കൊച്ചി: സയ്യദ് മുഷ്താഖ് അലി ട്രോഫി ട്വന്റി 20 ക്രിക്കറ്റ് ടൂര്ണമെന്റില് ഇന്നലെ നടന്ന മത്സരത്തില് ഝാര്ഖണ്ഡ്, പഞ്ചാബ്, സൗരാഷ്ട്ര ടീമുകള്ക്ക് ജയം. പഞ്ചാബ് എട്ട് വിക്കറ്റുകള്ക്ക് ത്രിപുരയെയും സൗരാഷ്ട്ര 25 റണ്സിന് രാജസ്ഥാനെയും ഝാര്ഖണ്ഡ് 76 റണ്സിന് ജമ്മുകശ്മീരിനെയുമാണ് പരാജയപ്പെടുത്തിയത്.
കലൂര് ജവഹര്ലാല് നെഹ്റു സ്റ്റേഡിയത്തില് നടന്ന മത്സരത്തില് ജമ്മുകശ്മീരിനെതിരെ ആദ്യം ബാറ്റ് ചെയ്ത ഝാര്ഖണ്ഡ് നാല് വിക്കറ്റ് നഷ്ടത്തില് 179 റണ്സ് അടിച്ചുകൂട്ടി. 30 പന്തുകളില് നിന്ന് പുറത്താകാതെ 57 റണ്സെടുത്ത സൗരഭ് തിവാരി ടോപ്സ്കോറര്. ഷഷീം റാവുത്തര് 41 പന്തുകളില് നിന്ന് 50 റണ്സും സുമിത് കുമാര് 32 പന്തുകളില് നിന്ന് നേടിയ 39 റണ്സുമാണ് ഝാര്ഖണ്ഡിന് കൂറ്റന് സ്കോര് സമ്മാനിച്ചത്. മറുപടി ബാറ്റിങ്ങിനിറങ്ങിയ ജമ്മുകശ്മീരിന് 7 വിക്കറ്റ് നഷ്ടത്തില് 103 റണ്സെടുക്കാനേ കഴിഞ്ഞുള്ളൂ. രണ്ട് പേര് മാത്രം രണ്ടക്കം കടന്ന ഇന്നിങ്സില് 62 പന്തുകളില് നിന്ന് പുറത്താകാതെ 67 റണ്സെടുത്ത ഇയാന് ദേവ് സിങ് ടോപ് സ്കോറര്. ബന്ദീപ് സിങ് 12 റണ്സുമെടുത്തു. ഝാര്ഖണ്ഡിന് വേണ്ടി വികാഷ് സിങ്, സോനു സിങ്, ഷബാസ് നദീം എന്നിവര് രണ്ട് വിക്കറ്റുകള് വീതം വീഴ്ത്തി. ജമ്മുകശ്മീരിന്റെ തുടര്ച്ചയായ അഞ്ചാം പരാജയമാണിത്.
പഞ്ചാബിനെതിരെ ടോസ് നേടി ബാറ്റിങ്ങിനിറങ്ങിയ ത്രിപുരക്കായി സമ്രാട്ട് സിംഹയും ഉദിയന് ബോസും ചേര്ന്ന് 40 റണ്സിന്റെ ഭേദപ്പെട്ട തുടക്കം നല്കിയെങ്കിലും പിന്നാലെത്തിയവര് അമ്പേ പരാജയപ്പെട്ടു. സിംഹ (23), ബോസ് (19), രാജേഷ് ബാനിക് (12) എന്നിവര് ത്രിപുര നിരയില് രണ്ടക്കം കടന്നവര്. ഇതോടെ അവരുടെ ഇന്നിങ്സ് 18 ഓവറില് 96 റണ്സിന് അവസാനിച്ചു. സരബ്ജിത് ലാഡ മൂന്നും ഗുരീന്ദര് സിങ്, ഹര്ഭജന് സിങ്, പര്ഗത് സിങ് എന്നിവര് രണ്ട് വിക്കറ്റ് വീതവും വീഴ്ത്തി. ലക്ഷ്യം പിന്തുടര്ന്ന പഞ്ചാബ് 15.3 രണ്ട് വിക്കറ്റ് നഷ്ടത്തില് 100 റണ്സെടുത്തു. പര്ഗത് സിങ് (16), ഹിമാന്ഷു ചൗള (7) എന്നിവരുടെ വിക്കറ്റുകളാണ് നഷ്ടമായത്. 35 റണ്സുമായി മനന് വോറയും 40 റണ്സുമായി അല്മോല് മല്ഹോത്രയും പുറത്താകാതെ നിന്നു.
രാജസ്ഥാനെതിരായ കളിയില് ആദ്യം ബാറ്റ് ചെയ്ത സൗരാഷ്ട്ര അഞ്ച് വിക്കറ്റ് നഷ്ടത്തില് 145 റണ്സ് നേടി. പുറത്താകാതെ 39 റണ്സെടുത്ത ജയദേവ് ഉനദ്കത് ടോപ്സ്കോറര്. പുറത്താകാതെ 30 റണ്സെടുത്ത ദീപക് പൂനിയ, 27 റണ്സെടുത്ത അവി ബാരോട്ടും 23 റണ്സെടുത്ത ഷെല്ഡണ് ജാക്സണും ഭേദപ്പെട്ട പ്രകടനം നടത്തി. രാജസ്ഥാന് വേണ്ടി ചന്ദ്രപാല് സിങ് മൂന്നും ടി.എം ഉള്ഹഖ്, അശോക് മെനാരിയ എന്നിവര് ഓരോ വിക്കറ്റും നേടി.
മറുപടി ബാറ്റിങ്ങിനിറങ്ങിയ രാജസ്ഥാന് തുടക്കത്തിലേറ്റ തിരിച്ചടിയില് നിന്ന് കരകയറാന് കഴിഞ്ഞില്ല. മുന്നിരയും വാലറ്റവും പൂര്ണ്ണമായി തകര്ന്നു. ചന്ദ്രപാല് സിങ് 36 റണ്സുമായി ടോപ്സ്കോറര്. ആര്.കെ ബിഷ്നോയ് (24), പി.ആര്. യാദവ് (20), സൂര്യപ്രകാശ് സുവല്ക്ക (13) എന്നിവര് മാത്രമാണ് പിടിച്ചുനിന്നത്. അവസാന ഓവര് തീരാന് മൂന്ന് പന്ത് ബാക്കിനില്ക്കെ 115 റണ്സിന് രാജസ്ഥാന്റെ പോരാട്ടം അവസാനിച്ചു. ശൗര്യ മൂന്നും പ്രേരക് മങ്കാദ് രണ്ടും ഉനദ്കത്, ചിരാഗ് ജനി എന്നിവര് ഓരോ വിക്കറ്റും നേടി.
ഇന്ന് മത്സരമില്ല. നാളെ രാവിലെ ഒമ്പതിന് കൊച്ചി സ്റ്റേഡിയത്തില് സൗരാഷ്ട്ര ഝാര്ഖണ്ഡിനെയും ഉച്ചക്ക് ഒന്നിന് രാജസ്ഥാന് ത്രിപുരയെയും നേരിടും. ഉച്ചക്ക് ഒന്നിന് കളമശേരി സെന്റ് പോള്സ് ഗ്രൗണ്ടില് പഞ്ചാബിനെതിരെയാണ് കേരളത്തിന്റെ മത്സരം.
