കണ്ണൂര്: ജില്ലയില് റിപ്പബ്ലിക് ദിനാഘോഷം മികവുറ്റതും ചിട്ടയാര്ന്നതുമായ പരിപാടികളോടെ സംഘടിപ്പിക്കാന് ജില്ലാ കലക്ടര് പി.ബാലകിരണിന്റെ അധ്യക്ഷതയില് കലക്ടറേറ്റില് ചേര്ന്ന യോഗം തീരുമാനിച്ചു. ഹൈക്കോടതി ഉത്തരവിന്റെ പശ്ചാത്തലത്തില് റിപ്പബ്ലിക് ദിനം അവധിയായിരിക്കില്ല. ജീവനക്കാര് പരിപാടിയില് പങ്കെടുക്കേണ്ടതും അന്നേ ദിവസം ഓഫീസ് മേധാവി ഹാജര് രേഖപ്പെടുത്തുന്നതുമാണ്. പരിപാടി പ്ലാസ്റ്റിക് മുക്തമാക്കാനും യോഗം തീരുമാനിച്ചു.
റിപ്പബ്ലിക് ദിനാഘോഷത്തിന്റെ ഭാഗമായി 22, 23 തീയ്യതികളില് വൈകുന്നേരം 3 മണിക്കും 24 ന് രാവിലെ 7.30 നും കണ്ണൂര് പൊലീസ് പരേഡ് ഗ്രൗണ്ടില് റിഹേഴ്സല് പരേഡ് നടക്കും. 26 ന് വര്ണ്ണശബളമായ പരേഡില് പൊലീസ്, ജയില്, ഫോറസ്റ്റ്, മോട്ടോര് വാഹന വകുപ്പ്, എക്സൈസ്, എന് സി സി, സ്കൗട്ട് & ഗൈഡ്, റെഡ്ക്രോസ്, സ്റ്റുഡന്റ് പൊലീസ് വിഭാഗങ്ങള് പങ്കെടുക്കും. വിവിധ വകുപ്പുകള് ഫ്ളോട്ടുകള് അവതരിപ്പിക്കും. 2015 വര്ഷം മികച്ച പ്രവര്ത്തനം കാഴ്ചവെച്ച വകുപ്പുകള് തങ്ങളുടെ പ്രവര്ത്തന രേഖകള് ജനുവരി 20 നകം കലക്ടറേറ്റില് നല്കണം. മികവുറ്റ പ്രവര്ത്തനത്തിനുളള പുരസ്കാരത്തിന് ഒരു ഓഫീസിനെ തെരഞ്ഞെടുക്കും. അസി.കലക്ടര് എസ് ചന്ദ്രശേഖര്, എഡിഎം ഒ.മുഹമ്മദ് അസ്ലം, വിവിധ വകുപ്പു മേധാവികള് തുടങ്ങിയവര് യോഗത്തില് പങ്കെടുത്തു.
