കപ്പലിടിച്ച് ബോട്ട് തകര്‍ന്നു എട്ട് പേര്‍ക്ക് പരിക്ക്

കണ്ണൂര്‍: മീന്‍ പിടിത്ത ബോട്ടില്‍ കപ്പലിടിച്ച് എട്ട് പേര്‍ക്ക് പരിക്കേറ്റു. ഇന്നലെ പുലര്‍ച്ചെ 5 മണിയോടെയാണ് അപകടം നടന്നത്. തിരുവനന്തപുരം ജില്ലയിലുള്ളവര്‍ക്കാണ് പരിക്കേറ്റത്. തിരുനന്തപുരം പൊഴിയൂരിലെ ജോണ്‍സണിന്റെ മകന്‍ അനില്‍ (28), പുല്ലുവിളയിലെ നസിയാന്‍സിന്റെ മക്കളായ പ്രദീപ് (36), വര്‍ഗീസ് (41), പുല്ലുവിള മേരിദാസന്റെ മക്കളായ സില്‍വ (44), ജറാള്‍ഡ് (53) കൊല്ലങ്കോട് ശ്രീധരന്റെ മകന്‍ സുരേന്ദ്രന്‍ (35), കന്യാകുമാരി തുത്തൂരിലെ സൂസ ആന്റണിയുടെ മകന്‍ നദയൂസ് (45), പേതരുവിന്റെ മകന്‍ വിന്‍സന്റ് (45) എന്നിവര്‍ക്കാണ് പരിക്കേറ്റത്. ഇവരെ കണ്ണൂര്‍ ജനറല്‍ ആശുപത്രയില്‍ പ്രവേശിപ്പിച്ചു. തിരുവനന്തപുരം സ്വദേശികളായ മത്സ്യത്തൊഴിലാളികള്‍ 20 വര്‍ഷമായി കണ്ണൂര്‍ അഴീക്കലിലാണ് മത്സ്യ ബന്ധനം നടത്തുന്നത്. മത്സ്യബന്ധനത്തിന് പോയ ഇവരുടെ സെന്റ് ആന്റണീസ് എന്ന ബോട്ടില്‍ കപ്പല്‍ വന്നിടിക്കുകയായിരുന്നു. താനൂരില്‍ നിന്നും ഏകദേശം 25 നോട്ടക്കല്‍ മൈല്‍ അകലെയാണ് അപകടം നടന്നത്. ഇടിയുടെ ആഘാധത്തില്‍ ബോട്ട് പൂര്‍ണ്ണമായും തകര്‍ന്നു. മൊബൈല്‍ ഫോണുള്‍പ്പടെ എല്ലാം നശിച്ച് പോയതിനാല്‍ അപകടവിവരം പുറത്തറിയിക്കാന്‍ സാധിച്ചില്ല. ചിന്നച്ചിതറിയ ബോട്ടിന്റെ ഭാഗങ്ങളില്‍ പിടിച്ച് നിന്നാണ് എല്ലാവരും രക്ഷപ്പെട്ടത്. എകദേശം അഞ്ച് മണിക്കൂറോളം മത്സ്യത്തൊഴിലാളികള്‍ കടലില്‍ തന്നെയായിരുന്നു. തുടര്‍ന്ന് അതുവഴി വന്ന മറ്റൊരു ബോട്ടാണ് ഇവരെ കരക്കെത്തിച്ചത്. ബോട്ടിനെ ഇടിച്ച് തെറിപ്പിച്ച ശേഷം കപ്പല്‍ അതിവേഗം മുന്നോട്ട് നീങ്ങുകയായിരുന്നുവെന്ന് തൊഴിലാളികള്‍ പറഞ്ഞു. ശക്തമായ മഴയും ഇരുട്ടുമായതിനാല്‍ കപ്പലിന്റെ പേര് തിരിച്ചറിയാനായില്ല. വിശദമായ അന്വേഷണത്തിന് ശേഷം മാത്രമേ കപ്പല്‍ കണ്ടെത്താന്‍ സാധിക്കുകയുള്ളു. അപകടത്തില്‍ പരിക്കേറ്റവര്‍ക്ക് ആവശ്യമായ അടിയന്തര ചികിത്സയും സാമ്പത്തിക സഹായവും നല്‍കണമെന്ന് ബിജെപി അഴീക്കോട് പഞ്ചായത്ത് ജനറല്‍ സെക്രട്ടറി എം.സുമേഷ് ആവശ്യപ്പെട്ടു. അന്വേഷണം നടത്തി കുറ്റക്കാര്‍ക്കെതിരെ കര്‍ശന നടപടിയെടുക്കണമെന്നും അദ്ദേഹം പറഞ്ഞു.