ഇരിട്ടി: പായം ഗ്രാമീണ ഗ്രന്ഥാലയത്തിന്റെ അറുപത്തി അഞ്ചാം വാര്ഷികാഘോഷത്തില് സംഘടിപ്പിച്ച സൈമുള്ടേനിയസ് ചെസ്സില് 65 പേരോട് പടവെട്ടി ഡോ.കെ.വി. ദേവദാസ് ചരിത്ര വിജയം കുറിച്ചു. രാവിലെ പത്തു മണിക്ക് ആരംഭിച്ച ചെസ്സ് മത്സരം അവസാനിച്ചത് വൈകുന്നേരം ആറുമണിയോടെ ആയിരുന്നു. 9 വയസ്സുകാരന് വിഷ്ണു ദേവ് മുതല് അന്പത്തൊമ്പതുകാരന് കെ. മോഹനന് ഉള്പെടെ ഉള്ളവര് ഡോ. ദേവദാസുമായി മത്സരിച്ച് പരാജയമടഞ്ഞു. ഭക്ഷണം പോലും ഉപേക്ഷിച്ചായിരുന്നു ഡോക്ടറുടെ മത്സരം. നീണ്ട 10 മണിക്കൂര് നേരത്തെ മത്സരത്തിലെ ദേവദാസിന്റെ കരുനീക്കങ്ങള് കണ്ടു നിന്നവരെ അമ്പരപ്പിച്ചപ്പോള് വിജയിയായി പുറത്തുവന്ന അദ്ദേഹം സൈമുള്ടേനിയസ് ചെസ്സില് പായം ഗ്രാമത്തിനും ഗ്രാമീണ ഗ്രന്ധാലയത്തിനും അതൊരു ചരിത്രമായി മാറ്റുകയായിരുന്നു.
ഇരിട്ടി എം ജി കോളേജിലെ ഫിസിക്സ് ഡിപ്പാര്ട്ട്മെന്റ് തലവനായ ഡോ. ദേവദാസ് 1988 മുതല് തുടര്ച്ചയായി മൂന്ന്വര്ഷം സംസ്ഥാന ചെസ്സ് ബി ചാമ്പ്യനായിരുന്നു. 92ല് ഏഷ്യന് ചാമ്പ്യന് ആയിരുന്ന ഭാഗ്യശ്രീ തിപ്സയെ തോല്പ്പിക്കുകയും 97 ല് സമനില പിടിക്കുകയും ചെയ്തിട്ടുണ്ട്. പയ്യന്നൂര് കോളേജില് നിന്നും ഫിസിക്സില് ബിരുദവും 93 ല് കാര്ബണിന്റെ രൂപാന്തരങ്ങളെക്കുറിച്ചു നടത്തിയ പഠനത്തില് ഡോക്ടറേറ്റും നേടി.
