കണ്ണൂര്‍: ഇരിക്കൂര്‍ മണ്ഡലത്തില്‍ ഏഴ് തെരഞ്ഞെടുപ്പുകളില്‍ കോണ്‍ഗ്രസ് സ്ഥാനാര്‍ത്ഥിയായി എത്തിയ കെ.സി.ജോസഫിനെതിരെ പ്രവര്‍ത്തകരുടെ പരാതിയുടെ കെട്ട്. മുപ്പത്തിയഞ്ച് വര്‍ഷം തുടര്‍ച്ചയായി ഇരിക്കൂര്‍ മണ്ഡലത്തെ പ്രതിനിധീകരിക്കുന്ന മന്ത്രി കെ.സി ജോസഫ് വീണ്ടും മത്സരിക്കുന്നതിരെയാണ് നേതാക്കള്‍ പരാതി നല്‍കിയത്. കെ.സിക്കെതിരെ ഇതാദ്യമായാണ് യൂത്ത് കോണ്‍ഗ്രസ് കോണ്‍ഗ്രസ് നേതാക്കളുള്‍പ്പെടെ രംഗത്തുവരുന്നത്. ഏഴു തവണ മത്സരിച്ച് വിജയിച്ച കെ.സി.ജോസഫ് ഇനിയും ഇരിക്കൂറില്‍ മത്സരിക്കാന്‍ പാടില്ലെന്നും സ്വയം മത്സരരംഗത്തുനിന്നും മാറിയില്ലെങ്കില്‍ കെ.സി.ജോസഫിനെ കേന്ദ്ര, സംസ്ഥാന നേതൃത്വം ഇടപെട്ട് മാറ്റിനിര്‍ത്തണമെന്നും ആവശ്യപ്പെട്ടാണ് പരാതി. സ്ഥാനാര്‍ത്ഥി മാറ്റം ആവശ്യപ്പെട്ട് 20 ഓളം പേരടങ്ങുന്ന നിവേദനസംഘം കഴിഞ്ഞ ദിവസം നേതാക്കളെ കാണുകയായിരുന്നു. യൂത്ത് കോണ്‍ഗ്രസ് സംസ്ഥാന സെക്രട്ടറിമാരായ നൗഷാദ് ബ്ലാത്തൂര്‍, ജോഷി കണ്ടത്തില്‍, മറ്റ് നേതാക്കളായ കൊയ്യം ജനാര്‍ഥനന്‍ തുടങ്ങിയവരാണ് എഐസിസി സെക്രട്ടറി മുകുള്‍വാസ്‌നിക്ക് കെപിസിസി പ്രസിഡന്റ് വി.എം സുധീരന്‍, രമേശ് ചെന്നിത്തല എന്നിവര്‍ക്ക് പരാതി നല്‍കിയത്. തെരഞ്ഞെടുപ്പ് തീയതി പ്രഖ്യാപിക്കപ്പെട്ടതു മുതല്‍ കെ.സി ജോസഫിനെതിരേ മണ്ഡലത്തില്‍ ഉയര്‍ന്ന പ്രതിഷേധങ്ങളും കോലം കത്തിക്കലും ഇതോടെ പുതിയ തലങ്ങളിലേക്ക് കടന്നിരിക്കുകയാണ്. കെ.സി.ജോസഫ് വീണ്ടും മത്സരിക്കുന്നതിനെതിരെ മണ്ഡലത്തിന്റെ വിവിധ ഭാഗങ്ങളില്‍ പ്രതിഷേധ പ്രകടനങ്ങളും കോലം കത്തിക്കലും നടന്നിരുന്നു. എന്നാല്‍ അത് കോണ്‍ഗ്രസ് പ്രവര്‍ത്തകരല്ല എന്നാണ് കെ.സി ജോസഫ് വാദിച്ചത്.
തെരഞ്ഞെടുപ്പ് പ്രഖ്യാപനം വന്നതു മുതല്‍ കെ.സി.ജോസഫിനെതിരേ മണ്ഡലത്തില്‍ ശക്തമായ വിമര്‍ശനങ്ങളാണ് ഉണ്ടായിരുന്നത്. കോണ്‍ഗ്രസ് സ്ഥാനാര്‍ഥിക്കെതിരേ ജില്ലയില്‍ ഇത്രയും രൂക്ഷമായി അണികളുടെ പ്രതികരണം ഉണ്ടാകുന്നത് ആദ്യമായതിനാല്‍ പ്രശ്‌നം എങ്ങനെ കൈകാര്യം ചെയ്യണമെന്നതും കോണ്‍ഗ്രസില്‍ തലവേദനയായിരിക്കുകയാണ്.
കെ.സി ജോസഫിനു പകരം കെപിസിസി ജനറല്‍ സെക്രട്ടറി അഡ്വ. സജീവ് ജോസഫിനെ ഇരിക്കൂറില്‍ മത്സരിപ്പിക്കണമെന്നതാണ് പ്രദേശത്തെ ഡിസിസി, മണ്ഡലം ഭാരവാഹികളുടെ ആവശ്യം. ഇക്കാര്യം സൂചിപ്പിച്ച് കെപിസിസിക്ക് ഡിസിസി, മണ്ഡലം ഭാരവാഹികള്‍ ഒപ്പുവച്ച നിവേദനവും നല്‍കിയിരുന്നു. കെസി മത്സരിക്കുന്നതിനെതിരേ കെഎസ്‌യുവിന്റെ നേതൃത്വത്തില്‍ ഇരിക്കൂരില്‍ നടത്തിയ പ്രതിഷേധ പ്രകടനത്തിന്റെ പേരില്‍ സജീവ് ജോസഫിനെ ക്രൂശിക്കാനുള്ള ചിലരുടെ നീക്കം നേതൃത്വം മനസിലാക്കണമെന്ന് കെപിസിസിക്ക് നല്‍കിയ കത്തില്‍ ജോഷി കണ്ടത്തിലും നൗഷാദ് ബ്ലാത്തൂരും വ്യക്തമാക്കിയിട്ടുമുണ്ട്. കോണ്‍ഗ്രസിന്റെ ഉറച്ച മണ്ഡലമായ ഇരിക്കൂറില്‍ മത്സരിക്കാന്‍ ഗ്രൂപ്പ് തലത്തില്‍ കടുത്ത വടംവലി തന്നെ നടക്കുന്നുണ്ട്.
