കണ്ണൂര്: കൃഷ്ണാ ജ്വല്സിന്റെ നേതൃത്വത്തില് കണ്ണൂരില് ആരംഭിക്കുന്ന റിലയന്സ് എജുക്കേഷന് വിഎഫ്എക്സ് & ആനിമേഷന് അക്കാദമിയുടെ പ്രഖ്യാപനം മികച്ച പിന്നണി ഗായികക്കുള്ള അവാര്ഡ് നേടിയ മധുശ്രീ നിര്വ്വഹിച്ചു. കണ്ണൂര് സാധു കല്യാണ മണ്ഡപത്തില് നടന്ന കൃഷ്ണാ ജ്വല്സ് ഓര്മ്മകളില് ഒഎന്വി ചലച്ചിത്രഗാനസന്ധ്യയില് വച്ച് കൃഷ്ണാ ജ്വല്സ് മാനേജിംഗ് പാര്ട്ണര് സി.വി.രവീന്ദ്രനാഥിന് റിലയന്സ് എജുക്കേഷന് ലോഗോ കൈമാറിയാണ് പ്രഖ്യാപനം നടത്തിയത്. ക്ലാസ്സുകള് മെയ് രണ്ടാം വാരം ആരംഭിക്കും.
ആനിമേഷന് രംഗത്ത് വര്ദ്ധിച്ചുവരുന്ന തൊഴില്സാധ്യതകള് പ്രയോജനപ്പെടുത്താന് റിലയന്സിന്റെ ഈ കേന്ദ്രത്തിലൂടെ സാധ്യമാവുമെന്ന് കൃഷ്ണാ ജ്വല്സ് മാനേജിംഗ് പാര്ട്ണര് സി.വി.രവീന്ദ്രനാഥ് പറഞ്ഞു. വരുംവര്ഷങ്ങളില് ഏകദേശം അഞ്ച് ലക്ഷത്തോളം ഒഴിവുകളാണ് ഈ മേഖലയില് ഉണ്ടാവുകയെന്ന നാസ്കോം പുറത്തുവിട്ട റിപ്പോര്ട്ടുകള് പൂര്ണ്ണമായ അര്ത്ഥത്തില് സാര്ത്ഥകമാക്കാന് ഈ കേന്ദ്രത്തിലെ പഠനത്തിന് സാധിക്കും. മനസില് ജന്മമെടുക്കുന്ന ക്രിയാത്മക ചിന്തകളെ വര്ണ്ണ വിസ്മയമാക്കാനുള്ള കഴിവ്, മനസ്സിലുള്ള ആശയങ്ങളെ മറ്റുള്ളവരിലേക്ക് പകര്ന്നു കൊടുക്കാനുള്ള മിടുക്ക് തുടങ്ങിയവയാണ് ആനിമേഷന് മേഖലയില് പ്രവര്ത്തിക്കുന്ന ഒരാള്ക്ക് വേണ്ടത്. ടെക്നോളജിയിലുള്ള അറിവും കലാപരമായ കഴിവും ഒന്നിപ്പിക്കാന് കഴിയുന്നവര്ക്ക് ഈ മേഖലയില് വിസ്മയങ്ങള് തീര്ക്കാന് കഴിയും. എല്ലാ മേഖലയിലും എന്നതുപോലെ ആനിമേഷന് രംഗത്തും സ്പെഷ്യലൈസേഷനുകള് ആരംഭിച്ചുകഴിഞ്ഞു. ഇതൊക്കെ വിദ്യാര്ത്ഥികള്ക്ക് ഇനി കണ്ണൂരിലും സാധ്യമാണ്.
