പയ്യന്നൂര്‍: സമൂഹത്തിലെ അസമത്വങ്ങള്‍ക്കെതിരെ വിരല്‍ചൂണ്ടി സത്യം വിളിച്ചു പറയുന്നവരെ വര്‍ഗ്ഗീയവാദികളായി ചിത്രീകരിക്കാനാണ് ചിലര്‍ ശ്രമിക്കുന്നതെന്ന് ആര്‍എസ്എസ് പ്രാന്തീയ കാര്യകാരി സദസ്യന്‍ വല്‍സന്‍ തില്ലങ്കേരി പറഞ്ഞു.പയ്യന്നൂര്‍ ബോയ്‌സ് ഹൈസ്‌കളില്‍ നടക്കുന്ന സംഘത്തിന്റെ പ്രാഥമിക സംഘ ശിക്ഷാവര്‍ഗിന്റെ സമാപന പൊതുയോഗത്തില്‍ സംസാരിക്കുകയായിരുന്നു അദ്ദേഹം.
നിശ്ശബ്ദവും അനുസ്യൂതവുമായ വ്യക്തിനിര്‍മ്മാണ പ്രവര്‍ത്തനമാണ് രാജ്യവ്യാപകമായി സംഘം നടത്തുന്നത്. ശാരീരികവും മാനസികവുമായ പരിശീലനത്തിലൂടെ ആരോഗ്യമുള്ള ഒരു ജനതതിയെയും അതിലൂടെ ശക്തമായ ഒരു രാഷ്ടത്തേയും നിര്‍മ്മിക്കുക എന്നതാണ് സംഘത്തിന്റെ പദ്ധതി. സംഘം രുപീകൃതമായ സമയത്തു തന്നെ പ്രവര്‍ത്തനമാരംഭിച്ച കമ്യൂണിസ്റ്റ് പാര്‍ട്ടികള്‍ ഇന്ന് എത്ര വിഭാഗങ്ങളായി എന്നത് ഗവേഷണം നടത്തി കണ്ടുപിടിക്കേണ്ട അവസ്ഥയിലാണ്. ലോകമെമ്പാടും ഇന്ത്യയിലും പടര്‍ന്നുനിന്ന കമ്യുണിസം ഇന്ന് നാശത്തിന്റെ വക്കിലാണ്. എന്നാല്‍ രാജ്യത്തിന്റെ വൈജ്ഞ്ഞാനിക, സാമ്പത്തിക രാഷ്‌ട്രീയസാമൂഹ്യ മേഖലകളിലെല്ലാം നിറ സാന്നിദ്ധ്യമായി മാറിയ സംഘം വിശ്വം കീഴടക്കാനുള്ള പ്രയാണത്തിലാണ്. ഈ വളര്‍ച്ചയുടെ നിദാനം വ്യക്തിത്വ വികാസത്തിന് ഊന്നല്‍ നല്‍കി വികസിപ്പിച്ചെടുത്ത ശാഖാ പദ്ധതിയാണ്.
നമ്മുടെ നാടിന്റെ പാരമ്പ്യര്യത്തിന്റെ വേരുകള്‍ അറുത്തുമാറ്റി സാംസ്‌കാരിക അധ:പതനം സൃഷ്ടിക്കാനുള്ള പ്രവര്‍ത്തനങ്ങളാണ് കമ്യുണിസ്റ്റുകാര്‍ നടത്തിയത്. കേരളത്തിലെങ്കിലും ഒരു പരിധിവരെ അവര്‍ വിജയിച്ചെങ്കിലും ഭാരതത്തിന്റെ സാംസ്‌കാരിക മൂല്യങ്ങളെ ആരാധിക്കുന്ന ഒരു തലമുറ ഉയര്‍ന്നു വരുന്നത് നമുക്ക് കാണുവാന്‍ സാധിക്കും. കമ്യുണിസ്റ്റ് പ്രത്യയശാസ്ത്രത്തിന്റെ ഉരുക്കുകോട്ടകള്‍ ഭേദിച്ച് ഈ ശക്തി സ്വാതന്ത്ര്യത്തിന്റെയും സഹിഷ്ണുതയുടെയും ഒരു പുതിയ ചരിത്രം രചിക്കും. അദ്ദേഹം പറഞ്ഞു.
യോഗത്തില്‍ ജില്ലാ സംഘചാലക് കെ.പി.നാരായണന്‍ അദ്ധ്യക്ഷത വഹിച്ചു. ശശിധരന്‍, പി.പി.വി.രാമന്‍ മാസ്റ്റര്‍ എന്നിവര്‍ സംസാരിച്ചു.
ഒരാഴ്ചയായി നടന്ന ശിബിരത്തില്‍ ശിക്ഷാര്‍ത്ഥികളടക്കം 250 ലധികം പേര്‍ പങ്കെടുത്തു. സമാപനത്തോടനുബന്ധിച്ച് പഥസഞ്ചലനവും കായിക പ്രദര്‍ശനവും നടന്നു.
