കൊച്ചി: ജില്ലയുടെ സമഗ്ര വികസനത്തിന് പുതിയ കാഴ്‌ച്ചപാടുകളില്ലാതെ ജില്ലാ പഞ്ചായത്ത് ബജറ്റ് മുന്‍ വര്‍ഷത്തെ തനിയാവര്‍ത്തനമായി മാറി. 212.88 കോടി വരവും 212.01 കോടി ചെലവും 86.89 ലക്ഷം രൂപ മിച്ചവും പ്രതീക്ഷിക്കുന്ന ബജറ്റാണ് വൈസ്പ്രസിഡന്റ് അബ്ദുള്‍മുത്തലിബ് അവതരിപ്പിച്ചത്. ആരോഗ്യ, വിദ്യാഭ്യാസ, മാലിന്യപ്രശ്‌നങ്ങള്‍ക്കു മുന്‍ഗണന നല്‍കുമെന്ന പ്രഖ്യാപനം ഉണ്ടെങ്കിലും ഏതെല്ലാം രീതിയില്‍ നടപ്പാക്കുമെന്ന വ്യക്തമായി ഒന്നുംതന്നെ ബജറ്റില്‍ ഇല്ല. ആരോഗ്യവകുപ്പിനെയും സാമൂഹ്യനീതിവകുപ്പിനെയും തദ്ദേശസ്വയംഭരണ സ്ഥാപനങ്ങളുടെയും ജനപ്രതിനിധികളുടെയും ആരോഗ്യ സന്നദ്ധ പ്രവര്‍ത്തകരുടെയും ആശവര്‍ക്കര്‍മാരുടെയും സ്‌പോണ്‍സര്‍മാരുടെയും സഹകരണത്തോടെ എറണാകുളം ജില്ലയെ സംസ്ഥാനത്തെ ആദ്യ കാന്‍സര്‍ രോഗ നിര്‍ണയ ജില്ലയാക്കി മാറ്റും എന്നതാണ് പ്രധാന നിര്‍ദ്ദേശം.
ജില്ലയിലെ ജലസ്രോതസുകളുടെ സംരക്ഷണം ഉറപ്പാക്കുന്നതിനുള്ള ‘ജനാധിപത്യ ജലസഭ’ എന്ന പദ്ധതി നടപ്പാക്കുമെന്ന പ്രഖ്യാപനം നടത്തിയിട്ടുണ്ട്. മുന്‍ വര്‍ഷങ്ങളില്‍ പ്രഖ്യാപിച്ച പല ജലസംരക്ഷണ പദ്ധതികളും പ്രഖ്യാപനത്തില്‍ തന്നെ നില്‍ക്കുമ്പോഴാണ് പുതിയ പ്രഖ്യാപനവുമായി ജില്ലാ പഞ്ചായത്ത് ഭരണകൂടം രംഗത്ത് എത്തിയിരിക്കുന്നത്. 82 കോടി രൂപയാണ് ഇതിനായി വകയിരുത്തിയിരിക്കുന്നത്. ഇതിനു മുന്നോടിയായുള്ള സര്‍വെ പ്രവര്‍ത്തനങ്ങള്‍ക്കായി പത്തുലക്ഷം രൂപയും വകയിരുത്തിയിട്ടുണ്ട്.
തെരുവു നായ വംശവര്‍ദ്ധന തടയുന്നതിനായി പതിവുപോലെ ഇത്തവണയും പ്രഖ്യാപനമുണ്ട്. തെരുവു നായകളുടെ വംശവര്‍ദ്ധ തടയുന്നതിന് 30 ലക്ഷം രൂപയാണ് ഉള്‍ക്കൊള്ളിച്ചിരിക്കുന്നത്. കേരം കേരമിത്ര എന്ന പദ്ധതിക്കായി 15 ലക്ഷം, ഗ്രോബാഗ് പച്ചക്കറി കൃഷി പ്രോത്സാഹനം എന്റെ കൃഷി 25 ലക്ഷം, കേര വൃക്ഷം പദ്ധതി 10 ലക്ഷം, മള്‍ട്ടി സ്‌പെഷ്യാലിറ്റി മൃഗാശുപത്രി 160 കോടി, കന്നുകാലി വളര്‍ത്തലും പാല്‍ ഉത്പാദനവും പ്രോത്‌സാഹിപ്പിക്കുന്നതിനുള്ള ക്ഷീരപഥം പദ്ധതി ഒരുകോടി, ആട്, കോഴി ഫാം പദ്ധതി 15 ലക്ഷം, മത്‌സ്യവര്‍ഷം പദ്ധതി 10 ലക്ഷം, പരിസ്ഥിതി സംരക്ഷണത്തിനായി ഹരിതം ഭരിതം 10 ലക്ഷം, വിദ്യാഭ്യാസ മേഖലയെയും പാടെ അവഗണിക്കുന്നതാണ് ജില്ലാ പഞ്ചായത്തിന്റെ ബജറ്റ്. ജില്ലയിലെ വിവിധ വിദ്യാലയങ്ങളെ കേന്ദ്രീകരിച്ച് നടക്കുന്ന ലഹരി മാഫിയയില്‍ നിന്ന് രക്ഷിക്കുന്നതിനായി ബോധവത്ക്കരണം നടത്താന്‍ മാറ്റി വെച്ചത് ഒരു ലക്ഷം രൂപ മാത്രമാണ്.
ജില്ലാ പഞ്ചായത്തിന് കീഴിലുള്ള സ്‌കൂളുകളിലെ വിദ്യാര്‍ഥികള്‍ക്ക് ഒരു തെങ്ങിന്‍തൈ നല്‍കുന്നതിനും മറ്റ് ഫലവൃക്ഷത്തൈകളും നല്‍കുന്നതിന് അഞ്ച് ലക്ഷം എന്നിങ്ങനെയാണ് നീക്കിവെച്ചിരിക്കുന്നത്. ജില്ലയിലെ ഗ്രാമീണ റോഡുകളുടെ വികസനത്തിന് നീക്കി വെച്ചിരിക്കുന്നത് വെറും 40.44 കോടി രൂപ മാത്രമാണ്. ആയിരക്കണക്കിന് റോഡുകളുടെ അറ്റകുറ്റ പണികള്‍ക്ക് പോലും ഈ തുക തികയില്ലെന്ന് ചൂണ്ടിക്കാണിക്കപ്പെടുന്നു. ഭിന്നശേഷിക്കാര്‍ക്കു മുച്ചക്ര വാഹനം നല്‍കുന്ന രാജഹംസം പദ്ധതി 1.86 കോടി, ബുദ്ധിപരമായി പിന്നോക്കം നില്‍ക്കുന്ന കുട്ടികള്‍ക്കായി വിജയവീഥി 12 ലക്ഷം, ഭിന്നശേഷിക്കാര്‍ക്കായി സൗകര്യങ്ങള്‍ ഏര്‍പ്പെടുത്തുന്നതിന് കടമ്പകള്‍ മോചനം വിമോചനം പദ്ധതി 10 ലക്ഷം, എച്ച്‌ഐവി ബാധിതര്‍ക്ക് പത്ഥ്യാഹാരം നല്‍കുന്നതിന് 12 ലക്ഷം, ശ്രവണവൈകല്യമുള്ളവര്‍ക്കായി കാതോരം 5 ലക്ഷം, സംസ്ഥാന സര്‍ക്കാരിന്റെ സാമൂഹ്യസുരക്ഷാ മിഷന്‍ ധനദാന പദ്ധതി 25 ലക്ഷം രൂപയും മാറ്റി വെച്ചിട്ടുണ്ട്.
