കണ്ണൂര്: പഠനത്തില് പിന്നോക്കം നില്ക്കുന്ന പത്താംതരക്കാര്ക്ക് പ്രത്യേക ശ്രദ്ധ നല്കാന് ജില്ലാ പഞ്ചായത്തിന്റെ നിര്ദേശം. ഇത്തരം വിദ്യാര്ത്ഥികളെ കണ്ടെത്തി എസ്എസ്എല്സി പരീക്ഷക്ക് ഒരു മാസം മുമ്പ് അതത് പ്രദേശത്തെ ജനപ്രതിനിധികളുടെ നേതൃത്വത്തില് ഇതിനാവശ്യമായ സൗകര്യങ്ങള് നല്കണമെന്ന് വൈസ് പ്രസിഡന്റ് പി.പി.ദിവ്യ പറഞ്ഞു. സര്വശിക്ഷാ അഭിയാന്റെ നേതൃത്വത്തില് ജില്ലയിലെ തദ്ദേശസ്വയംഭരണ സ്ഥാപനങ്ങളിലെ പുതിയ മേധാവികള്ക്കായി സംഘടിപ്പിച്ച ഏകദിന വിദ്യാഭ്യാസ ശില്പശാല ജില്ലാ പഞ്ചായത്ത് കോണ്ഫറന്സ് ഹാളില് ഉദ്ഘാടനം ചെയ്തു സംസാരിക്കുകയായിരുന്നു അവര്.
പുതുതായി തെരഞ്ഞെടുക്കപ്പെട്ട ജനപ്രതിനിധികള്ക്ക് എസ്എസ്എയുടെ പ്രവര്ത്തനമേഖലകളെക്കുറിച്ചും അവയുമായി ബന്ധപ്പെട്ട് തദ്ദേശസ്വയംഭരണസ്ഥാപനങ്ങളുടെ ചുമതലകളെക്കുറിച്ചും ധാരണ ഉണ്ടാക്കാനാണ് ശില്പശാല സംഘടിപ്പിച്ചത്. എസ്എസ്എ യുടെ വിദ്യാഭ്യാസ പ്രവര്ത്തനങ്ങള്ക്ക് ചെലവഴിക്കുന്ന തുകയില് വലിയ പങ്കും തദ്ദേശസ്വയംഭരണസ്ഥാപനങ്ങളാണ് വഹിക്കുന്നത്.
പഠനനിലവാരം മെച്ചപ്പെടുത്താന് ജില്ലാ പഞ്ചായത്ത് നിരവധി പദ്ധതികള് ആവിഷ്കരിച്ചുവരുന്നുണ്ട്. വീടുകളിലെ മോശമായ സാഹചര്യങ്ങളാണ് പല കുട്ടികളും പഠനത്തില് പിന്നോക്കം പോകാന് കാരണം. ഇത്തരം പ്രശ്നങ്ങള് കണ്ടെത്തി പരിഹരിക്കുന്നതിനായി ജില്ലാ പഞ്ചായത്ത് അംഗങ്ങള് അടങ്ങിയ സംഘം എല്ലാ സ്കൂളുകളിലും പരിശോധന നടത്തുമെന്ന് വൈസ് പ്രസിഡന്റ് പറഞ്ഞു.
ചടങ്ങില് ജില്ലാ പഞ്ചായത്ത് വിദ്യാഭ്യാസ-ആരോഗ്യ സ്ഥിരം സമിതി ചെയര്മാന് കെ.വി. സുമേഷ് അധ്യക്ഷത വഹിച്ചു. ക്ഷേമകാര്യ സ്ഥിരം സമിതി അധ്യക്ഷ ടി.ടി.റംല, അംഗങ്ങളായ അജിത് മാട്ടൂല്, പി.ഗൗരി, കെ.മഹിജ, എസ്എസ്എ ജില്ലാ പ്രൊജക്ട് ഓഫീസര് കെ.പി. ഗോപിനാഥന്, ജില്ലാ പ്രോഗ്രാം ഓഫീസര് വി.വി.അനിത തുടങ്ങിയവര് പങ്കെടുത്തു.
