പെരുമ്പാവൂര്: നഗരമധ്യത്തിലെ തിരുവിതാംകൂര് കാലഘട്ടത്തിലെ കോടതികെട്ടിടം പൊളിച്ചുനീക്കിയപ്പോള് തറയുടെ അടിയില്നിന്നും ലഭിച്ച മനുഷ്യ കൈപ്പത്തിയുടെ ആകൃതിയില് കൊത്തിയിരിക്കുന്ന പാറശിലകളില് മനുഷ്യനിര്മ്മിത കൊത്തുപണികളും ബ്രാഹ്മിലിപിയും കണ്ടെത്തി. പെരുമ്പാവൂര് പ്രാദേശിക ചരിത്രകാരനായ ഇസ്മായില് പള്ളിപ്രം വിവരം നല്കിയതിനെ തുടര്ന്ന് ആര്ക്കിയോളജി ഡയറക്ടര് ഡോ.ജി. പ്രേംകുമാര്, കോഴിക്കോട് സര്വ്വകലാശാല മുന് മലയാള വിഭാഗം മേധാവിയും കേരളത്തിലെ പുരാലിഖിതശാസ്ത്ര വിദഗ്ദ്ധനുമായി ഡോ.ടി. പവിത്രന് എന്നിവര് സ്ഥലത്തെത്തി ശിലകള് പരിശോധിച്ചു.
ശിലകളില് കൈപ്പത്തിയുടെ അടിയില് കാണുന്ന വരകള് പുരാതനലിപിയാണോ എന്ന് പരിശോധിക്കുവാന്വേണ്ടി ഡോ.പവിത്രന് ഫോട്ടോകള് അയച്ചുകൊടുക്കുകയും ചെയ്തു. പരിശോധന നടത്തിയ അദ്ദേഹം കഴിഞ്ഞദിവസം സ്ഥലം സന്ദര്ശിച്ച് ബ്രാഹ്മിലിപിയാണെന്ന് സ്ഥീരികരിച്ചു. തുടര്ന്ന് ആര്ക്കിയോളജി ഡയറക്ടര് സ്ഥലത്തെത്തി ശിലകളിലെ മനുഷ്യ നിര്മ്മിത കൊത്തുപണികള് സ്ഥിരീകരിച്ചു.
പുരാതനലിപി പോലുള്ള വരകള് ബ്രാഹ്മിയാണെന്ന് പരിശോധിക്കുവാന് അടുത്തദിവസംതന്നെ തിരുവനന്തപുരത്ത്നിന്നും ലിപിവിദഗ്ദ്ധരെ അയക്കുമെന്നും ഇവിടെ കണ്ടെത്തിയ ചരിത്രപണികളുള്ള കല്ലുകള് നൂറ്റാണ്ടുകള് പഴക്കമുള്ളതാകുവാന് സാധ്യതയുണ്ടെന്നും ഇവ സംരക്ഷിക്കാന്വേണ്ട നടപടികള് സ്വീകരിക്കുമെന്നും അദ്ദേഹം പറഞ്ഞു. പെരുമ്പാവൂര് ലോക്കല് ഹിസ്റ്ററി റിസര്ച്ച് സെന്റര് സന്ദര്ശിച്ച അദ്ദേഹം അവിടെ സൂക്ഷിച്ചിരുന്ന വെങ്ങോല കുറ്റിപ്പാടത്തുനിന്നും നന്നങ്ങാടികള്ക്കൊപ്പം ലഭിച്ച ഇരുമ്പ് വാളും ശ്രീമൂലനഗരത്തുനിന്നും ലഭിച്ച ഇരുമ്പ് ഉറുമിയും നൂറ്റാണ്ടുകള് പഴക്കമുള്ള ഇരുമ്പ് യുഗത്തിലേതാണെന്ന് പറഞ്ഞു.
പെരിയാര് നദിക്കരയില് പുരാതനകാലം മുതല് മഹത്തായ ജീവിത സംസ്കാരം നിലനിന്നിരുന്നുവെന്നും ഈ പുരാവസ്തു പര്യഗവേഷണത്തിലൂടെ കണ്ടെത്തുവാന് എത്രയുംവേഗം വിശദമായ പര്യഗവേഷണം നടത്തുമെന്നും അദ്ദേഹം സൂചിപ്പിച്ചു.
പറവൂര്, എടക്കല്, തൊവരി, മഞ്ചേശ്വരം, മടിക്കൈ, കൂടംമുട്ടി എന്നിവിടങ്ങളില് ബ്രാഹ്മിലിപികള് പരിശോധിച്ച് വായിച്ചിട്ടുള്ള ഡോ.പവിത്രന് 30-ന് പെരുമ്പാവൂര് മുനിസിപ്പല് ലൈബ്രറിഹാളില് ‘പെരിയാര് നദീതട സംസ്ക്കാരവും പഴയകാല ലിപികളും’ എന്ന വിഷയത്തില് സംസാരിക്കും.
