കണ്ണൂര്: കണ്ണൂര് നഗരത്തെ കാവികടലാക്കി ബിഎംഎസ്ആര്എ ശക്തിപ്രകടനം. പ്രകടനത്തില് ആയിരങ്ങള് അണിനിരന്നു. ബിഎംഎസ്ആര്എ രജതജൂബിലി ആഘോഷങ്ങളുടെ സമാപനത്തിന്റെ ഭാഗമായായിരുന്നു റാലി. റാലിയോടുകൂടി ഭാരതീയ മെഡിക്കല് സെയില്സ് റെപ്രസന്റേറ്റീവ് അസോസിയേഷന് സംസ്ഥാന സമ്മേളനത്തിന് ഇന്നലെ കണ്ണൂരില് തുടക്കമായി. വൈകുന്നേരം അഞ്ചു മണിയോടെ വിളക്കുംതറ മൈതാനിയില് നിന്നും ആരംഭിച്ച പ്രകടനം നഗരം ചുറ്റി സ്റ്റേഡിയോ കോര്ണറില് സമാപിച്ചു. ശിങ്കാരിമേളത്തിന്റെയും ബാന്റ് മേളങ്ങളുടെയും മുത്തുക്കുടകളുടെയും അകമ്പടിയോടെ നടന്ന പ്രകടനം അക്ഷരാര്ത്ഥത്തില് മെഡിക്കല് മേഖലയിലെ ബിഎംഎസിന്റെ പ്രതാപം വിളിച്ചോതുന്നതായി. സംസ്ഥാനത്തിന്റെ വിവിധ ഭാഗങ്ങളില് നിന്നും കാലത്തുതന്നെ നഗരത്തിലേക്ക് എത്തിച്ചേര്ന്ന നൂറുകണക്കിന് ബിഎംഎസ്ആര്എ പ്രവര്ത്തകര് വര്ധിത ആവേശത്തോടെയാണ് പ്രകടനത്തില് അണിചേര്ന്നത്. പ്രകടനത്തിന് ശേഷം സ്റ്റേഡിയം കോര്ണറില് നടന്ന പൊതുസമ്മേളനം ബിഎംഎസ് അഖിലേന്ത്യാ സെക്രട്ടറി ദുരൈരാജ് ഉദ്ഘാടനം ചെയ്തു. സംസ്ഥാന പ്രസിഡണ്ട് കെ.കെ.വിജയകുമാര് മുഖ്യപ്രഭാഷണം നടത്തി. ബിഎംഎസ്ആര്എ സംസ്ഥാന പ്രസിഡണ്ട് പി.എന്.പ്രദീപ് അധ്യക്ഷത വഹിച്ചു. ബിഎംഎസ്ആര്എ സംസ്ഥാന അധ്യക്ഷന് പി.എന്.പ്രദീപ്, ബിഎംഎസ്ആര്എ സംസ്ഥാന സംഘടനാ സെക്രട്ടറി സി.പി.ഗോപീകൃഷ്ണന്, ബിഎംഎസ്ആര്എ സംസ്ഥാന സെക്രട്ടറി കെ.സുരേഷ് കുമാര്, സംസ്ഥാന സെക്രട്ടറിമാരായ ആര്.വേണുഗോപാല്, ജലേഷ് കുമാര്, എം.അനീഷ്കുമാര്, ഉപേന്ദ്രന്, വൈസ് പ്രസിഡണ്ടുമാരായ സുദര്ശനന് നായര്, സതീഷ് പൈ, സംസ്ഥാന വൈസ് പ്രസിഡണ്ട് ജയദീപ് തുടങ്ങിയവര് പ്രകടനത്തിന് നേതൃത്വം നല്കി.
ഇന്ന് രാവിലെ 10 മണിക്ക് പോലീസ് അസോസിയേഷന് ഹാളില് സംസ്ഥാന സമ്മേളനത്തിന്റെ ഭാഗമായ പ്രതിനിധി സമ്മേളനം നടക്കും. ബിഎംഎസ് അഖിലേന്ത്യാ സെക്രട്ടറി ദുരൈരാജ് ഉദ്ഘാടനം ചെയ്യും. ബിഎംഎസ്ആര്എ സംസ്ഥാന അധ്യക്ഷന് പിഎന്.പ്രദീപ് പതാക ഉയര്ത്തും. രാഷ്ട്രീയ സ്വയംസേവക സംഘം പ്രാന്തീയ കാര്യകാരി സദസ്യന് വത്സന് തില്ലങ്കേരി മുഖ്യപ്രഭാഷണം നടത്തും. ബിഎംഎസ്ആര്എം അഖിലേന്ത്യാ അധ്യക്ഷന് കെ.രാംകുമാര്, എന്എഫ്എസ്ആര്യു അഖിലേന്ത്യാ ജനറല് സെക്രട്ടറി എ.പ്രദീപ് റോയ്, എഡബ്ല്യുബിഎന്ആര്യു ട്രഷറര് സുബീര് ബന്ദോപാധ്യായ തുടങ്ങിയവര് സംസാരിക്കും. സമാപന സമ്മേളനം ബിഎംഎസ് സംസ്ഥാന ജനറല് സെക്രട്ടറി എം.പി.രാജീവന് ഉദ്ഘാടനം ചെയ്യും.
