ഇരിട്ടി : കുന്നിടിക്കല് ചോദ്യം ചെയ്ത യുവാവിനെ മര്ദ്ദനമേറ്റ പരിക്കുകളോടെ ഇരിട്ടി താലൂക്ക് ആശുപത്രിയില് പ്രവേശിപ്പിച്ചു. പയഞ്ചേരി നേരംപോക്ക് റോഡിലെ ഐഐഎഎംഎല്പി സ്കൂളിന് സമീപത്തെ അഫ്സലിമന്സിലില് പി. ഹാരിസിനെ(38)യാണ് പരിക്കുകളോടെ ആശുപത്രിയില് പ്രവേശിപ്പിച്ചത്. വെള്ളിയാഴ്ച രാത്രി 10.30തോടെ പയഞ്ചേരിമുക്കില് നിന്നും വീട്ടിലേക്കു നടന്നു പോകവേ എം ടു എച്ച് ആര്ക്കേടിനു സമീപത്തെ റോഡില് വെച്ച് ഷിബു, ജയ്സണ് തുടങ്ങിയവരും ഇവരുടെ ഗുണ്ടകളായ ആറോളം അന്യസംസ്ഥാന തൊഴിലാളികളും ചേര്ന്ന് തന്നെ ഇരുമ്പ് കമ്പികൊണ്ടും മറ്റും മര്ദ്ദിക്കുകയായിരുന്നു എന്ന് ഹാരിസ് ഇരിട്ടി പോലീസില് നല്കിയ പരാതിയില് പറയുന്നു. മര്ദ്ദനത്തില് ഹാരിസിന്റെ വായക്കകത്ത് മുറിവേറ്റിട്ടുണ്ട്. ഇരിട്ടി താലൂക്ക് ആശുപത്രിയില് ചികിത്സാസൗകര്യ മില്ലാഞ്ഞതിനാല് എകെജി ആശുപത്രിയിലെ ചികിത്സക്ക് ശേഷം വീണ്ടും ഇരിട്ടി താലൂക്ക് ആശുപത്രിയിലേക്ക് മാറ്റുകയും ചെയ്തു. വായക്കകത്ത് ആറു തുന്നിക്കെട്ടുകള് വേണ്ടിവന്നു. കൂടാതെ കൈകള്ക്കും കാലുകള്ക്കും പുറത്തും മര്ദ്ദനമേറ്റിട്ടുണ്ട്.
പയഞ്ചേരി മുക്കില് ഒരു മാസത്തിലേറെയായി കുന്നിടിക്കല് നടന്നു വരികയാണ്. ഇവിടുത്തെ ഒരു വന്കുന്നു തന്നെയാണ് ഇടിച്ചു നിരത്തിക്കൊണ്ടിരിക്കുന്നത്. രണ്ടാഴ്ച മുന്പ് കുന്നിടിക്കല് വാര്ത്തയായതിനെ തുടര്ന്ന് അല്പ്പം ശമനമുണ്ടായെങ്കിലും രാത്രിയുടെ മറവില് ഇവിടെ ഇപ്പോഴും കുന്നിടിച്ചു നിരത്തിക്കൊണ്ടിരിക്കയാണ്. അധികൃതരുടെയും ചില രാഷ്ട്രീയ പാര്ട്ടികളുടെയും ഒത്താശയോടെ യാണ് മണ്ണിടിക്കല് ഇവിടെ നിര്ബാധം നടക്കുന്നത് എന്ന ആക്ഷേപവുമുണ്ട്.
