തെരഞ്ഞെടുപ്പ് അടുത്തതോടെ എല്ലാ രാഷ്ട്രീയ കക്ഷികളും പ്രകടന പത്രിക തയ്യാറാക്കുന്ന തിരക്കിലാണ്. പ്രകടനപത്രികയില് ഉള്പ്പെടുത്തേണ്ടതായ ചില വിഷയങ്ങള്:
കേരളത്തിന്റെ ‘രോഗാതുരത’ ദേശീയ ശരാശരിയേക്കാള് രണ്ടര ഇരട്ടിയിലധികമാണെന്ന് ഈയിടെ ഒരു പഠനത്തില് വെളിപ്പെട്ടു. ആറരക്കോടി ഭാരതീയര് ചികിത്സിച്ചു പാപ്പരായതായി കേന്ദ്രസര്ക്കാരിന്റെ പഠനവും പുറത്തുവന്നത് ഈയിടെയാണ്. ആരോഗ്യ മേഖലയ്ക്ക് മികച്ച കരുയതല് പദ്ധതികള് വേണം. കീടനാശിനികള് നിരോധിക്കുമെന്ന് എല്ലാ രാഷ്ട്രീയപാര്ട്ടികളും ജനങ്ങള്ക്ക് പ്രകടനപത്രികയിലൂടെ ഉറപ്പുനല്കണം. സുരക്ഷിത ഭക്ഷണം ഉറപ്പുവരുത്തുമെന്നും ഭക്ഷ്യസുരക്ഷാ വകുപ്പിനെ ശക്തിപ്പെടുത്തി സ്വതന്ത്രമായി പ്രവര്ത്തിക്കാന് അനുവദിക്കുമെന്നും വ്യക്തമായി നയപ്രഖ്യാപനം നടത്തണം. ജീവന് രക്ഷിക്കേണ്ട ഔഷധങ്ങള് ജീവനു ഭീഷണി ഉയര്ത്തുന്ന സാഹചര്യം ഒഴിവാക്കുമെന്നും ഈ രംഗത്ത് നിരന്തര പരിശോധനകള് നടത്തി ഔഷധരംഗം ശുദ്ധീകരിക്കുമെന്ന് ജനങ്ങള്ക്ക് വാഗ്ദാനം നല്കണം.
രാസവളങ്ങളുടെ ഉപയോഗം പടിപടിയായി കുറച്ചുകൊണ്ടുവരുമെന്നും കേരളത്തെ ജൈവകൃഷി സംസ്ഥാനമായി പ്രഖ്യാപിക്കുമെന്നും ഉറപ്പുനല്കേണ്ടതുണ്ട്. ജനിതകമാറ്റം വരുത്തിയ വിളകള് പരീക്ഷണാര്ത്ഥം പോലും കൃഷി ചെയ്യാന് അനുവാദിക്കരുത്.
”വ്യവസായവല്ക്കരിക്കുക അല്ലെങ്കില് നശിക്കുക” എന്ന പഴയ മുദ്രാവാക്യം തിരുത്തിയെഴുതി മണ്ണിനെയും മനുഷ്യനെയും പരിസ്ഥിതിയെയും സംരക്ഷിക്കുന്ന കൃഷിക്കും കര്ഷകനും പ്രാധാന്യം നല്കുന്ന നയം പ്രഖ്യാപിക്കണം. സമസ്ത ജീവജാലങ്ങളുടെയും നിലനില്പ്പ് കൃഷിയെ ആശ്രയിച്ചായതിനാല് ഏറ്റവും മുന്തിയ പരിഗണന കൃഷിക്കു തന്നെ നല്കണം. പ്രകടനപത്രിക കൃഷി-കര്ഷക സൗഹൃദമാകണമെന്നു സാരം.
കെ.വി. സുഗതന്
ആലപ്പുഴ
