കോഴിക്കോട്: സംസ്ഥാന യുവജനക്ഷേമബോര്ഡും ജില്ലാ പഞ്ചായത്തും ചേര്ന്ന് നടത്തുന്ന ജില്ലാ കേരളോത്സവത്തിന്റെ കായികമത്സരങ്ങള്ക്ക് തുടക്കമായി. കിണാശ്ശേരി ഗവ.ഹൈസ്കൂള് മൈതാനിയില് കോഴിക്കോട് ബ്ലോക്ക് പഞ്ചായത്ത് പ്രസിഡന്റ് എം. മനോജ് കായികമത്സരങ്ങള് ഉദ്ഘാടനം ചെയ്തു. യുവജനക്ഷേമബോര്ഡ് മെമ്പര് എ. ഷിയാലി അധ്യക്ഷത വഹിച്ചു. കോഴിക്കോട് ബ്ലോക്ക് പഞ്ചായത്ത് വൈസ് പ്രസിഡന്റ് ഹസീന,ബ്ലോക്ക് വികസനകാര്യസ്റ്റാന്റിങ് കമ്മറ്റി ചെയര്മാന് പി.ജി വിനീഷ്,ഗ്രാമപഞ്ചായത്ത് അംഗം മഠത്തില് അബ്ദുള് അസീസ്,കെ.കെ കോയ, റംല പുത്തലത്ത് എന്നിവര് പങ്കെടുത്തു.
ഗുരുവായൂരപ്പന് കോളേജ് ഗ്രൗണ്ട്, കിണാശ്ശേരി ഗവ.ഹൈസ്കൂള് മൈതാനം എന്നിവിടങ്ങളില് അത്ലറ്റിക്സ,് ഫുട്ബോള് മത്സരങ്ങളാണ് ഇന്നലെ നടന്നത്. പന്തീരാങ്കാവ്, മാത്തറ ഇഎംഎസ് ഹാള്, മണക്കടവ്, കൊടിനാട്ടുമുക്ക് ജി.എല്.പി സ്കൂള്, ഒളവണ്ണ മാവുത്തുംപടി, സഫയര് സെന്ട്രല്സ്കൂള് എന്നിവിടങ്ങളാണ് മറ്റു മത്സരവേദികള്.
കേരളോത്സവത്തിന്റെ ഔദ്യോഗിക ഉദ്ഘാടനം ഇന്ന് വൈകീട്ട് മൂന്നിന് നടക്കും. ബ്ലോക്ക് പഞ്ചായത്തില് നിന്നും ആരംഭിക്കുന്ന സാംസ്കാരിക ഘോഷയാത്ര ഉദ്ഘാടനവേദിയായ ഒളവണ്ണ പഞ്ചായത്ത് മിനി സ്റ്റേഡിയത്തില് സമാപിക്കും. പൊതുസമ്മേളനം അഞ്ചു മണിയ്ക്ക് പി.ടി.എ റഹീം എം.എല്.എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി അധ്യക്ഷത വഹിക്കുന്ന ചടങ്ങില് നടന് മാമുക്കോയ മുഖ്യാതിഥിയായിരിക്കും. തുടര്ന്ന് നാടകമത്സരങ്ങള് നടക്കും. ഡിസംബര് 26,27,28 തീയതികളില് പയ്യോളിയിലാണ് സംസ്ഥാന കേരളോത്സവം.
