാര് പ്രകടിപ്പിക്കുകതന്നെവേണം.
ഏതെങ്കിലും വിഷയത്തില് എതിര്പ്പോ അഭിപ്രായാന്തരമോ പ്രതിഷേധമോ ഉണ്ടെങ്കില് അത് പ്രകടിപ്പിക്കേണ്ടത് സഭക്കുള്ളില് ഇരുന്നുകൊണ്ടുതന്നെ ആയിരിക്കണമെന്ന നിര്ബന്ധം വോട്ടര്മാരുടെ ഭാഗത്തുനിന്നും ഉണ്ടായേ തീരൂ. ഇത്രയെങ്കിലും ചെയ്യാതെ വോട്ടു രേഖപ്പെടുത്തുന്നത് ആത്മവഞ്ചനയാണെന്നു പറയേണ്ടിവരും.
പനത്താഴം, കൊച്ചി
