ഇടത്-വലത് മുന്നണികളുടെ ജനവഞ്ചന തുറന്നു കാട്ടി എന്‍ഡിഎ സ്ഥാനാര്‍ത്ഥി സി.സദാനന്ദന്‍ മാസ്റ്റര്‍

പാനൂര്‍: കൂത്തുപറമ്പ് മണ്ഡലത്തിലെ തെരഞ്ഞെടുപ്പ് രാഷ്‌ട്രീയത്തില്‍ ഇടത്-വലത് മുന്നണികള്‍ കാലങ്ങളായി നടത്തിവരുന്ന ജനവഞ്ചന തുറന്നുകാട്ടി വോട്ടര്‍മാര്‍ക്ക് മുന്നില്‍ വിവിധ ചോദ്യങ്ങളുയര്‍ത്തി എന്‍ഡിഎ സ്ഥാനാര്‍ത്ഥി സി.സദാനന്ദന്‍ മാസ്റ്റര്‍. മണ്ഡലത്തിലെ പര്യടനം പുരോഗമിക്കുമ്പോള്‍ പ്രതീക്ഷയുടെ പടവുകള്‍ പടിപടിയായി കയറാന്‍ പൊയ്‌ക്കാലുകള്‍ നല്‍കുന്ന പിന്തുണയെക്കാള്‍ വോട്ടര്‍മാര്‍ ഈ അദ്ധ്യാപകനെ മനസാ സ്വീകരിച്ചു കഴിഞ്ഞുവെന്നതാണ് യാഥാര്‍ത്ഥ്യം. ബലിദാനികളുടെ ഉജ്ജ്വല ഓര്‍മ്മകള്‍ കാലമുളള കാലംവരെ അനശ്വരമാണെന്ന് വിശ്വസിച്ച് അവരുടെ ജ്വലിക്കുന്ന സ്മരണയ്‌ക്ക് മുന്നില്‍ ഒരുപിടി പുഷ്പങ്ങളര്‍പ്പിച്ച് തന്നെ ഏല്‍പ്പിച്ച ദൗത്യം സമാരംഭിച്ച സദാനന്ദന്‍മാസ്റ്റര്‍ ഇന്ന് കൂത്തുപറമ്പിന്റെ എല്ലാമായി മാറികഴിഞ്ഞു. ഇടതുവലതു മുന്നണികള്‍ ഭരിച്ചു മുടിച്ച മണ്ഡലത്തിന് മോചനം വേണ്ടേയെന്ന ചോദ്യമാണ് ഇവിടെ നിന്നുമുയരുന്നത്. സിപിഎം നടത്തുന്ന നരമേധങ്ങള്‍ക്ക് ഒരറുതി വരാനായി ഒരു നാടിന്റെ മനസ് കൊതിക്കുമ്പോള്‍ വിജയം കാലഘട്ടത്തിന്റെ അനിവാര്യതയാണെന്ന് സദാനന്ദന്‍മാസ്റ്റര്‍ ഉറച്ചു പറയുന്നു. ഒരു ദൗത്യവാഹകനായി എന്നെ കാണണമെന്ന് വിനയത്തോടെ സഹപ്രവര്‍ത്തകരോടു പറയുന്ന സദാനന്ദന്‍മാസ്റ്റര്‍ മണ്ഡലത്തിലെ വോട്ടിന്റെ മാത്തമാറ്റിക്‌സ് വിവരിക്കുമ്പോള്‍ ‘ഭൂരിപക്ഷത്തിന്റെ തര്‍ക്കം മാത്രമേ നിലവിലുളളൂവെന്ന് തറപ്പിച്ച് പറയുന്നു അദ്ദേഹം. രണ്ടാംസ്ഥാനത്തിനു വേണ്ടിയാണ് യുഡിഎഫും എല്‍ഡിഎഫും മത്സരിക്കുന്നതെന്നും കൂത്തുപറമ്പില്‍ കാവി വസന്തം വിരിയാന്‍ പോകുകയാണെന്നുമുളള ചര്‍ച്ചയാണ് നിലവിലുളളത്. അട്ടിമറി വിജയത്തിന് ബിജെപി തദ്ദേശതെരഞ്ഞെടുപ്പില്‍ നേടിയ 24000 വോട്ടു മതിയാവില്ലെന്ന് ഉറപ്പ്. ഏറെ ഈഴവ വോട്ടുകളുളള കൂത്തുപറമ്പില്‍ ബിഡിജെഎസിന്റെ മുന്നണിപ്രവേശം എന്‍ഡിഎയുടെ പ്രതീക്ഷകള്‍ക്ക് ചിറകുമുളക്കുന്നതാകുന്നു. സിപിഎം അക്രമികള്‍ ഇരുകാലുകളും വെട്ടിയെടുത്ത് അംഗവിഹീനനാക്കിയ സദാനന്ദന്‍മാസ്റ്റര്‍ക്ക് സഹതാപം വോട്ടും ലഭിക്കുമെന്നുറപ്പ്. 154 ബൂത്തുകളില്‍ 60ഓളം ബൂത്തുകളില്‍ ബിജെപിക്ക് ശക്തമായ സാന്നിധ്യമുണ്ടെന്നതും ശ്രദ്ധേയമാണ്. ഇവിടങ്ങളിലെല്ലാം ഓരോ വോട്ടും നിര്‍ണ്ണായകമാകയാല്‍ കുടുംബയോഗങ്ങളിലൂടെ വോട്ടുകള്‍ ഉറപ്പിക്കാന്‍ പരിപാടികള്‍ നടന്നു വരികയാണ്. മണ്ഡലത്തിലെ പ്രമുഖരായവരെ വീടുകളിലെത്തി സന്ദര്‍ശിച്ച് അനുഗ്രഹം തേടിയാണ് സദാനന്ദന്‍മാസ്റ്റര്‍ നീങ്ങുന്നത്. കഴിഞ്ഞ നിയമസഭാ തെരഞ്ഞെടുപ്പില്‍ നിന്നും വ്യത്യസ്തമായ രാഷ്‌ട്രീയ സാഹചര്യമാണ് നിലവിലുളളതെന്നതും എന്‍ഡിഎക്ക് അനുകൂലമാണ്. കഴിഞ്ഞ തെരഞ്ഞെടുപ്പില്‍ 3303 വോട്ടിന്റെ ഭൂരിപക്ഷത്തില്‍ വിജയിച്ചു കയറി മന്ത്രിയായ യുഡിഎഫിലെ കെപി.മോഹനനും എല്‍ഡിഎഫിലെ കെകെ.ശൈലജ ടീച്ചറുമാണ് സദാനന്ദന്‍മാസ്റ്ററുടെ എതിരാളികള്‍. എന്‍ഡിഎ സ്ഥാനാര്‍ത്ഥിയുടെ വിജയത്തിനായി കേന്ദ്രമന്ത്രിമാരടക്കമുളള ദേശീയ നേതാക്കള്‍ കൂത്തുപറമ്പിലെത്തുന്നുണ്ട്. 20ന് പാനൂര്‍ ഗുരുസന്നിധി ഗ്രൗണ്ടില്‍ നടക്കുന്ന എന്‍ഡിഎ കണ്‍വെന്‍ഷന്‍ ഉദ്ഘാടനം ചെയ്യുന്നത് കേന്ദ്ര ആരോഗ്യമന്ത്രി ജെപി.നഡ്ഡയാണ്. മഹിളാസംഗമങ്ങളും യുവജന അദ്ധ്യാപക സംഗമങ്ങളും നടന്നു വരുന്നു. മുഴുവന്‍ സമയപ്രവര്‍ത്തകരായി നൂറുകണക്കിന് സ്വയംസേവകര്‍ ഈ ദൗത്യവാഹകന്റെ ലക്ഷ്യപൂര്‍ത്തികരണത്തിന് ഐക്യദാര്‍ഢ്യവുമായി രംഗത്തുണ്ട്. സിപിഎമ്മിന്റെ രാവണന്‍കോട്ടകളില്‍ ജനാധിപത്യത്തിന്റെ സന്ദേശവുമായി മഹാസമ്പര്‍ക്കവും നടക്കുന്നുണ്ട്. വിജയം മാത്രമാണ് മുന്നിലുളളതെന്ന നിശ്ചയദാര്‍ഢ്യമാണ് സദാനന്ദന്‍മാസ്റ്ററെ മറ്റു സ്ഥാനാര്‍ത്ഥികളില്‍ നിന്നും വ്യത്യസ്തനാക്കുന്നതും.