അങ്ങാടിപ്പുറം: തെരഞ്ഞെടുപ്പ് പെരുമാറ്റച്ചട്ടം നിലവില് വന്നതിനാല് അങ്ങാടിപ്പുറം മേല്പ്പാലത്തിന്റെ ഉദ്ഘാടനം അനിശ്ചിതമായി നീളുമെന്നുറപ്പായി. പക്ഷേ, ഒരു ജനകീയ ഉദ്ഘാടനം നടക്കുമെന്ന പ്രതീക്ഷയിലാണ് നാട്ടുകാര്.
14ന് നടത്താനായിരുന്നു മുന് തീരുമാനം. തീയതി പ്രഖ്യാപിച്ച നിമിഷം മുതല് കണ്ണിലെണ്ണ ഒഴിച്ച് കാത്തിരിക്കുകയായിരുന്നു നാടും നഗരവും. കാരണം അത്രമേല് രൂക്ഷമായ ഗതാഗത കുരുക്കായിരുന്നു ജനങ്ങള് അനുഭവിച്ചു കൊണ്ടിരുന്നത്. എന്നാല് അപ്രതീക്ഷിതമായി വന്ന തെരഞ്ഞെടുപ്പ് പ്രഖ്യാപനം ജനങ്ങളുടെ പ്രതീക്ഷക്കാണ് മങ്ങലേല്പ്പിച്ചിരിക്കുന്നത്. ഉദ്ഘാടനം നടന്നാലും ഇല്ലെങ്കിലും പാലം തുറന്ന് കൊടുക്കുമോയെന്ന സന്ദേഹം ജനങ്ങളെ അലട്ടുകയാണ്. അതേസമയം ഉദ്ഘാടനം നടന്നില്ലെങ്കിലും പറഞ്ഞ തീയതിയില് തന്നെ മേല്പ്പാലം തുറന്നു കൊടുക്കുമെന്നാണ് ഇപ്പോള് ലഭിക്കുന്ന സൂചനകള്. അങ്ങനെയെങ്കില് അതൊരു ജനകീയ ഉദ്ഘാടനം ആകുമെന്നുറപ്പായി. മണിക്കൂറുകള് നീണ്ടു നില്ക്കുന്ന പ്രസംഗങ്ങളോ കാതടപ്പിച്ചുള്ള അനൗണ്സ്മെന്റ് വാഹനങ്ങളോ ഇല്ലാതെ ഒരു ഉദ്ഘാടനം.
