ആലപ്പുഴ: ആശ്വാസ് പദ്ധതി നിലനില്ക്കെ അധികപലിശ വാങ്ങിയത് തിരികെ നല്കാത്തതിലും പണമടച്ചുകഴിഞ്ഞിട്ടും യഥാര്ത്ഥ പ്രമാണം മടക്കി നല്കാത്തതിലും പ്രതിഷേധിച്ച് ചേര്ത്ത എആര് ഓഫീസ് പടിക്കല് കുടുംബസമേതം സത്യഗ്രഹം നടത്തുമെന്ന് തുറവൂര് വളമംഗലം കുന്നത്തുകാവില് രഘു പത്രസമ്മേളനത്തില് പറഞ്ഞു.
ചേര്ത്തല കുത്തിയതോട് റൂറല് ഹൗസിങ് കോ- ഓപ്പറേറ്റീവ് സൊസൈറ്റി അധികൃതരാണ് ഇടപാടുകാരനെ പീഡിപ്പിക്കുന്നത്. 2003ലാണ് 70,000 രൂപ രഘു വായ്പയെടുത്തത്. പിന്നീട് പലതവണയായി ആകെ 2,38,427 രൂപ തിരിച്ചടച്ചു. ആശ്വാസ് 2015ലെ പദ്ധതിയിളവും നല്കിയില്ല.യഥാര്ത്ഥ ആധാരവും തിരികെ നല്കാനാവില്ലെന്നാണ് ബാങ്ക് സെക്രട്ടറി പറയുന്നതെന്നും രഘു പറഞ്ഞു. കൂലിപ്പണിക്കാരനായ രഘുവിന് ഭാര്യയും രണ്ടുമക്കളുമാണുള്ളത്.
ഇളയ മകന് ബുദ്ധിമാന്ദ്യമുളളതും സംസാരവൈകല്യമുളളതുമാണ്. കുട്ടിയുടെ ചികിത്സയ്ക്കുപോലും ബുദ്ധിമുട്ടുന്ന അവസരത്തിലാണ് ബാങ്കിന്റെ ക്രൂരത.
