ന്യൂദല്ഹി: രണ്ടു ദിവസത്തെ സന്ദര്ശനത്തിന് കേന്ദ്ര വിദേശകാര്യ മന്ത്രി സുഷമ സ്വരാജ് ഇറാനിലെത്തി. അവിടുത്തെ ഭാരത വംശജരുടെ സമൂഹവുമായി കൂടിക്കാഴ്ച നടത്തിയ അവര് ഇറാനിലെ സിഖ് ഗുരുദ്വാരയിലും ദര്ശനം നടത്തി.
എണ്ണ, വ്യാപാരം തുടങ്ങിയ മേഖലകളില് ഇരുരാജ്യങ്ങളും തമ്മിലുള്ള സഹകരണം ശക്തമാക്കുന്നതിന് സന്ദര്ശനം വഴിയൊരുക്കുമെന്നാണ് പ്രതീക്ഷിക്കുന്നത്.
ശനിയാഴ്ച തലസ്ഥാനമായ ടെഹ്റാനിലെത്തിയ സുഷമ അവിടുത്തെ ഭാരതീയ വിദ്യാലയത്തില് സന്ദര്ശനം നടത്തി.
ഭാരതീയ വിദ്യാര്ത്ഥികളുമായുള്ള കൂടിക്കാഴ്ച പുതിയ ഊര്ജ്ജം നല്കിയെന്ന് സന്ദര്ശനവേളയില് അവര് അറിയിച്ചു. അതേസമയം ഭാരതീയ സമൂഹവും ഇറാനിയന് നേതൃത്വവുമായി നിലനില്ക്കുന്ന ആശങ്കള് സന്ദര്ശനവേളയില് ഉന്നയിക്കും. ഷിയ മുസ്ലിം സമുദായങ്ങളില് ഉള്പ്പെടുന്നവരാണ് ഇറാനിലെ ഭൂരിഭാഗം ജനവിഭാഗങ്ങള്. പ്രധാനമന്ത്രി നരേന്ദ്ര മോദിയുടെ രണ്ടാഴ്ചത്തെ സൗദി അറേബ്യ സന്ദര്ശനത്തിനുശേഷമാണ് വിദേശകാര്യമന്ത്രിയുടെ ഇറാന് പര്യടനം.
ഇരുരാജ്യങ്ങളും തമ്മിലുള്ള നയതന്ത്ര ബന്ധം വളര്ത്തിയെടുക്കുന്നതിനും എണ്ണ ഇടപാടുമായി ബന്ധപ്പെട്ട പുതിയ പദ്ധതികള് ആവിഷ്ക്കരിക്കാനും സന്ദര്ശനം മുതല്ക്കൂട്ടാവുമെന്നാണ് പ്രതീക്ഷിക്കുന്നത്. അതേസമയം സൗദിയുമായി ശീതസമരത്തിലുള്ള ഇറാന് സന്ദര്ശിക്കാനുള്ള വിദേശകാര്യ മന്ത്രിയുടെ തീരുമാനത്തിന് വന് രാഷ്ട്രീയ പ്രാധാന്യമാണ് നല്കപ്പെടുന്നത്.
കഴിഞ്ഞയാഴ്ച പെട്രോളിയം മന്ത്രി ധര്മേന്ദ്ര പ്രധാനും ഇറാന് സന്ദര്ശിച്ചിരുന്നു.
ഇന്ന് റഷ്യയിലെത്തുന്ന സുഷമ സ്വരാജ് മോസ്കോയില് നടക്കുന്ന റിക് (റഷ്യ, ചൈന, ഭാരതം) വിദേശകാര്യ മന്ത്രിമാരുടെ യോഗത്തില് പങ്കെടുക്കും. യുഎന്നില് ജെയ്ഷെ മുഹമ്മദ് തലവന് മൗലാന മസൗദ് അസ്ഹറിനെ ആഗോളതലത്തില് വിലക്കാനുള്ള പ്രമേയം ചൈന വീറ്റോ ചെയ്ത പ്രശ്നം സുഷമ സ്വരാജ് യോഗത്തില് ഉന്നയിക്കുമെന്നാണ് പ്രതീക്ഷിക്കുന്നത്.
