പറവൂര്: എന്ഡിഎയുടെ തെരഞ്ഞെടുപ്പ് പ്രകടന പത്രിക തയ്യാറാക്കുന്നതിനും ജനങ്ങളില് നിന്ന് അഭിപ്രായം സ്വീകരിക്കുന്നതിനുമായി ‘എന്റെ കേരളം വികസന വണ്ടി’ പറവൂരിലെത്തി. നമ്പൂരിയച്ചന് ആലിനു സമീപം പറവൂരിന്റെ വികസനം എന്ന വിഷയത്തില് നടന്ന സംവാദം എന്ഡിഎ സ്ഥാനാര്ത്ഥി ഹരി വിജയന് ഉദ്ഘാടനം ചെയ്തു. വി.കെ. ബസിത് കുമാര് മോഡറേറ്ററായിരുന്നു. മഹാരാജാസ് കോളേജിലെ റിട്ട:പ്രൊഫസര് എം. മോഹന്, റിട്ട: എക്സൈസ് സര്ക്കിള് ഇന്സ്െപക്ടര് സി.എന്. രാധാകൃഷ്ണന്, അഡ്വ.പ്രവീണ് തങ്കപ്പന്, ബാങ്ക് ജീവനക്കാരന് സുമന് എന്നിവര് സംവാദത്തില് സംസാരിച്ചു.
വീഡിയോ കോണ്ഫറന്സ് വഴി ബിജെപി സംസ്ഥാന പ്രസിഡന്റ് കുമ്മനം രാജശേഖരന് ജനങ്ങളുടെ ചോദ്യങ്ങള്ക്ക് മറുപടി നല്കി. സാമൂഹ്യനീതിയെകുറിച്ചുള്ള നിങ്ങളുടെ കാഴ്ചപ്പാട് എന്താണ്, സാമൂഹ്യനീതിക്ക് വേണ്ടി പറവൂരില് എന്ത് ചെയ്യാന് സാധിക്കും എന്ന ചോദ്യമാണ് ചേന്ദമംഗലം സ്വദേശി കെ.കെ. ശിവന് ചോദിച്ചത്. അതിന് മറുപടിയായി കുമ്മനം പറഞ്ഞത് സാമൂഹ്യനീതി എന്ന് പറയുന്നത് ബിജെപിയുടെ അടിസ്ഥാന തത്വമാണ് അതുകൊണ്ട് പറവൂരിന് മാത്രമായി സാമൂഹ്യനീതിക്ക് പ്രസക്തി ഇല്ല. ആരോടും പ്രീണനമില്ലാതെ എല്ലാവര്ക്കും തുല്യനീതി ലഭ്യമാക്കുക എന്നതാണ് ബിജെപി അധികാരത്തില് വന്നാല് നടപ്പിലാക്കാന് പോകുന്നത്. അടിസ്ഥാന ജനവിഭാഗമായ പട്ടികജാതി പട്ടികവര്ഗക്കാര്ക്ക് അന്നം , വെള്ളം , മണ്ണ് , വീടില്ലാത്തവര്ക്ക് വീട് എന്നിവ ഉറപ്പാക്കുക തന്നെ ചെയ്യും. ഇവിടെ ചര്ച്ച ചെയ്ത വികസന കാഴ്ചപ്പാടുകള് ഉള്പ്പെടുത്തിയായിരിക്കും എന്ഡിഎയുടെ പ്രകടനപത്രിക തയ്യാറാക്കുക എന്ന് കുമ്മനം പറഞ്ഞു. യുവമോര്ച്ച മണ്ഡലം പ്രസിഡന്റ് കെ.ആര്. നിര്മ്മല് കോഡിനേറ്ററായിരുന്നു.
