മട്ടന്നൂര്: ലോകത്തില് ഏറ്റവും കൂടുതല് ആവിഷ്കാര സ്വാതന്ത്ര്യമുള്ള രാജ്യം ഭാരതമാണെന്നും ആവിഷ്കാര സ്വാതന്ത്ര്യത്തെക്കുറിച്ച് പറഞ്ഞും പ്രസംഗിച്ചും നടക്കുന്നവര് ചൈനയടക്കമുള്ള രാജ്യങ്ങളില് എന്താണ് സംഭവിക്കുന്നതെന്ന് പറയാന് തയ്യാറാകണമെന്നും രാഷ്ട്രീയ സ്വയംസേവക സംഘം കണ്ണൂര് ജില്ലാ സഹകാര്യവാഹ് സോഹന്ലാല് ശര്മ്മ പറഞ്ഞു. ആര്എസ്എസ് മട്ടന്നൂര് താലൂക്ക് ചാവശ്ശേരി മണ്ഡലത്തിലെ മണ്ണോറ ശാഖ ധ്വജോത്സവത്തില് പങ്കെടുത്ത് സംസാരിക്കുകയായിരുന്നു അദ്ദേഹം. ജെഎന്യു സര്വ്വകലാശാലയില് ആവിഷ്കാര സ്വാതന്ത്ര്യത്തിന്റെ പേരില് ഭാരതവിരുദ്ധ മുദ്രാവാക്യവും പ്രവര്ത്തനവുമാണ് ചിലര് നടത്തുന്നത്. ആത്മാഭിമാനമുള്ള ഒരു ഭരണകൂടമാണ് കേന്ദ്രം ഭരിക്കുന്നത്. അതുകൊണ്ടാണ് ഇത്തരം രാജ്യദ്രോഹികള്ക്കെതിരെ വിട്ടുവീഴ്ചയില്ലാത്ത സമീപനം സ്വീകരിക്കുന്നത്. ഓരോ വ്യക്തിയിലും മാറ്റം സൃഷ്ടിച്ച് അത്തരം വ്യക്തികളിലൂടെ സാമൂഹികമാറ്റവും രാഷ്ട്രത്തിന്റെ പരമവൈഭവവുമാണ് ആര്എസ്എസ് ശാഖകളിലൂടെ ലക്ഷ്യമിടുന്നത്. അധര്മ്മത്തെ ഇല്ലായ്മ ചെയ്ത് ധാര്മ്മികമൂല്യമുള്ള പ്രവര്ത്തനത്തിലൂടെ പ്രദേശത്തിന്റെ സമൂലമായ മാറ്റമുണ്ടാക്കാന് ആ പ്രദേശത്തെ സംഘശാഖക്ക് കഴിയും. ഇതുമാത്രമാണ് ശരി എന്നാണ് ചില ദര്ശനങ്ങളുടെ വക്താക്കള് പറയുന്നത്. എന്നാല് എല്ലാത്തിലെയും ശരിയെ അംഗീകരിക്കുക എന്നതാണ് ഭാരതീയദര്ശനം. പ്രപഞ്ചത്തിലുള്ള എല്ലാറ്റിനെയും ഉള്ക്കൊള്ളാനുള്ള കാഴ്ചപ്പാട് ഭാരതദര്ശനത്തിനുണ്ട്. അതില് അസഹിഷ്ണുതയില്ലെന്നും അദ്ദേഹം പറഞ്ഞു. ചടങ്ങില് ശാഖാ കാര്യവാഹ് കെ.വി.സുഗേഷ് അധ്യക്ഷത വഹിച്ചു. മട്ടന്നൂര് താലൂക്ക് വിദ്യാര്ത്ഥി പ്രമുഖ് കെ.വി.രജീഷ് സ്വാഗതം പറഞ്ഞു. സ്ത്രീകളും കുട്ടികളും മുതിര്ന്നവരും അടക്കം നിരവധി പേര് പങ്കെടുത്ത ധ്വജോത്സവം പരിപാടി മണ്ണോറ ഗ്രാമത്തിന്റെ ഉത്സവമായി മാറുകയായിരുന്നു. മട്ടന്നൂര് താലൂക്ക് സംഘചാലക് സി.ബാലഗോപാലന് മാസ്റ്റര്, താലൂക്ക് സഹകാര്യവാഹ് എം.കെ.സന്തോഷ്, താലൂക്ക് ശാരീരിക് ശിക്ഷണ് പ്രമുഖ് രാഹുല്, താലൂക്ക് ബൗദ്ധിക് പ്രമുഖ് കെ.സുരേന്ദ്രന് തുടങ്ങിയവര് സംബന്ധിച്ചു. സ്വയംസേവകരുടെ കായികാഭ്യാസ പ്രകടനവും ഉണ്ടായിരുന്നു.
ധ്വജോത്സവം സംഘടിപ്പിച്ചു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.